‘ରିଲ୍’ ନୁହେଁ, ଜୀବନରେ ସଫଳତା ପାଇଁ ଦୀର୍ଘ ପଥ ବାଛ: ଯୁବପିଢ଼ିଙ୍କୁ ମୋଦୀଙ୍କ ପରାମର୍ଶ
ନୂଆଦିଲ୍ଲୀ: ପ୍ରଧାନମନ୍ତ୍ରୀ Narendra Modi ଯୁବପିଢ଼ି, ବିଶେଷକରି ‘ଜେନ୍ ଜି’ଙ୍କୁ ନେଇ ଏକ ଗୁରୁତ୍ୱପୂର୍ଣ୍ଣ ବାର୍ତ୍ତା ଦେଇଛନ୍ତି | ସୋସିଆଲ ମିଡିଆ ଓ ସର୍ଟକଟ୍ର ମୋହରୁ ଦୂରେଇ ରହିବାକୁ ପରାମର୍ଶ ଦେଇଛନ୍ତି। ପୂର୍ବତନ ରାଷ୍ଟ୍ରପତି Ram Nath Kovindଙ୍କ ଆତ୍ମଜୀବନୀ ‘Triumph of the Indian Republic: My Life, My Struggles’ ଉନ୍ମୋଚନ ଅବସରରେ ମୋଦୀ କହିଛନ୍ତି ଯେ, ଆଜିର ‘ରିଲ୍’ ଯୁଗରେ ସୋସିଆଲ ମିଡିଆ ଇନ୍ଫ୍ଲୁଏନ୍ସରଙ୍କ ପ୍ରଭାବ ବଢ଼ୁଛି। ତେଣୁ ଯୁବପିଢ଼ି ତୁରନ୍ତ ସଫଳତା ଦେଉଥିବା ସର୍ଟକଟ୍ ପରିବର୍ତ୍ତେ ଧୈର୍ଯ୍ୟ ଓ ପରିଶ୍ରମର ରାସ୍ତା ବାଛିବା ଉଚିତ ବୋଲି ସେ କହିଛନ୍ତି।
ସର୍ଟକଟ୍ର ବିପଦ ବୁଝାଇବାକୁ ମୋଦୀ ରେଳ ଷ୍ଟେସନର ଉଦାହରଣ ଦେଇଥିଲେ। ସେ କହିଥିଲେ, କିଛି ଲୋକ ପାଦଚଲା ପୋଲ ବ୍ୟବହାର ନକରି ରେଳ ଧାରଣା ପାର ହେବାକୁ ସର୍ଟକଟ୍ ଭାବେ ବାଛନ୍ତି। କିନ୍ତୁ ଏଭଳି ସର୍ଟକଟ୍ ଜୀବନ ପାଇଁ ବିପଦଜନକ ହୋଇପାରେ। ଯୁବପିଢ଼ି ସୋସିଆଲ ମିଡିଆର ପ୍ରଭାବରେ ଆସିବା ପରିବର୍ତ୍ତେ ଭଲ ପୁସ୍ତକ ଓ ମହାନ ବ୍ୟକ୍ତିତ୍ୱଙ୍କ ଆତ୍ମଜୀବନୀ ପଢ଼ିବା ଉଚିତ ବୋଲି ସେ ଆହ୍ୱାନ ଦେଇଛନ୍ତି।
ପ୍ରଧାନମନ୍ତ୍ରୀ ଆହୁରି କହିଛନ୍ତି ଯେ, ରାମନାଥ କୋବିନ୍ଦ ରାଷ୍ଟ୍ରପତି ପଦରୁ ଅବସର ନେବା ପରେ ମଧ୍ୟ ସାମାଜିକ ଓ ଜାତୀୟ ପ୍ରସଙ୍ଗରେ ସକ୍ରିୟ ରହିଛନ୍ତି। ‘ଏକ ରାଷ୍ଟ୍ର, ଏକ ନିର୍ବାଚନ’ ଭଳି ବିଷୟରେ ତାଙ୍କର ଅବଦାନ ଓ ସେବା ମନୋଭାବ ଯୁବପିଢ଼ି ପାଇଁ ପ୍ରେରଣାଦାୟକ ବୋଲି ସେ କହିଛନ୍ତି। କୋବିନ୍ଦଙ୍କ ଜୀବନ ସଂଘର୍ଷ, ମୂଲ୍ୟବୋଧ ଓ ସେବା ମନୋଭାବରୁ ଯୁବପିଢ଼ି ଅନେକ କିଛି ଶିଖିପାରିବେ ବୋଲି ପ୍ରଧାନମନ୍ତ୍ରୀ ମତ ଦେଇଛନ୍ତି।
