ସରିଲା କାଉଡ଼ିଆ ଯାତ୍ରା; ହରିଦ୍ୱାରରେ ଅଳିଆର ପାହାଡ଼: ୭ ହଜାର ଟନ୍ ଆବର୍ଜନାରେ ଭରିଲା ତୀର୍ଥସ୍ଥଳ
ଉତ୍ତରାଖଣ୍ଡ: ବାର୍ଷିକ କାଉଡ଼ିଆ ଯାତ୍ରା ଶେଷ ହେବା ପରେ ଉତ୍ତରାଖଣ୍ଡର ହରିଦ୍ୱାରରେ ଏବେ ଆବର୍ଜନା ସମସ୍ୟା ଦେଖାଦେଇଛି । ଏହି ଶ୍ରାବଣରେ ପ୍ରାୟ ୫ କୋଟି ଶ୍ରଦ୍ଧାଳୁ ଗଙ୍ଗାରୁ ଜଳ ନେବା ପାଇଁ ହରିଦ୍ୱାରରେ ପହଞ୍ଚିଥିଲେ। ଯାତ୍ରା ଶେଷ କରି ଶ୍ରଦ୍ଧାଳୁମାନେ ଫେରିଯିବା ପରେ ଘାଟ, ରାସ୍ତା ଓ ପାର୍କିଂ ସ୍ଥାନରେ ବହୁ ପରିମାଣରେ ପ୍ଲାଷ୍ଟିକ୍, ପୋଷାକ, ବୋତଲ ଓ ଅନ୍ୟ ଆବର୍ଜନା ପଡ଼ି ରହିଥିବା ଦେଖିବାକୁ ମିଳିଛି। ସବୁଠାରୁ ପ୍ରସିଦ୍ଧ ହର କି ପୌଡ଼ି ଘାଟରେ ମଧ୍ୟ ସ୍ଥିତି ଚିନ୍ତାଜନକ ରହିଥିଲା। ଏପରିକି ପରିବର୍ତ୍ତନ କକ୍ଷରେ ପରିତ୍ୟକ୍ତ ବୋତଲରେ ପରିସ୍ରା ଭରି ରଖାଯାଇଥିବା ଭିଡିଓ ମଧ୍ୟ ସାମ୍ନାକୁ ଆସିଛି।
ଯାତ୍ରା ପରେ ହରିଦ୍ୱାରରେ ଆବର୍ଜନା ସଫେଇ ପାଇଁ ପ୍ରଶାସନକୁ ବଡ଼ ଅଭିଯାନ ଚଳାଇବାକୁ ପଡ଼ିଛି। ଅଧିକାରୀଙ୍କ ଅନୁସାରେ, ପ୍ରାୟ ୭ ହଜାର ଟନ୍ ଆବର୍ଜନା ଡମ୍ପିଂ ଗ୍ରାଉଣ୍ଡକୁ ପଠାଯାଇଛି। ଶିବରାତ୍ରି ପରେ ସଫେଇ କର୍ମଚାରୀମାନେ ରାତିସାରା ଘାଟ, ରାସ୍ତା ଓ ପାର୍କିଂ ଅଞ୍ଚଳ ସଫା କରିଥିବା ମ୍ୟୁନିସିପାଲ୍ କମିଶନର ନନ୍ଦନ କୁମାର କହିଛନ୍ତି। ତେବେ ସଫେଇ ସମୟରେ କର୍ମଚାରୀମାନେ ଆବଶ୍ୟକ ସୁରକ୍ଷା ସାମଗ୍ରୀ ବିନା ଆବର୍ଜନା ହଟାଉଥିବା ଦୃଶ୍ୟକୁ ନେଇ ମଧ୍ୟ ପ୍ରଶ୍ନ ଉଠିଛି।
କେବଳ ହରିଦ୍ୱାର ନୁହେଁ, ଗଙ୍ଗୋତ୍ରୀ ଅଞ୍ଚଳରେ ମଧ୍ୟ କାଉଡ଼ିଆ ଯାତ୍ରା ପରେ ଆବର୍ଜନା ବଢ଼ିଛି। ଏହି ଶ୍ରାବଣରେ ପ୍ରାୟ ୫୭ ହଜାର ଶ୍ରଦ୍ଧାଳୁ ଗଙ୍ଗାର ଉତ୍ସସ୍ଥଳ ଗଙ୍ଗୋତ୍ରୀରେ ପହଞ୍ଚିଥିଲେ। ଫେରିବା ସମୟରେ ଅନେକ ସ୍ଥାନରେ ପୋଷାକ, ପ୍ଲାଷ୍ଟିକ୍ ଓ ଅନ୍ୟ ଆବର୍ଜନା ଛାଡ଼ି ଯାଇଥିବାରୁ ହିମାଳୟର ସମ୍ବେଦନଶୀଳ ପରିବେଶ ଉପରେ ଏହାର ପ୍ରଭାବ ପଡ଼ିବା ଆଶଙ୍କା ରହିଛି। ପ୍ଲାଷ୍ଟିକ୍ ମୁକ୍ତ ଅଞ୍ଚଳ ଭାବେ ଚିହ୍ନିତ ଗଙ୍ଗୋତ୍ରୀରେ ସଫେଇ ଅଭିଯାନ ସମୟରେ ବନ ବିଭାଗ ୫୭ ବସ୍ତା ଆବର୍ଜନା ସଂଗ୍ରହ କରିଛି। ଧାର୍ମିକ ଯାତ୍ରା ସହ ପରିବେଶ ସୁରକ୍ଷାକୁ ମଧ୍ୟ ଗୁରୁତ୍ୱ ଦେବା ନେଇ ଏହି ଘଟଣା ପୁଣିଥରେ ପ୍ରଶ୍ନ ଉଠାଇଛି।
