ଏୟାର ଇଣ୍ଡିଆ ପାଇଲଟ୍ ଡ୍ରଗ୍ସ ଟେଷ୍ଟରେ ପଜିଟିଭ୍ ପରେ ନିୟମ ବଦଳିବ କି? DGCAକୁ ସମୀକ୍ଷା ନିର୍ଦ୍ଦେଶ
ନୂଆଦିଲ୍ଲୀ: ଏୟାର ଇଣ୍ଡିଆର ଜଣେ ପାଇଲଟ୍ ଡ୍ରଗ୍ସ ଟେଷ୍ଟରେ ମାରିଜୁଆନା ପାଇଁ ପଜିଟିଭ୍ ଆସିବା ପରେ ବିମାନ ପାଇଲଟ୍ମାନଙ୍କ ଡୋପ୍ ଟେଷ୍ଟ ନିୟମର ସମୀକ୍ଷା କରିବାକୁ ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ (DGCA)କୁ କେନ୍ଦ୍ର ସରକାର ନିର୍ଦ୍ଦେଶ ଦେଇଛନ୍ତି। ଅଗଷ୍ଟ ୪ରେ ଫୁକେଟ୍ରୁ ଦିଲ୍ଲୀ ଆସୁଥିବା ଏୟାର ଇଣ୍ଡିଆର AI2379 ବିମାନ ହଠାତ୍ ପ୍ରାୟ ୩୦୦ ଫୁଟ୍ ତଳକୁ ଖସିଯାଇଥିଲା। ଏହି ଘଟଣାରେ ୨୪ ଜଣ ଯାତ୍ରୀ ଓ କ୍ରୁ ସଦସ୍ୟ ଆହତ ହୋଇଥିଲେ। ଘଟଣା ପରେ ଉଭୟ ପାଇଲଟ୍ଙ୍କର ନିୟମ ଅନୁସାରେ ଡ୍ରଗ୍ସ ଟେଷ୍ଟ କରାଯାଇଥିଲା।
ବିମାନ ଚଳାଚଳ ମନ୍ତ୍ରଣାଳୟର ସୂଚନା ଅନୁସାରେ, ପାଇଲଟ୍-ଇନ୍-କମାଣ୍ଡଙ୍କ ପ୍ରାଥମିକ ଡୋପ୍ ଟେଷ୍ଟରେ ଏପରି ଫଳାଫଳ ଆସିଥିଲା, ଯାହାର ନିଶ୍ଚିତକରଣ ପାଇଁ ନମୁନାକୁ ଏକ ନିର୍ଦ୍ଦିଷ୍ଟ ଲାବରେଟୋରୀକୁ ପଠାଯାଇଥିଲା। ପରବର୍ତ୍ତୀ ନିଶ୍ଚିତକରଣ ପରୀକ୍ଷାରେ ମଧ୍ୟ ଫଳାଫଳ ପଜିଟିଭ୍ ଆସିଥିବା ଜଣାପଡ଼ିଛି। ଏହାପରେ ତଦନ୍ତ ଓ ଟେଷ୍ଟ ପ୍ରକ୍ରିୟା ଶେଷ ନହେବା ପର୍ଯ୍ୟନ୍ତ DGCA ଉଭୟ ପାଇଲଟ୍ଙ୍କୁ ଫ୍ଲାଇଟ୍ ଡ୍ୟୁଟିରୁ ହଟାଇଛି। ବର୍ତ୍ତମାନ DGCAକୁ ଅନ୍ୟ ଦେଶରେ ପାଇଲଟ୍ମାନଙ୍କର ସାଇକୋଆକ୍ଟିଭ୍ ସବ୍ଷ୍ଟାନ୍ସ ଟେଷ୍ଟ କିପରି କରାଯାଏ, ତାହା ଅଧ୍ୟୟନ କରିବାକୁ କୁହାଯାଇଛି।
ବର୍ତ୍ତମାନର ନିୟମ ଅନୁସାରେ, ଡୋପ୍ ଟେଷ୍ଟରେ ପଜିଟିଭ୍ ଆସିଥିବା ବିମାନ କର୍ମଚାରୀଙ୍କୁ ପୁନର୍ବାସ କାର୍ଯ୍ୟକ୍ରମକୁ ପଠାଯାଏ। ଦ୍ୱିତୀୟ ଥର ପଜିଟିଭ୍ ଆସିଲେ ତିନି ବର୍ଷ ପର୍ଯ୍ୟନ୍ତ ଲାଇସେନ୍ସ ନିଲମ୍ବନ ହୋଇପାରେ ଏବଂ ତୃତୀୟ ଥର ନିୟମ ଉଲ୍ଲଂଘନ ହେଲେ ଲାଇସେନ୍ସ ବାତିଲ ହୋଇପାରେ। ସରକାରଙ୍କ ମତରେ, ଭାରତର ବର୍ତ୍ତମାନର ନିୟମ ଅନ୍ତର୍ଜାତୀୟ ମାନଦଣ୍ଡ ସହ ସମନ୍ୱିତ ଥିଲେ ମଧ୍ୟ ଏହି ଘଟଣା ପରେ ନିୟମକୁ ଆହୁରି ମଜବୁତ କରିବାର ଆବଶ୍ୟକତା ଅଛି କି ନାହିଁ, ତାହା ଯାଞ୍ଚ କରାଯିବ। ଏପଟେ ଏୟାର ଇଣ୍ଡିଆ ବିମାନର ୩୦୦ ଫୁଟ୍ ତଳକୁ ଖସିବା ଘଟଣାର ତଦନ୍ତ Aircraft Accident Investigation Bureau (AAIB) କରୁଛି। ତଦନ୍ତରେ ବିମାନର ଟେକ୍ନିକାଲ୍ ବ୍ୟବସ୍ଥା, ଫ୍ଲାଇଟ୍ ଡାଟା, ମେଣ୍ଟେନାନ୍ସ ରେକର୍ଡ, ମେଡିକାଲ୍ ତଥ୍ୟ ଏବଂ ମାନବୀୟ କାରଣ ଭଳି ବିଭିନ୍ନ ଦିଗକୁ ଯାଞ୍ଚ କରାଯାଉଛି। AAIB ସ୍ପଷ୍ଟ କରିଛି ଯେ ତଦନ୍ତ ଶେଷ ହେବା ପୂର୍ବରୁ କୌଣସି ଗୋଟିଏ ତଥ୍ୟ ଆଧାରରେ ଘଟଣାର କାରଣ ନିର୍ଣ୍ଣୟ କରିବା ଠିକ୍ ହେବ ନାହିଁ।
