୧.୨୦ କୋଟି ଟଙ୍କାର ମିଛ ଲୋଭ: Instagram Reel ଦେଖି ନାବାଳକଙ୍କୁ ହତ୍ୟା! ଶରୀରରୁ କାଟିନେଲେ ଅଙ୍ଗ
ଭୋପାଳ: ମଧ୍ୟପ୍ରଦେଶର ଭୋପାଳରେ ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି । ଏକ Instagram Reel ଦେଖି ୧୭ ବର୍ଷୀୟ ରେହାନଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି। ପୋଲିସ ଅନୁସାରେ, ମାନବ ଶରୀରର ଏକ ଅଙ୍ଗ ବିକ୍ରି କଲେ ୧.୨୦ କୋଟି ଟଙ୍କା ମିଳିବ ବୋଲି ଅଭିଯୁକ୍ତମାନେ ଏକ ଭିଡିଓରୁ ବିଶ୍ୱାସ କରିଥିଲେ। ଏହି ମିଛ ଦାବିକୁ ସତ ବୋଲି ଭାବି ରେହାନଙ୍କୁ ୧୦୦ ଟଙ୍କା ଦେବାର ପ୍ରଲୋଭନ ଦେଖାଇ ଏକ ନିଛାଟିଆ ସ୍ଥାନକୁ ନିଆଯାଇଥିଲା। ସେଠାରେ ତାଙ୍କୁ ଛୁରୀରେ ଆକ୍ରମଣ କରି ହତ୍ୟା କରାଯାଇଥିବା ପୋଲିସ କହିଛି।
ଏହି ମାମଲାରେ ୨୦ ବର୍ଷୀୟ BBA ଛାତ୍ର ଜୋହେବ ଖାନ୍ ଏବଂ ୧୮ ବର୍ଷୀୟ ଆମିର କୁରେଶୀଙ୍କୁ ପୋଲିସ ଗିରଫ କରିଛି। ଆଉ ୩ ଜଣ ନାବାଳକଙ୍କୁ ଅଟକ ରଖାଯାଇଛି। ପୋଲିସ ଅନୁସାରେ, ଜୋହେବ ନିଜକୁ ଡାକ୍ତର ଭାବେ ଦର୍ଶାଉଥିଲେ ଏବଂ ଅନ୍ୟମାନଙ୍କୁ ଏହି ଅଜବ ଦାବି ବିଷୟରେ ବୁଝାଇଥିଲେ। ଅଗଷ୍ଟ ୬ରେ ଦୁଇ ନାବାଳକ ରେହାନଙ୍କୁ ଏକ ଝଗଡ଼ାରେ ସାହାଯ୍ୟ କରିବାକୁ କହି ୧୦୦ ଟଙ୍କା ଦେବାର ପ୍ରତିଶ୍ରୁତି ଦେଇଥିଲେ। ପରେ ତାଙ୍କୁ ଧୋବିଘାଟ ଅଞ୍ଚଳକୁ ନିଆଯାଇଥିଲା। ସେଠାରେ ରେହାନଙ୍କୁ ଆକ୍ରମଣ କରି ହତ୍ୟା କରାଯିବା ପରେ ତାଙ୍କ ଶରୀରରୁ ଅଙ୍ଗ କାଟି ନିଆଯାଇଥିବା ପୋଲିସ ଅଭିଯୋଗ କରିଛି।
ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି, ହତ୍ୟା ପରେ ଅଭିଯୁକ୍ତମାନେ ସେହି ଅଙ୍ଗକୁ ବିକ୍ରି କରିବା ପାଇଁ କ୍ରେତା ଖୋଜିଥିଲେ। କିନ୍ତୁ କୌଣସି କ୍ରେତା ମିଳିନଥିଲା। ପୋଲିସ କହିଛି, ୧.୨୦ କୋଟି ଟଙ୍କା ମିଳିବା ନେଇ କୌଣସି ଚିକିତ୍ସା ବୈଜ୍ଞାନିକ ଆଧାର ମିଳିନାହିଁ। ଅଗଷ୍ଟ ୧୦ରେ ଧୋବିଘାଟ ଅଞ୍ଚଳରୁ ରେହାନଙ୍କ ମୃତଦେହ ମିଳିଥିଲା। ପ୍ରଥମେ ତାଙ୍କ ପରିଚୟ ମିଳିନଥିଲା। ପରେ ଅଗଷ୍ଟ ୧୫ରେ ତାଙ୍କ ମା’ ନିଖୋଜ ପୁଅକୁ ଖୋଜିବାକୁ ଥାନାରେ ପହଞ୍ଚିଥିଲେ। ହାତରେ ଥିବା ଏକ ଟାଟୁ ଆଧାରରେ ମୃତଦେହଟି ରେହାନଙ୍କର ବୋଲି ଚିହ୍ନଟ ହୋଇଥିଲା। ବର୍ତ୍ତମାନ ପୋଲିସ ଏହି ଭାଇରାଲ୍ Reel କେଉଁଠାରୁ ଆସିଥିଲା ଏବଂ ଏହି ମିଛ ଦାବି କିପରି ହତ୍ୟାର କାରଣ ହେଲା, ତାହାର ତଦନ୍ତ କରୁଛି।
