PNB ଗ୍ରାହକଙ୍କ ପାଇଁ ବଡ଼ ଆଲର୍ଟ; ସେପ୍ଟେମ୍ବର ୧୩ ପରେ ବନ୍ଦ ହୋଇପାରେ ଜିରୋ ବାଲାନ୍ସ ଆକାଉଣ୍ଟ
ନୂଆଦିଲ୍ଲୀ: ପଞ୍ଜାବ ନ୍ୟାସନାଲ ବ୍ୟାଙ୍କ (PNB) ଗ୍ରାହକଙ୍କ ପାଇଁ ଆସିଛି ବଡ଼ ଖବର। ବ୍ୟାଙ୍କ ପକ୍ଷରୁ ଦୀର୍ଘ ସମୟ ଧରି ନିଷ୍କ୍ରିୟ ରହିଥିବା କିଛି ଆକାଉଣ୍ଟକୁ ନେଇ ଆଲର୍ଟ ଜାରି କରାଯାଇଛି। ସୂଚନା ଅନୁସାରେ, ଯେଉଁ ଆକାଉଣ୍ଟରେ ଗତ ୩ ବର୍ଷ ଧରି କୌଣସି ଟ୍ରାଞ୍ଜାକ୍ସନ ହୋଇନାହିଁ ଏବଂ ବାଲାନ୍ସ ଶୂନ ରହିଛି, ସେହି ଆକାଉଣ୍ଟଗୁଡ଼ିକୁ ସେପ୍ଟେମ୍ବର ୧୩ ପରେ ବନ୍ଦ କରାଯାଇପାରେ। ଏଥିପାଇଁ ୩୦ ଜୁନ୍ ୨୦୨୬କୁ ଆଧାର ତାରିଖ ଭାବେ ନିଆଯାଇଛି।
PNB ପକ୍ଷରୁ କୁହାଯାଇଛି ଯେ, ଦୀର୍ଘ ସମୟ ଧରି ନିଷ୍କ୍ରିୟ ଥିବା ଏବଂ ଶୂନ ବାଲାନ୍ସ ଥିବା ଆକାଉଣ୍ଟର ଦୁରୁପଯୋଗ ରୋକିବା ସହ ଏହା ସହ ଜଡ଼ିତ ବିଭିନ୍ନ ବିପଦକୁ କମାଇବା ଉଦ୍ଦେଶ୍ୟରେ ଏହି ପଦକ୍ଷେପ ନିଆଯାଉଛି। ତେବେ ଏହି ନିୟମ ସମସ୍ତ ପ୍ରକାର ଆକାଉଣ୍ଟ ପାଇଁ ପ୍ରଯୁଜ୍ୟ ନୁହେଁ। ନିର୍ଦ୍ଧାରିତ ଶ୍ରେଣୀରେ ଆସୁଥିବା ଆକାଉଣ୍ଟ ଥିବା ଗ୍ରାହକମାନେ ସମୟସୀମା ପୂର୍ବରୁ ନିଜ ଆକାଉଣ୍ଟର ସ୍ଥିତି ଯାଞ୍ଚ କରିବା ଆବଶ୍ୟକ।
ଯଦି ଆପଣଙ୍କର PNBରେ ଏଭଳି ପୁରୁଣା କିମ୍ବା ନିଷ୍କ୍ରିୟ ଜିରୋ ବାଲାନ୍ସ ଆକାଉଣ୍ଟ ରହିଛି, ତେବେ ଭୟଭୀତ ହେବାର ଆବଶ୍ୟକତା ନାହିଁ। ସମୟସୀମା ପୂର୍ବରୁ ବ୍ୟାଙ୍କ ସହ ଯୋଗାଯୋଗ କରି ଆକାଉଣ୍ଟର ସ୍ଥିତି ଜାଣିବା ସହ ଆବଶ୍ୟକ KYC ପ୍ରକ୍ରିୟା ପୂରଣ କରି ଆକାଉଣ୍ଟକୁ ସକ୍ରିୟ କରାଇପାରିବେ। ତେଣୁ ନିଜ ଆକାଉଣ୍ଟ ଏହି ଶ୍ରେଣୀରେ ଆସୁଛି କି ନାହିଁ, ଗ୍ରାହକମାନେ ଶୀଘ୍ର ଯାଞ୍ଚ କରିନେବା ଉଚିତ।
