ଅରୁଣାଚଳରେ ଚୀନ୍ର ୬୦ କିମି ଅନୁପ୍ରବେଶ ଦାବି ଭୁଲ: କିରେନ୍ ରିଜିଜୁ
ନୂଆଦିଲ୍ଲୀ: ଅରୁଣାଚଳ ପ୍ରଦେଶରେ ଚୀନ୍ ୬୦ କିଲୋମିଟର ଭିତରକୁ ପ୍ରବେଶ କରିଥିବା ଦାବିକୁ ଖଣ୍ଡନ କରିଛନ୍ତି କେନ୍ଦ୍ରମନ୍ତ୍ରୀ କିରେନ୍ ରିଜିଜୁ। ଏକ ସାକ୍ଷାତକାରରେ ସେ କହିଛନ୍ତି, ଚୀନ୍ ଭାରତୀୟ ଅଞ୍ଚଳର ୬୦ କିଲୋମିଟର ଭିତରକୁ ପ୍ରବେଶ କରିଥିବା କହିବା ଠିକ୍ ନୁହେଁ। ଅରୁଣାଚଳରେ ଭାରତ-ଚୀନ୍ ସୀମା ବହୁ ଦୀର୍ଘ ହୋଇଥିବା ବେଳେ ଅନେକ ସ୍ଥାନରେ ସୀମାର ସ୍ପଷ୍ଟ ଭାବେ ଚିହ୍ନଟ ହୋଇନାହିଁ ବୋଲି ସେ କହିଛନ୍ତି। ତେବେ ସୀମା ଅଞ୍ଚଳରେ ଚୀନ୍ର କାର୍ଯ୍ୟକଳାପ ବଢ଼ିଥିବାରୁ ସ୍ଥାନୀୟ ଲୋକଙ୍କ ଚିନ୍ତାକୁ ଗୁରୁତ୍ୱ ଦେବା ଆବଶ୍ୟକ ବୋଲି ରିଜିଜୁ କହିଛନ୍ତି।
ଅରୁଣାଚଳର ଅପର ସୁବନସିରି ଜିଲ୍ଲାର ତାକସିଂ ଅଞ୍ଚଳରେ ଚୀନ୍ ସେନା LAC ଅତିକ୍ରମ କରିଥିବା ନେଇ କିଛି ଦାବି ଓ ରିପୋର୍ଟ ସାମ୍ନାକୁ ଆସିଥିଲା। ଏହାକୁ ନେଇ ରିଜିଜୁ କହିଛନ୍ତି, ମିଥ୍ୟା ଭିଡିଓ କିମ୍ବା ଭୁଲ ଦାବି ପ୍ରଚାର କରିବା ଦ୍ୱାରା ଦେଶରେ ଭ୍ରମ ସୃଷ୍ଟି ହେବା ସହ ସୁରକ୍ଷାବାହିନୀର ମନୋବଳ ଉପରେ ପ୍ରଭାବ ପଡ଼ିପାରେ। ତାଙ୍କ କହିବା ଅନୁସାରେ, ଚୀନ୍ ପୂର୍ବରୁ ସୀମା ଅଞ୍ଚଳରେ ସଡ଼କ ଓ ଅନ୍ୟାନ୍ୟ ଭିତ୍ତିଭୂମି ନିର୍ମାଣ କରିଆସୁଛି। ୨୦୧୪ ପରେ ଭାରତ ସରକାର ମଧ୍ୟ ଦୁର୍ଗମ ସୀମାନ୍ତ ଅଞ୍ଚଳରେ ସଡ଼କ ଓ ଭିତ୍ତିଭୂମି ବିକାଶକୁ ଗତି ଦେଇଛନ୍ତି ବୋଲି ସେ କହିଛନ୍ତି।
ରିଜିଜୁ କହିଛନ୍ତି, ସୀମା ସ୍ପଷ୍ଟ ଭାବେ ନିର୍ଦ୍ଧାରିତ ନଥିବା କିଛି ଅଞ୍ଚଳକୁ ନେଇ ଉଭୟ ପକ୍ଷର ଭିନ୍ନ ଦାବି ରହିଛି। ତେଣୁ ଏହାକୁ ଚୀନ୍ ଭାରତର କୌଣସି ଗାଁ ଦଖଲ କରିଥିବା ଭାବେ ଦେଖାଯିବା ଠିକ୍ ନୁହେଁ ବୋଲି ସେ କହିଛନ୍ତି। ସେପଟେ ଅଞ୍ଚଳରେ ଇଣ୍ଡୋ-ତିବ୍ବତାନ୍ ବର୍ଡର ପୁଲିସ୍ (ITBP)ର ପାଟ୍ରୋଲିଂ ବଢ଼ାଯାଇଥିବା ସୂଚନା ମିଳିଛି। ଚୀନ୍ ପକ୍ଷରୁ ଅରୁଣାଚଳର ସ୍ଥାନଗୁଡ଼ିକର ନାମ ପରିବର୍ତ୍ତନ ଉଦ୍ୟମକୁ ପ୍ରତିହତ କରିବା ପାଇଁ ଭାରତ ସରକାର ନିକଟରେ ରାଜ୍ୟର ୨୭ଟି ସ୍ଥାନର ମାନକ ନାମ ଅଧିକାରିକ ମାନଚିତ୍ରରେ ବ୍ୟବହାର କରିଥିଲେ। ଭାରତ ସ୍ପଷ୍ଟ କରିଛି ଯେ ଅରୁଣାଚଳ ପ୍ରଦେଶ ଦେଶର ଅବିଚ୍ଛିନ୍ନ ଅଂଶ।
