ଶିଲଂରେ ହିଂସା ପରେ KSUର ୩ ଶୀର୍ଷ ନେତା ଗିରଫ, ବାଇକ୍ ରାଲିରେ ଭଙ୍ଗାରୁଜା ଓ ଅଗ୍ନିକାଣ୍ଡ ଅଭିଯୋଗ
ନୂଆଦିଲ୍ଲୀ: ଶିଲଂରେ ଖାସି ଷ୍ଟୁଡେଣ୍ଟସ୍ ୟୁନିଅନ୍ (KSU) ପକ୍ଷରୁ ଆୟୋଜିତ ବ୍ଲାକ୍-ଫ୍ଲାଗ୍ ବାଇକ୍ ରାଲି ସମୟରେ ହୋଇଥିବା ହିଂସା ଘଟଣାରେ ପୁଲିସ ୩ ଜଣ ବରିଷ୍ଠ ନେତାଙ୍କୁ ଗିରଫ କରିଛି। ଗିରଫ ନେତାମାନେ ହେଲେ KSU ସଭାପତି ରେମଣ୍ଡ ଖରଜାନା, ସାଧାରଣ ସମ୍ପାଦକ ରୁବେନ ନାଜିଆର ଓ ଉପସଭାପତି ପିନ୍କମେନଲାଙ୍ଗ ସାନମିଏଟ୍। ବୁଧବାର ରାତି ପ୍ରାୟ ମଧ୍ୟରାତ୍ରି ସମୟରେ ପୁଲିସ ସେମାନଙ୍କୁ ଗିରଫ କରି ସଦର ଥାନାକୁ ନେଇ ପଚରାଉଚରା କରିଛି। ସରକାରୀ ସମ୍ପତ୍ତି ନଷ୍ଟ, ମାଡ଼ ମାରିବା ଓ ବେଆଇନ ଭାବେ ଏକାଠି ହେବା ଭଳି ଅଭିଯୋଗରେ ଭାରତୀୟ ନ୍ୟାୟ ସଂହିତା (BNS), ୨୦୨୩ର ବିଭିନ୍ନ ଧାରାରେ ମାମଲା ରୁଜୁ ହୋଇଛି।
ପୁଲିସ ଅନୁସାରେ, ରାଲି ସମୟରେ ୩୧ଟି ଗାଡ଼ି କ୍ଷତିଗ୍ରସ୍ତ ହେବା ସହ ଅନେକ ଲୋକ ଆହତ ହୋଇଥିଲେ। ଆନ୍ଦୋଳନକାରୀମାନେ ଗାଡ଼ି ଉପରକୁ ପଥର ଫିଙ୍ଗିବା, ବାହାର ରାଜ୍ୟର ଗାଡ଼ି ଭଙ୍ଗାରୁଜା କରିବା, ଏକ ସରକାରୀ ଗାଡ଼ିରେ ନିଆଁ ଲଗାଇବା ଏବଂ ରାସ୍ତାରେ ଯାଉଥିବା ଲୋକଙ୍କୁ ମାଡ଼ ମାରିବା ଭଳି ଘଟଣା ଘଟିଥିବା ପୁଲିସ କହିଛି। ତେବେ KSU ନେତୃତ୍ୱ ହିଂସା ପାଇଁ ରାଲିରେ ସାମିଲ ହୋଇଥିବା କିଛି ‘ନକାରାତ୍ମକ ତତ୍ତ୍ୱ’ଙ୍କୁ ଦାୟୀ କରିଛି। ଗିରଫ ପୂର୍ବରୁ KSU ନେତାମାନେ ଗଣମାଧ୍ୟମ ସମ୍ମୁଖରେ ହିଂସା ପାଇଁ ଦୁଃଖ ପ୍ରକାଶ କରିବା ସହ ରାଲିକୁ ସମର୍ଥନ କରିଥିଲେ। ମଧ୍ୟରାତ୍ରିରେ ପୁଲିସ ଓ SF-10 ଯବାନ KSU କାର୍ଯ୍ୟାଳୟକୁ ଘେରାଉ କରି ତଲାସୀ ନେଇଥିଲେ।
ମେଘାଳୟ ସରକାରଙ୍କୁ ଦିଆଯାଇଥିବା ୧୫ ଦିନିଆ ଚରମପତ୍ରର ଅବଧି ଶେଷ ହେବା ପରେ KSU ଏହି ବ୍ଲାକ୍-ଫ୍ଲାଗ୍ ବାଇକ୍ ରାଲି ଆୟୋଜନ କରିଥିଲା। ପ୍ରସ୍ତାବିତ ନୂଆ ଘରୋଇ ସିମେଣ୍ଟ କାରଖାନା ପାଇଁ ଇଷ୍ଟ ଜୟନ୍ତିଆ ହିଲ୍ସରେ ହେବାକୁ ଥିବା ଜନଶୁଣାଣି ବାତିଲ, ପ୍ରବାସୀ ଶ୍ରମିକଙ୍କ ସମ୍ପର୍କିତ ନିୟମ କାର୍ଯ୍ୟକାରୀ, ମେଘାଳୟ ବାସିନ୍ଦାଙ୍କ ପାଇଁ ସରକାରୀ ଚାକିରିରେ ସଂରକ୍ଷଣ, Inner Line Permit ଲାଗୁ କରିବା ଏବଂ ୟୁରାନିୟମ୍ ଖଣି ଖନନ ବିରୋଧରେ ପୂର୍ବ ପ୍ରତିଶ୍ରୁତି ପାଳନ ଭଳି ଦାବି KSU ରଖିଛି। ରାଲିରେ ହିଂସା ପରେ ୩ ନେତାଙ୍କ ଗିରଫକୁ ନେଇ ପୁଣିଥରେ ପୁଲିସ ଓ KSU ସଦସ୍ୟଙ୍କ ମଧ୍ୟରେ ଉତ୍ତେଜନା ଦେଖାଦେଇଛି।
