Manisha Koirala: ନେପାଳର ଭୟଙ୍କର ବନ୍ୟାକୁ ନେଇ ମନୀଷାଙ୍କ ଆବେଗଭରା ଆହ୍ୱାନ, କହିଲେ- “ଭାରତ-ଚୀନ୍ ଏକାଠି ହୁଅନ୍ତୁ”
ନୂଆଦିଲ୍ଲୀ: ନେପାଳରେ ଭୟଙ୍କର ବନ୍ୟା ଓ ପ୍ରାକୃତିକ ବିପର୍ଯ୍ୟୟ ପରେ ସାରା ଦେଶରେ ଦୁଃଖର ପରିବେଶ ସୃଷ୍ଟି ହୋଇଛି। ଏଭଳି କଠିନ ସମୟରେ ନେପାଳବାସୀଙ୍କ ସମର୍ଥନରେ ଆଗକୁ ଆସିଛନ୍ତି ନେପାଳରେ ଜନ୍ମିତ ବଲିଉଡ୍ ଅଭିନେତ୍ରୀ ମନୀଷା କୋଇରାଲା। ‘ଇନ୍ ସଲିଡାରିଟି ୱିଥ୍ ନେପାଳ’ କାର୍ଯ୍ୟକ୍ରମରେ ଯୋଗଦେଇ ସେ ଭାରତ, ଚୀନ୍ ସମେତ ଅନ୍ତର୍ଜାତୀୟ ସମୁଦାୟକୁ ନେପାଳ ପାଇଁ ଏକାଠି ହୋଇ ସହଯୋଗ କରିବାକୁ ଅପିଲ୍ କରିଛନ୍ତି।
ମନୀଷା କହିଛନ୍ତି, ବିପର୍ଯ୍ୟୟ ସମୟରେ ନେପାଳକୁ କେବଳ ବନ୍ୟା ଓ ଧ୍ୱଂସର ଚିତ୍ର ଭାବେ ଦେଖିବା ଉଚିତ୍ ନୁହେଁ। ଦେଶର ପ୍ରାକୃତିକ ସୌନ୍ଦର୍ଯ୍ୟ, ସଂସ୍କୃତି, ପରମ୍ପରା ଓ ଲୋକଙ୍କୁ ସମର୍ଥନ କରିବା ଆବଶ୍ୟକ। ନେପାଳର ଅର୍ଥନୀତିରେ ପର୍ଯ୍ୟଟନର ଗୁରୁତ୍ୱ ଥିବାରୁ ବିପର୍ଯ୍ୟୟ ପରେ ମଧ୍ୟ ଦେଶର ପର୍ଯ୍ୟଟନ କ୍ଷେତ୍ରକୁ ସମର୍ଥନ କରିବାକୁ ସେ ଅନ୍ତର୍ଜାତୀୟ ସମୁଦାୟକୁ ଅନୁରୋଧ କରିଛନ୍ତି।
ଏହା ସହ ହିମାଳୟ ଅଞ୍ଚଳରେ ବଢ଼ୁଥିବା ପରିବେଶ ଓ ଜଳବାୟୁ ପରିବର୍ତ୍ତନଜନିତ ବିପଦର ମୁକାବିଲା ପାଇଁ ଭାରତ, ଚୀନ୍ ଓ ନେପାଳ ମିଳିତ ଭାବେ କାମ କରିବା ଆବଶ୍ୟକ ବୋଲି ମନୀଷା ମତ ଦେଇଛନ୍ତି। ଏଭଳି ବିପଦ ସମୟରେ ନେପାଳବାସୀଙ୍କୁ ଏକା ଛାଡ଼ି ନଦେଇ ମାନବିକତାର ହାତ ବଢ଼ାଇବା ସହ ରିଲିଫ୍, ଉଦ୍ଧାର ଓ ପୁନର୍ନିର୍ମାଣ କାର୍ଯ୍ୟରେ ସହଯୋଗ କରିବାକୁ ସେ ଆହ୍ୱାନ ଦେଇଛନ୍ତି। ନେପାଳର ବିପର୍ଯ୍ୟୟ ସମୟରେ ମନୀଷାଙ୍କ ଏହି ଆହ୍ୱାନ ମାନବିକ ସହଯୋଗ ଓ ଅନ୍ତର୍ଜାତୀୟ ସମର୍ଥନର ଆବଶ୍ୟକତାକୁ ପୁଣିଥରେ ସାମ୍ନାକୁ ଆଣିଛି।
