Ayodhya Ram Mandir: ଆଜି ଟ୍ରଷ୍ଟର ଗୁରୁତ୍ୱପୂର୍ଣ୍ଣ ବୈଠକ, ଘୋଷଣା ହୋଇପାରେ ରାମ ମନ୍ଦିରର ପ୍ରଥମ ସ୍ଥାୟୀ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (CEO)ଙ୍କ ନାଁ?
ଉତ୍ତରପ୍ରଦେଶ: ଅଯୋଧ୍ୟା ରାମ ମନ୍ଦିରର ପ୍ରଶାସନିକ ବ୍ୟବସ୍ଥାକୁ ନେଇ ଆଜି ବସିବ ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟର ଗୁରୁତ୍ୱପୂର୍ଣ୍ଣ ବୈଠକ। ମଣିରାମ ଦାସ କ୍ୟାଣ୍ଟନମେଣ୍ଟରେ ହେବାକୁ ଥିବା ଏହି ବୈଠକରେ ମନ୍ଦିର ପରିଚାଳନା ସହ ଜଡ଼ିତ ଅନେକ ବଡ଼ ନିଷ୍ପତ୍ତି ନିଆଯାଇପାରେ। ବିଶେଷ କରି ରାମ ମନ୍ଦିର ଟ୍ରଷ୍ଟର ପ୍ରଥମ ସ୍ଥାୟୀ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ବା CEO ନିଯୁକ୍ତି ଉପରେ ସମସ୍ତଙ୍କ ନଜର ରହିଛି। CEO ଚୟନ ପାଇଁ ଗଠିତ ତିନି ସଦସ୍ୟ ବିଶିଷ୍ଟ କମିଟି ସାକ୍ଷାତକାର ପ୍ରକ୍ରିୟା ଶେଷ କରି ତିନି ଜଣଙ୍କ ନାମ ଥିବା ପ୍ୟାନେଲ୍ ଟ୍ରଷ୍ଟ ନିକଟରେ ଦାଖଲ କରିସାରିଛି। ତେଣୁ ଆଜିର ବୈଠକରେ ଏହି ତାଲିକାରୁ ଜଣଙ୍କ ନାମ ଉପରେ ଚୂଡ଼ାନ୍ତ ମୋହର ଲାଗିପାରେ।
ବୈଠକରେ ପ୍ରସ୍ତାବିତ CEOଙ୍କ ଦାୟିତ୍ୱ ଓ କ୍ଷେତ୍ରାଧିକାର ସମ୍ପର୍କରେ ମଧ୍ୟ ଆଲୋଚନା ହେବ। ସାଧାରଣ ସମ୍ପାଦକ ଏବଂ CEOଙ୍କ ମଧ୍ୟରେ ଦାୟିତ୍ୱ ବଣ୍ଟନ, ପ୍ରଶାସନିକ କମିଟି ସହ ସମନ୍ୱୟ, ଅଧିକାରୀ ଓ କର୍ମଚାରୀଙ୍କ ନିଯୁକ୍ତି ଏବଂ କାର୍ଯ୍ୟ ବିଭାଜନ ଭଳି ବିଷୟରେ ନିୟମାବଳୀରେ ସଂଶୋଧନ ପାଇଁ ପ୍ରସ୍ତାବ ଆସିପାରେ। ଏହାଛଡ଼ା ଟ୍ରଷ୍ଟରେ ଖାଲି ପଡ଼ିଥିବା ତିନିଟି ପଦବୀ ପୂରଣ ନେଇ ମଧ୍ୟ ନିଷ୍ପତ୍ତି ହୋଇପାରେ। ପୂର୍ବତନ ଟ୍ରଷ୍ଟ ମହାସଚିବ ଚମ୍ପାତ ରାୟ ଓ ଟ୍ରଷ୍ଟି ଡ. ଅନିଲ ମିଶ୍ରଙ୍କ ଇସ୍ତଫା ପରେ ଦୁଇଟି ପଦବୀ ଖାଲି ଥିବାବେଳେ, ଟ୍ରଷ୍ଟି ବିମଳେନ୍ଦ୍ର ମୋହନ ପ୍ରତାପ ମିଶ୍ରଙ୍କ ମୃତ୍ୟୁ ପରେ ଆଉ ଗୋଟିଏ ପଦବୀ ଖାଲି ପଡ଼ିଛି।
ଏହା ସହିତ ଟ୍ରଷ୍ଟର ମୁଖପାତ୍ର ନିଯୁକ୍ତି, ବାର୍ଷିକ ହିସାବ, ମନ୍ଦିର ପରିଚାଳନା ବ୍ୟବସ୍ଥାର ସମୀକ୍ଷା ଓ ଉନ୍ନତି ଏବଂ ଭକ୍ତଙ୍କ ଦର୍ଶନ ବ୍ୟବସ୍ଥାକୁ ଆହୁରି ସୁବ୍ୟବସ୍ଥିତ କରିବା ନେଇ ଆଲୋଚନା ହେବ। ସୁପ୍ରିମକୋର୍ଟରେ ଦାଖଲ ହୋଇଥିବା ଏସ୍ଆଇଟି ରିପୋର୍ଟ ସମ୍ପର୍କରେ ମଧ୍ୟ ଟ୍ରଷ୍ଟ ବୈଠକରେ ଚର୍ଚ୍ଚା ହେବାର ସମ୍ଭାବନା ରହିଛି। ତେଣୁ ଆଜିର ବୈଠକରେ CEO ନିଯୁକ୍ତି ସହ ଟ୍ରଷ୍ଟର ଆଗାମୀ ପ୍ରଶାସନିକ ରୂପରେଖା ନେଇ କେଉଁ ନିଷ୍ପତ୍ତି ହେଉଛି, ତାହା ଉପରେ ସମସ୍ତଙ୍କ ନଜର ରହିବ।
