AIIMS Delhi: ୧୩ ବର୍ଷ ଧରି ଚିକିତ୍ସା ଅପେକ୍ଷାରେ ଥିବା ୧୫ ବର୍ଷୀୟା ନାବାଳିକାଙ୍କ ମୃତ୍ୟୁ; ଅସ୍ତ୍ରୋପଚାର ପାଇଁ ତାରିଖକୁ ବାରମ୍ବାର ବଦଳାଉଥିବା ଅଭିଯୋଗ
ରାଜସ୍ଥାନ: ରାଜସ୍ଥାନ କୋଟାର ୧୫ ବର୍ଷୀୟା ତନ୍ଭୀଙ୍କ ଦିଲ୍ଲୀ AIIMSରେ ମୃତ୍ୟୁ ହୋଇଛି। ଜନ୍ମଗତ ହୃଦ୍ରୋଗର ଜଟିଳ ସମସ୍ୟା ଯୋଗୁଁ ସେ ମାତ୍ର ୨ ବର୍ଷ ବୟସରୁ ଚିକିତ୍ସା ପାଇଁ AIIMS ଆସୁଥିଲେ। ମଙ୍ଗଳବାର ଭୋର୍ ସମୟରେ ହସ୍ପିଟାଲରେ ତାଙ୍କର ମୃତ୍ୟୁ ହୋଇଛି। ଏହାର ମାତ୍ର ୧୪ ଦିନ ପୂର୍ବରୁ ତାଙ୍କ ପରିବାରର ହୃଦ୍ରୋଗ ଅସ୍ତ୍ରୋପଚାର ପାଇଁ ଦୀର୍ଘ ଅପେକ୍ଷା ସମ୍ପର୍କରେ ଖବର ପ୍ରକାଶ ପାଇଥିଲା।
ତନ୍ଭୀ ପ୍ରାୟ ଦୁଇ ସପ୍ତାହ ପୂର୍ବରୁ AIIMSରେ ଭର୍ତ୍ତି ହୋଇଥିଲେ। ଅଗଷ୍ଟ ୧୮ରେ ପ୍ରକାଶିତ ରିପୋର୍ଟ ଅନୁଯାୟୀ, ସେ ୧୩ ବର୍ଷରୁ ଅଧିକ ସମୟ ଧରି AIIMSକୁ ବାରମ୍ବାର ଆସୁଥିଲେ। ତାଙ୍କ ବାପାଙ୍କ ଅଭିଯୋଗ ଥିଲା ଯେ, ଅସ୍ତ୍ରୋପଚାର ପାଇଁ ତାରିଖ ଧାର୍ଯ୍ୟ କରାଯାଉଥିଲା, ପରେ ତାହା ବଦଳାଇ ଦିଆଯାଉଥିଲା। ହେଲେ ତାଙ୍କର ହୃଦ୍ରୋଗ ସମସ୍ୟାର ସ୍ଥାୟୀ ସମାଧାନ ପାଇଁ ଆବଶ୍ୟକ ଅସ୍ତ୍ରୋପଚାର ହୋଇପାରିନଥିଲା।
ତନ୍ଭୀଙ୍କ ମୃତ୍ୟୁ ପରେ ତାଙ୍କ ପରିବାରର ଦୀର୍ଘ ଚିକିତ୍ସା ଅପେକ୍ଷା ଓ ଅସ୍ତ୍ରୋପଚାର ବିଳମ୍ବକୁ ନେଇ ପୁଣିଥରେ ପ୍ରଶ୍ନ ଉଠିଛି। ଦୀର୍ଘ ୧୩ ବର୍ଷ ଧରି ଚିକିତ୍ସା ପାଇଁ ହସ୍ପିଟାଲକୁ ଆସୁଥିବା ଜଣେ ନାବାଳିକାଙ୍କ ଚିକିତ୍ସା ଓ ଅସ୍ତ୍ରୋପଚାର କାହିଁକି ହୋଇପାରିଲା ନାହିଁ, ତାହା ଏବେ ଚର୍ଚ୍ଚାର ବିଷୟ ପାଲଟିଛି।
