Bengaluru Rescue: ଅନ୍ତଃଜାତି ବିବାହକୁ ନେଇ ଯୁବତୀଙ୍କୁ ଜୋର ଜବରଦସ୍ତି ନେଉଥିଲେ, ପିଛା କରିବା ବେଳେ ଏସ୍ୟୁଭି ଦୁର୍ଘଟଣାରେ ୬ ଆହତ
ବେଙ୍ଗାଲୁରୁ: ବେଙ୍ଗାଲୁରୁରେ ପରିବାର ଲୋକଙ୍କ ଇଚ୍ଛା ବିରୋଧରେ ପ୍ରେମ ବିବାହ କରିଥିବା ଜଣେ ୨୧ ବର୍ଷୀୟ ଯୁବତୀଙ୍କୁ ଜବରଦସ୍ତି ନେଇଯିବା ଉଦ୍ୟମ ବେଳେ ଘଟିଛି ଦୁର୍ଘଟଣା। ରାଜସ୍ଥାନର ପୂଜା ପ୍ରାୟ ୮ରୁ ୯ ମାସ ପୂର୍ବରୁ ଓମ୍ ପ୍ରକାଶଙ୍କୁ ବିବାହ କରି ବେଙ୍ଗାଲୁରୁରେ ରହୁଥିଲେ। ତାଙ୍କ ପରିବାର ଏହି ବିବାହକୁ ବିରୋଧ କରୁଥିବାରୁ ତାଙ୍କୁ ଫେରାଇ ନେବା ପାଇଁ ୪ ଜଣ ବ୍ୟକ୍ତି ପଠାଯାଇଥିବା ଅଭିଯୋଗ ହୋଇଛି।
ସୂଚନା ଅନୁସାରେ, ଏହି ବ୍ୟକ୍ତିମାନେ ପୂଜାଙ୍କୁ ଧରି ଏକ ଧଳା ହୁଣ୍ଡାଇ ଏସ୍ୟୁଭିରେ ନେଇ ଦ୍ରୁତ ଗତିରେ ପଳାଇଥିଲେ। ପୂଜାଙ୍କ ଚିତ୍କାର ଶୁଣି ସ୍ଥାନୀୟ ଲୋକେ ଗାଡ଼ିଟିର ପିଛା କରିଥିଲେ। ପଳାଇବା ଉଦ୍ୟମରେ ରାତି ପ୍ରାୟ ୮ଟା ସମୟରେ ଏସ୍ୟୁଭିଟି ଏକାଧିକ ଗାଡ଼ି ଓ ଦୁଇଚକିଆ ଯାନକୁ ଧକ୍କା ଦେଇଥିଲା। ଏଥିରେ ୬ ଜଣ ଆହତ ହୋଇଥିବା ବେଳେ ୯ ବର୍ଷୀୟା ଯଶିକା ଓ ୫୭ ବର୍ଷୀୟା ଜୟଲକ୍ଷ୍ମୀ ଗୁରୁତର ଆହତ ହୋଇ ଆଇସିୟୁରେ ଚିକିତ୍ସାଧୀନ ଥିବା ଜଣାପଡ଼ିଛି।
ଘଟଣା ପରେ ସ୍ଥାନୀୟ ଲୋକେ ପଥର ଫିଙ୍ଗି ଗାଡ଼ିଟିକୁ ଅଟକାଇବା ସହ ଭିତରେ ଥିବା ବ୍ୟକ୍ତିମାନଙ୍କୁ ବାହାରକୁ ଆଣିଥିଲେ। ପୂଜା ପରିବାର ଲୋକେ ତାଙ୍କ ଅନ୍ତଃଜାତି ବିବାହକୁ ବିରୋଧ କରୁଥିବା ପୁଲିସକୁ କହିଥିବା ସୂଚନା ମିଳିଛି। ଘଟଣାରେ ପୁଲିସ ୩ ଜଣଙ୍କୁ ଗିରଫ କରିଥିବା ବେଳେ ଗାଡ଼ି ଚାଳକ ଏବେ ମଧ୍ୟ ଫେରାର ଥିବା ଜଣାପଡ଼ିଛି। ଘଟଣାର ସମ୍ପୂର୍ଣ୍ଣ କାରଣ ଓ ଅଭିଯୋଗର ସତ୍ୟତା ନେଇ ପୁଲିସ ତଦନ୍ତ ଜାରି ରଖିଛି।
