SIR Voter Revision: ଭୋଟର ତାଲିକାରୁ ବଡ଼ ପରିମାଣରେ ନାଁ କଟା ଯାଇଥିବା ଅଭିଯୋଗ, ଗୃହମନ୍ତ୍ରୀ ଅମିତ ଶାହଙ୍କୁ ଜୟରାମ ରମେଶଙ୍କ ଟାର୍ଗେଟ୍
ନୂଆଦିଲ୍ଲୀ: କଂଗ୍ରେସ ନେତା ଜୟରାମ ରମେଶ ନିର୍ବାଚନ ଆୟୋଗର ଚାଲିଥିବା Special Intensive Revision (SIR) ପ୍ରକ୍ରିୟାକୁ ନେଇ ଗୁରୁତର ଅଭିଯୋଗ ଆଣିଛନ୍ତି। ସେ SIRକୁ “Shah Instigated Removal” ବୋଲି ଅଭିହିତ କରି ଭୋଟର ତାଲିକାରୁ ବଡ଼ ପରିମାଣରେ ନାଁ କଟାଯାଉଥିବା ଦାବି କରିଛନ୍ତି। ତାଙ୍କ ଅନୁସାରେ, ପ୍ରଥମ ଦୁଇଟି ପର୍ଯ୍ୟାୟରେ ୭.୮ କୋଟି ଭୋଟରଙ୍କ ନାଁ ହଟାଯାଇଛି।
ରମେଶଙ୍କ ଦାବି ଅନୁସାରେ, ତୃତୀୟ ପର୍ଯ୍ୟାୟରେ ୧୨ଟି ରାଜ୍ୟ ଓ ୨ଟି କେନ୍ଦ୍ରଶାସିତ ଅଞ୍ଚଳର ତଥ୍ୟ ଆଧାରରେ ୩୬.୦୬ କୋଟି ଭୋଟରଙ୍କ ମଧ୍ୟରୁ ୬.୧୮ କୋଟି ନାଁ ହଟାଯାଇଛି। ଏହା ସହ ଆହୁରି ୫.୪୩ କୋଟି ଭୋଟରଙ୍କୁ ଅତିରିକ୍ତ ଦଲିଲ ଦାଖଲ କରିବା ପାଇଁ ନୋଟିସ୍ ଦିଆଯାଇଥିବା ସେ କହିଛନ୍ତି। ରମେଶଙ୍କ ଅଭିଯୋଗ ହେଉଛି, ଏହି ପ୍ରକ୍ରିୟାର ପ୍ରଭାବ ଆର୍ଥିକ ଓ ସାମାଜିକ ଭାବେ ଦୁର୍ବଳ ବର୍ଗ ଉପରେ ଅଧିକ ପଡ଼ୁଛି।
ତେବେ ନିର୍ବାଚନ ଆୟୋଗର ମତ ଭିନ୍ନ। ଆୟୋଗ କହିଛି, SIRର ଉଦ୍ଦେଶ୍ୟ ହେଉଛି ଭୋଟର ତାଲିକାକୁ ସଠିକ୍ କରିବା, ଅଯୋଗ୍ୟ, ମୃତ, ଡୁପ୍ଲିକେଟ୍ ଏବଂ ସ୍ଥାନାନ୍ତରିତ ଭୋଟରଙ୍କ ନାଁ ଚିହ୍ନଟ କରିବା ସହ ଯୋଗ୍ୟ ଭୋଟରଙ୍କୁ ତାଲିକାରେ ସାମିଲ କରିବା। ତେଣୁ SIRକୁ ନେଇ କଂଗ୍ରେସର ଅଭିଯୋଗ ଓ ନିର୍ବାଚନ ଆୟୋଗର ବ୍ୟାଖ୍ୟା ମଧ୍ୟରେ ମତଭେଦ ଜାରି ରହିଛି।
