Greater Noida Thar Accident: ଥାର୍ ଧକ୍କାରେ ଆଇନଜୀବୀଙ୍କ ମୃତ୍ୟୁ, ପତ୍ନୀ କୋମାରେ; ୧୮ଟି ଫ୍ରାକ୍ଚର ହୋଇଥିବା ଦାବି
ଉତ୍ତରପ୍ରଦେଶ: ଗ୍ରେଟର ନୋଏଡା ୱେଷ୍ଟରେ ଦ୍ରୁତଗତିରେ ଆସୁଥିବା ଏକ ଥାର୍ ସ୍କୁଟରକୁ ଧକ୍କା ଦେବା ପରେ ଜଣେ ୪୦ ବର୍ଷୀୟ ଆଇନଜୀବୀଙ୍କ ମୃତ୍ୟୁ ହୋଇଛି। ଦୁର୍ଘଟଣା ସମୟରେ ନୀରଜ ତାଙ୍କ ପତ୍ନୀଙ୍କ ସହ ସ୍କୁଟରରେ ଯାଉଥିଲେ। ଇଟେରା ଅଞ୍ଚଳ ନିକଟରେ ଘଟିଥିବା ଏହି ଦୁର୍ଘଟଣାରେ ଧକ୍କା ଏତେ ଜୋରଦାର ଥିଲା ଯେ ଦମ୍ପତି ସ୍କୁଟରରୁ ଛିଟିକି ପଡ଼ିଥିଲେ। ସ୍ଥାନୀୟ ଲୋକ ଓ ପୁଲିସ ଆହତ ଦମ୍ପତିଙ୍କୁ ହସ୍ପିଟାଲ ନେଇଥିଲେ, ଯେଉଁଠାରେ ଡାକ୍ତର ନୀରଜଙ୍କୁ ମୃତ ଘୋଷଣା କରିଥିଲେ।
ଦୁର୍ଘଟଣା ପରେ ଥାର୍ର ଚାଳକ ଗାଡ଼ି ଛାଡ଼ି ଘଟଣାସ୍ଥଳରୁ ଫେରାର ହୋଇଥିବା ପୁଲିସ ସୂଚନା ଦେଇଛି। ନୀରଜଙ୍କ ବଡ଼ ଭାଇ ଅମିତ କୁମାରଙ୍କ ଅଭିଯୋଗ ଅନୁସାରେ, ଥାର୍ଟି ଭୁଲ୍ ପାର୍ଶ୍ୱରୁ ଅତ୍ୟଧିକ ବେଗରେ ଆସି ସ୍କୁଟରକୁ ଧକ୍କା ଦେଇଥିଲା। ଥାର୍ରେ ଥିବା ଲୋକମାନେ ମଦ୍ୟପାନ କରିଥିବା ନେଇ କିଛି ପ୍ରତ୍ୟକ୍ଷଦର୍ଶୀ ଦାବି କରିଥିବା କଥା ମଧ୍ୟ ସେ କହିଛନ୍ତି। ତେବେ ଏହି ଦାବିଗୁଡ଼ିକର ସତ୍ୟତା ପୁଲିସ ତଦନ୍ତ ପରେ ସ୍ପଷ୍ଟ ହେବ।
ନୀରଜଙ୍କ ପତ୍ନୀଙ୍କ ଅବସ୍ଥା ଗୁରୁତର ଥିବା ତାଙ୍କ ପରିବାର କହିଛି। ଅମିତଙ୍କ ଅନୁସାରେ, ସେ କୋମାରେ ଅଛନ୍ତି ଏବଂ ତାଙ୍କ ଶରୀରର ବାମ ପାର୍ଶ୍ୱ ପ୍ରଭାବିତ ହୋଇଛି। ପରିବାର ପକ୍ଷରୁ ତାଙ୍କର ୧୮ଟି ଫ୍ରାକ୍ଚର ହୋଇଥିବା, ପେଲଭିକ୍ ଅଞ୍ଚଳରେ ଗୁରୁତର ଆଘାତ ଲାଗିଥିବା ଏବଂ ଏକାଧିକ ଅସ୍ତ୍ରୋପଚାର ହୋଇଥିବା ଦାବି କରାଯାଇଛି। ଏପଟେ ପୁଲିସ ଥାର୍କୁ ଜବତ କରି ଚାଳକଙ୍କ ସନ୍ଧାନ ଜାରି ରଖିଛି ଏବଂ ପରିବାରର ସୂଚନା ଆଧାରରେ ମାମଲାରେ ଆଇନଗତ ପଦକ୍ଷେପ ନିଆଯାଉଛି।
