Mercury: ଆଗରୁ ଅନୁମାନଠାରୁ ଅଧିକ ବେଗରେ ସଙ୍କୁଚିତ ହେଉଛି ବୁଧ ଗ୍ରହ, ୧୯ କିମି ଛୋଟ ହୋଇଥିବା ଦାବି
ବୁଧ ଗ୍ରହ ସମ୍ପର୍କରେ ନୂଆ ଗବେଷଣାରୁ ଏକ ରୋଚକ ତଥ୍ୟ ସାମ୍ନାକୁ ଆସିଛି। ବୈଜ୍ଞାନିକଙ୍କ ଅନୁସାରେ, ବୁଧ ଗ୍ରହ ଆଗରୁ ଅନୁମାନ କରାଯାଇଥିବା ବେଗଠାରୁ ପ୍ରାୟ ୧୦ରୁ ୩୦ ପ୍ରତିଶତ ଅଧିକ ବେଗରେ ସଙ୍କୁଚିତ ହେଉଛି। ଗବେଷଣା ଅନୁଯାୟୀ, ଗ୍ରହଟି ଗଠନ ହେବା ସମୟର ଆକାର ତୁଳନାରେ ବର୍ତ୍ତମାନ ପ୍ରାୟ ୧୯ କିଲୋମିଟର ଛୋଟ ହୋଇସାରିଛି। ଏତେ ବେଗରେ ବୁଧ ସଙ୍କୁଚିତ ହେଉଥିବା ତଥ୍ୟ ପୂର୍ବରୁ ସ୍ପଷ୍ଟ ଭାବେ ଜଣାପଡ଼ିନଥିଲା।
ବୁଧ ଗ୍ରହର ପୃଷ୍ଠଭାଗରେ ଥିବା ବିଶାଳ ଗର୍ତ୍ତଗୁଡ଼ିକ ଯୋଗୁଁ ଏହି ପରିବର୍ତ୍ତନକୁ ଚିହ୍ନଟ କରିବା କଷ୍ଟକର ହୋଇଥିଲା ବୋଲି ଗବେଷଣାରେ କୁହାଯାଇଛି। ମହାକାଶରୁ ଆସୁଥିବା ଅନେକ ଉଲ୍କାପିଣ୍ଡ ଓ ପଥର ବୁଧରେ ଧକ୍କା ଦେବାରୁ ଏହାର ପୃଷ୍ଠରେ ବଡ଼ ବଡ଼ ଗର୍ତ୍ତ ସୃଷ୍ଟି ହୋଇଛି। ତେବେ ବୁଧର ଭିତର ଅଂଶ କିପରି ଗଠିତ ହୋଇଛି ଏବଂ ସେଥିରେ କେଉଁ ଉପାଦାନ କେତେ ପରିମାଣରେ ରହିଛି, ତାହା ଜାଣିବା ଏହି ସଙ୍କୁଚନର ପ୍ରକୃତ କାରଣ ବୁଝିବାରେ ଗୁରୁତ୍ୱପୂର୍ଣ୍ଣ।
ବୈଜ୍ଞାନିକମାନଙ୍କ ମତରେ, ପ୍ରାୟ ୪୫୦ କୋଟି ବର୍ଷ ପୂର୍ବେ ବଡ଼ ବଡ଼ ପଥର ଓ ଗ୍ରହାଣୁ ପରସ୍ପର ସହ ଧକ୍କା ଖାଇ ଏକତ୍ରିତ ହେବା ପରେ ବୁଧ ଗ୍ରହ ଗଠିତ ହୋଇଥିଲା। ଏହି ଧକ୍କା ଯୋଗୁଁ ଗ୍ରହଟିର ଭିତର ଅଂଶ ଅତ୍ୟଧିକ ଗରମ ହୋଇଥିଲା। ପରେ ଧୀରେ ଧୀରେ ଏହା ଥଣ୍ଡା ହେବା ସହ ଭିତର ଅଂଶ ସଙ୍କୁଚିତ ହୋଇଥିଲା ଏବଂ ଏହାର ପ୍ରଭାବ ବୁଧର ପଥୁରିଆ ପୃଷ୍ଠରେ ମଧ୍ୟ ଦେଖାଯାଇଥିଲା। ଜର୍ମାନ୍ ଏରୋସ୍ପେସ୍ ସେଣ୍ଟରର ଇନ୍ଷ୍ଟିଚ୍ୟୁଟ୍ ଅଫ୍ ସ୍ପେସ୍ ରିସର୍ଚ୍ଚର ଟିମ୍ ଲିଡର୍ ଗାକୁ ନିସିୟାମାଙ୍କ ଅନୁସାରେ, ବୁଧ ଅଧିକ ସଙ୍କୁଚିତ ହେବାର ଅର୍ଥ ଏହାର ଭିତରେ ଅଧିକ ଧାତୁ ଥାଇପାରେ। ଏହି ଧାତୁ ସହ ସିଲିକନ୍ ଭଳି ହାଲୁକା ଉପାଦାନ ମିଶିଥିବା ସମ୍ଭାବନା ମଧ୍ୟ ରହିଛି। ତେବେ ଗ୍ରହ ଗଠନ ସମୟରେ ଏହାର ଭିତର ଅତ୍ୟଧିକ ଗରମ ରହିଥିବା ମଧ୍ୟ ଏହି ସଙ୍କୁଚନର ଏକ କାରଣ ହୋଇପାରେ।
