Ahmedabad School Case: ‘I Love You’ ଚିଠିକୁ ନେଇ ୪ର୍ଥ ଶ୍ରେଣୀ ଛାତ୍ରଙ୍କୁ ମାଡ଼ ଅଭିଯୋଗ, ୨୫ ଲକ୍ଷ ଦାବି ନେଇ ସ୍କୁଲର ପାଲଟା ଅଭିଯୋଗ
ଗୁଜରାଟ: ଗୁଜରାଟର ଅହମଦାବାଦରେ ୪ର୍ଥ ଶ୍ରେଣୀର ଜଣେ ଛାତ୍ରଙ୍କୁ ସ୍କୁଲ ଶିକ୍ଷକ ଓ ପ୍ରିନ୍ସିପାଲ୍ ମାଡ଼ ମାରିଥିବା ଅଭିଯୋଗକୁ ନେଇ ବିବାଦ ଦେଖାଦେଇଛି। ସେପ୍ଟେମ୍ବର ୧୯ରେ ଛାତ୍ର ଜଣେ ସହପାଠୀ ଛାତ୍ରୀଙ୍କୁ ‘I Love You’ ଲେଖା ଏକ ହାତଲେଖା ଚିଠି ଦେଇଥିବା ଅଭିଯୋଗ ହୋଇଥିଲା। ଛାତ୍ରୀ ଏହି ଚିଠି ଶିକ୍ଷକଙ୍କୁ ଦେବା ପରେ ଘଟଣାଟି ସ୍କୁଲ କର୍ତ୍ତୃପକ୍ଷଙ୍କ ନଜରକୁ ଆସିଥିଲା। ଛାତ୍ରୀ କାନ୍ଦୁଥିବା ସହ କିଛି ଛାତ୍ର ତାଙ୍କୁ ବାରମ୍ବାର ହଇରାଣ କରୁଥିବା ସ୍କୁଲ ପକ୍ଷରୁ କୁହାଯାଇଛି।
ସ୍କୁଲ ପକ୍ଷର ଦାବି ଅନୁସାରେ, ଶିକ୍ଷୟିତ୍ରୀ ସୀମା ଗୋସ୍ୱାମୀ ପ୍ରଥମେ ଚିଠିଟି ଫାଡ଼ି ଛାତ୍ରଙ୍କୁ ବୁଝାଇଥିଲେ। ପରେ ଛାତ୍ରୀ ଅସ୍ୱସ୍ଥ ରହିବାରୁ ମାମଲାଟି ପ୍ରିନ୍ସିପାଲ୍ଙ୍କ ପାଖକୁ ଯାଇଥିଲା ଏବଂ ଛାତ୍ରଙ୍କ ମା’ଙ୍କୁ ସ୍କୁଲକୁ ଡକାଯାଇଥିଲା। ତେବେ ପରିବାର ପକ୍ଷରୁ ଛାତ୍ରଙ୍କୁ ମାଡ଼ ମାରି ଶରୀରରେ ଆଘାତ କରାଯାଇଥିବା ଅଭିଯୋଗ ହୋଇଛି। ପରିବାର ରାମୋଲ ଥାନାରେ ଅଭିଯୋଗ କରିବା ପରେ ପୁଲିସ ଶିକ୍ଷୟିତ୍ରୀ ଓ ସ୍କୁଲ ପ୍ରିନ୍ସିପାଲ୍ଙ୍କ ବିରୋଧରେ ମାମଲା ରୁଜୁ କରିଛି। ଅଭିଯୋଗ ପରେ ଶିକ୍ଷୟିତ୍ରୀଙ୍କୁ ତଦନ୍ତ ଶେଷ ହେବା ପର୍ଯ୍ୟନ୍ତ ନିଲମ୍ବିତ କରାଯାଇଥିବା ସ୍କୁଲ ପକ୍ଷରୁ କୁହାଯାଇଛି।
ଅନ୍ୟପକ୍ଷରେ, ସ୍କୁଲ ନିର୍ଦ୍ଦେଶକ ଇନ୍ଦ୍ରଜିତ ମୌର୍ଯ୍ୟ ମାଡ଼ ମାରିବା ଅଭିଯୋଗକୁ ଖଣ୍ଡନ କରିଛନ୍ତି। ତାଙ୍କ ଦାବି, ସିସିଟିଭି ଫୁଟେଜ୍ରେ ଛାତ୍ର ଆଡମିନିଷ୍ଟ୍ରେଟିଭ୍ ଅଫିସ୍ରୁ ସ୍ୱାଭାବିକ ଭାବେ ବାହାରି କରିଡରରେ ଦୌଡ଼ୁଥିବା ଦେଖାଯାଉଛି। ଏହାସହ ପରିବାର ମାମଲାକୁ ପୁଲିସ ପାଖକୁ ନନେବା ପାଇଁ ପ୍ରଥମେ ୨୫ ଲକ୍ଷ ଟଙ୍କା ଏବଂ ପରେ ୫ ଲକ୍ଷ ଟଙ୍କା ଦାବି କରିଥିବା ସେ ଅଭିଯୋଗ କରିଛନ୍ତି। ପରିବାର ଏହି ଦାବିକୁ ଖଣ୍ଡନ କରିଥିବା ଅନ୍ୟ ରିପୋର୍ଟରେ ଉଲ୍ଲେଖ ରହିଛି। ପୁଲିସର ପ୍ରାଥମିକ ମେଡିକାଲ୍ ଯାଞ୍ଚରେ ଗୁରୁତର ଶାରୀରିକ ଆଘାତ ମିଳିନଥିବା କୁହାଯାଇଛି। ଏବେ ସିସିଟିଭି ଫୁଟେଜ୍, ସ୍କୁଲ ରେକର୍ଡ ଓ ଛାତ୍ର-ଶିକ୍ଷକଙ୍କ ବୟାନ ଯାଞ୍ଚ କରି ପୁଲିସ ଘଟଣାର ପ୍ରକୃତ ତଥ୍ୟ ଖୋଜୁଛି।
