Hyderabad Tank Bund Accident: ଗଣେଶ ବିସର୍ଜନ ଡ୍ୟୁଟିରେ ଅଘଟଣ, SIଙ୍କୁ ଧକ୍କା ଦେଇ ଚାଲିଗଲେ ସ୍କୁଟର ଆରୋହୀ
ହାଇଦ୍ରାବାଦ: ହାଇଦ୍ରାବାଦର ଟ୍ୟାଙ୍କ ବଣ୍ଡରେ ଗଣେଶ ମୂର୍ତ୍ତି ବିସର୍ଜନ ଡ୍ୟୁଟିରେ ନିୟୋଜିତ ଥିବା ଜଣେ ପୁଲିସ ସବ୍-ଇନ୍ସପେକ୍ଟରଙ୍କ ସଡ଼କ ଦୁର୍ଘଟଣାରେ ମୃତ୍ୟୁ ହୋଇଛି। ମୃତ SIଙ୍କୁ ୫୫ ବର୍ଷୀୟ କେ. ଭେଙ୍କନ୍ନା ଭାବେ ଚିହ୍ନଟ କରାଯାଇଛି। ସେ କୋଥାଗୁଡେମ୍ ଟୁ ଟାଉନ୍ ପୁଲିସ ଷ୍ଟେସନରେ କାର୍ଯ୍ୟରତ ଥିଲେ। ଗଣେଶ ବିସର୍ଜନ ବ୍ୟବସ୍ଥା ପାଇଁ ତାଙ୍କୁ ହାଇଦ୍ରାବାଦରେ ଡ୍ୟୁଟିରେ ନିୟୋଜିତ କରାଯାଇଥିଲା।
ପୁଲିସ ସୂଚନା ଅନୁଯାୟୀ, ଟ୍ୟାଙ୍କ ବଣ୍ଡରେ ରାସ୍ତା ପାର ହେଉଥିବା ସମୟରେ ଏକ ଦ୍ରୁତଗତିରେ ଆସୁଥିବା ସ୍କୁଟର ଭେଙ୍କନ୍ନାଙ୍କୁ ଧକ୍କା ଦେଇଥିଲା। ଦୁର୍ଘଟଣା ପରେ ସେ ଗୁରୁତର ଆହତ ହୋଇଥିଲେ। ତାଙ୍କୁ ତୁରନ୍ତ ହସ୍ପିଟାଲକୁ ନିଆଯାଇ ଚିକିତ୍ସା କରାଯାଇଥିଲେ ମଧ୍ୟ ଆହତ ଅବସ୍ଥାରେ ତାଙ୍କର ମୃତ୍ୟୁ ହୋଇଥିବା କୋଥାଗୁଡେମ୍ ପୁଲିସ କହିଛି।
ଦୁର୍ଘଟଣା ପରେ ସ୍କୁଟରରେ ଥିବା ଆରୋହୀମାନେ ଘଟଣାସ୍ଥଳରେ ନ ରହି ସେଠାରୁ ଚାଲିଯାଇଥିବା ଅଭିଯୋଗ ହୋଇଛି। ଘଟଣାର CCTV ଫୁଟେଜ୍ ଆଧାରରେ ଅଭିଯୁକ୍ତଙ୍କୁ ଚିହ୍ନଟ କରିବାକୁ ପୁଲିସ ତଦନ୍ତ ଚଳାଇଛି। ଅଭିଯୁକ୍ତମାନେ ବର୍ତ୍ତମାନ ଫେରାର ଥିବା ବେଳେ ଘଟଣା ସମ୍ପର୍କରେ ଅଧିକ ତଦନ୍ତ ଜାରି ରହିଛି।
