ଲଣ୍ଡନ ଚାକିରି ନାଁରେ ଠକେଇ: ଶ୍ୱଶୁରଙ୍କଠାରୁ୧୫.୫୯ ଲକ୍ଷ ନେଇ ବୋହୂ ଫେରାର ଅଭିଯୋଗ
ଅହମଦାବାଦ: ଅହମଦାବାଦର ଇସନପୁର ଅଞ୍ଚଳରେ ଲଣ୍ଡନରେ ଚାକିରି ଦେବା ନାଁରେ ୧୫.୫୯ ଲକ୍ଷ ଟଙ୍କାର କଥିତ ଠକେଇ ଅଭିଯୋଗ ସାମ୍ନାକୁ ଆସିଛି। ଅଭିଯୋଗ ଅନୁସାରେ, ଜଣେ ମହିଳା ନିଜ ଶ୍ୱଶୁରଘର ଲୋକଙ୍କୁ ଲଣ୍ଡନରେ ଚାକିରି ମିଳିବା ସହ ପରେ ସ୍ୱାମୀଙ୍କୁ ମଧ୍ୟ ବିଦେଶ ନେବାର ଭରସା ଦେଇଥିଲେ। ଏଥିପାଇଁ ପରିବାର ଘର ବନ୍ଧକ ରଖି ଋଣ ନେବା ସହ ଜିପିଏଫ୍ରୁ ମଧ୍ୟ ଟଙ୍କା ଉଠାଇଥିଲେ।
ଅଭିଯୋଗ ରହିଛି ଯେ, ବିଦେଶ ଯିବା ପାଇଁ ମହିଳା ଜଣକ ପରିବାରଠାରୁ ବିଭିନ୍ନ ଉପାୟରେ ଲକ୍ଷ ଲକ୍ଷ ଟଙ୍କା ନେଇଥିଲେ। ଏହା ମଧ୍ୟରୁ କିଛି ଟଙ୍କା ତାଙ୍କ ନିଜ ଆକାଉଣ୍ଟ ଏବଂ ଜଣେ ବନ୍ଧୁଙ୍କ ଆକାଉଣ୍ଟକୁ ଟ୍ରାନ୍ସଫର କରାଯାଇଥିବା ଅଭିଯୋଗ ହୋଇଛି। ଲଣ୍ଡନରେ ଚାକିରି ମିଳିବା ପରେ ସ୍ୱାମୀଙ୍କୁ ମଧ୍ୟ ସେଠାକୁ ନେବାକୁ କୁହାଯାଇଥିଲା ବୋଲି ପରିବାର ପକ୍ଷରୁ ଅଭିଯୋଗ କରାଯାଇଛି।
ଅଭିଯୋଗ ଅନୁସାରେ, ସେପ୍ଟେମ୍ବର ୧୨ ତାରିଖରେ ମହିଳା ଘରକୁ ଫେରିନଥିଲେ। ତାଙ୍କ ସହ ତାଙ୍କ ବନ୍ଧୁଙ୍କ ଫୋନ୍ ମଧ୍ୟ ବନ୍ଦ ମିଳିବା ପରେ ପରିବାରର ସନ୍ଦେହ ବଢ଼ିଥିଲା। ଏହାପରେ ମହିଳାଙ୍କ ସ୍ୱାମୀ ଇସନପୁର ଥାନାରେ ପତ୍ନୀ ଏବଂ ତାଙ୍କ ବନ୍ଧୁଙ୍କ ବିରୋଧରେ ଠକେଇ ଓ ବିଶ୍ୱାସଭଙ୍ଗ ଅଭିଯୋଗରେ ମାମଲା ରୁଜୁ କରିଛନ୍ତି। ପୁଲିସ ଘଟଣାର ତଦନ୍ତ ଜାରି ରଖିଛି।
