CEC Resignation: ଜୋର ଧରିଲା CEC ଜ୍ଞାନେଶ କୁମାରଙ୍କ ଇସ୍ତଫା ଦାବି, ଦିଲ୍ଲୀରୁ ବେଙ୍ଗଲ ପର୍ଯ୍ୟନ୍ତ ପ୍ରତିବାଦ
ନୂଆଦିଲ୍ଲୀ: Special Intensive Revision (SIR)କୁ ନେଇ ଚାଲିଥିବା ରାଜନୈତିକ ବିବାଦ ମଧ୍ୟରେ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ଦେଶର ବିଭିନ୍ନ ସହରରେ ବିକ୍ଷୋଭ ଦେଖିବାକୁ ମିଳିଛି । କଂଗ୍ରେସ ସମେତ ବିଭିନ୍ନ ବିରୋଧୀ ଦଳର ନେତା ଓ କର୍ମୀମାନେ ନିର୍ବାଚନ କମିଶନଙ୍କ କାର୍ଯ୍ୟାଳୟ ଅଭିମୁଖେ ମାର୍ଚ୍ଚ କରିଥିଲେ। ଦିଲ୍ଲୀ, ପାଟନା, ଚଣ୍ଡିଗଡ଼, ଲକ୍ଷ୍ନୌ, ଗୁଆହାଟୀ, ଶ୍ରୀନଗର, ଜମ୍ମୁ, ଡେରାଡୁନ ଓ ଅନ୍ୟାନ୍ୟ ସହରରେ ଏଭଳି ପ୍ରତିବାଦ ଦେଖିବାକୁ ମିଳିଥିଲା। କେତେକ ସ୍ଥାନରେ ପୁଲିସ ବିକ୍ଷୋଭକାରୀଙ୍କୁ ଅଟକାଇବା ପାଇଁ ପାଣିମାଡ଼ କରିଥିବା ଏବଂ କିଛି ନେତା ଓ କର୍ମୀଙ୍କୁ ଅଟକ ରଖିଥିବା ରିପୋର୍ଟ ଆସିଛି।
ଦିଲ୍ଲୀରେ ନିର୍ବାଚନ କମିଶନ କାର୍ଯ୍ୟାଳୟ ଅଭିମୁଖେ ଯାଉଥିବା ବିକ୍ଷୋଭକାରୀଙ୍କୁ ପୁଲିସ ଅଟକାଇଥିଲା। ପାଟନା ଓ ଚଣ୍ଡିଗଡ଼ରେ ମଧ୍ୟ ପ୍ରତିବାଦ ସମୟରେ ପୁଲିସ ପାଣିମାଡ଼ କରିଥିବା ଖବର ମିଳିଛି। ଆସାମରେ କଂଗ୍ରେସ ନେତା ଗୌରବ ଗୋଗୋଇଙ୍କୁ ପୁଲିସ ଅଟକ ରଖିଥିବା ବେଳେ, ମଣିପୁରରେ ବିକ୍ଷୋଭକାରୀ ଓ ପୁଲିସ ମଧ୍ୟରେ ଧସ୍ତାଧସ୍ତି ପରେ ଟିୟର ଗ୍ୟାସ୍ ବ୍ୟବହାର ହୋଇଥିବା ରିପୋର୍ଟ ରହିଛି। ଓଡ଼ିଶାର ଭୁବନେଶ୍ୱରରେ ମଧ୍ୟ କଂଗ୍ରେସ କର୍ମୀମାନେ ମୁଖ୍ୟ ନିର୍ବାଚନ ଅଧିକାରୀଙ୍କ କାର୍ଯ୍ୟାଳୟ ଘେରାଉ ଉଦ୍ୟମ କରିଥିବା ଏବଂ କିଛି ବିକ୍ଷୋଭକାରୀଙ୍କୁ ପୁଲିସ ଅଟକ ରଖିଥିବା ରିପୋର୍ଟ ଆସିଛି।
ଏହି ବିକ୍ଷୋଭଗୁଡ଼ିକ SIR ପ୍ରକ୍ରିୟାକୁ ନେଇ ନିର୍ବାଚନ କମିଶନର କାର୍ଯ୍ୟପ୍ରଣାଳୀ ସମ୍ପର୍କରେ ବିରୋଧୀ ଦଳଗୁଡ଼ିକ ଉଠାଇଥିବା ପ୍ରଶ୍ନ ପରେ ହୋଇଛି। ବିରୋଧୀ ଦଳଗୁଡ଼ିକ ଜ୍ଞାନେଶ କୁମାରଙ୍କ ଇସ୍ତଫା ଓ SIR ସମ୍ପର୍କିତ ନିଷ୍ପତ୍ତିର ଯାଞ୍ଚ ଦାବି କରୁଛନ୍ତି। ଅନ୍ୟପକ୍ଷରେ ନିର୍ବାଚନ କମିଶନ କହିଛି ଯେ ଆଭ୍ୟନ୍ତରୀଣ ପ୍ରଶ୍ନ, ଟିପ୍ପଣୀ ଓ ମତଭେଦ ଏକ ବହୁସଦସ୍ୟ ବିଶିଷ୍ଟ ସଂସ୍ଥାର ସାଧାରଣ ଆଲୋଚନା ପ୍ରକ୍ରିୟାର ଅଂଶ ଏବଂ SIR ସମ୍ପର୍କିତ ଅନ୍ତିମ ନିଷ୍ପତ୍ତିଗୁଡ଼ିକ ସର୍ବସମ୍ମତିରେ ନିଆଯାଇଛି।
