LPU University: ଅଶାନ୍ତି ପରେ ୧୦ ଦିନ ପାଇଁ କ୍ଲାସ୍ ବନ୍ଦ, ମିଡ୍-ଟର୍ମ ପରୀକ୍ଷା ସ୍ଥଗିତ
ପଞ୍ଜାବ: ପଞ୍ଜାବର ଫଗୱାରାସ୍ଥିତ Lovely Professional University (LPU)ରେ ଛାତ୍ର ଅଶାନ୍ତିକୁ ନେଇ ବଡ଼ ନିଷ୍ପତ୍ତି ନିଆଯାଇଛି। କ୍ୟାମ୍ପସରେ ଜଣେ ଛାତ୍ରୀଙ୍କ ସହ ଯୌନ ଅପରାଧ ଘଟିଥିବା ନେଇ ସୋସିଆଲ ମିଡିଆରେ ଦାବି ପରେ ବ୍ୟାପକ ପ୍ରତିବାଦ ଦେଖାଦେଇଥିଲା। ଘଟଣାର ସତ୍ୟତା ନେଇ ପୁଲିସର ତଦନ୍ତ ଜାରି ରହିଛି। ଏହି ପରିସ୍ଥିତିରେ LPU ସେପ୍ଟେମ୍ବର ୨୮ରୁ ୧୦ ଦିନ ପାଇଁ ନିୟମିତ କ୍ଲାସ୍ ବନ୍ଦ ରଖିବା ସହ ମିଡ୍-ଟର୍ମ ପରୀକ୍ଷାକୁ ପରବର୍ତ୍ତୀ ସୂଚନା ପର୍ଯ୍ୟନ୍ତ ସ୍ଥଗିତ କରିଛି। ନୂଆ ପରୀକ୍ଷା ସୂଚୀ University Management System (UMS) ମାଧ୍ୟମରେ ଜଣାଇ ଦିଆଯିବ।
ବିଶ୍ୱବିଦ୍ୟାଳୟ ପକ୍ଷରୁ ଛାତ୍ରଛାତ୍ରୀଙ୍କୁ ଏହି ୧୦ ଦିନ ମଧ୍ୟରେ ଅଭିଭାବକଙ୍କ ସହ ପରାମର୍ଶ କରି ନିଜ ଘରକୁ ଯିବାର ଅନୁମତି ଦିଆଯାଇଛି। ଯେଉଁମାନେ କ୍ୟାମ୍ପସରେ ରହିବେ, ସେମାନଙ୍କୁ ହଷ୍ଟେଲ କିମ୍ବା ନିଜ ବାସସ୍ଥାନରେ ରହିବା ଏବଂ ଅଶାନ୍ତି ସହ ଜଡ଼ିତ କାର୍ଯ୍ୟକଳାପରୁ ଦୂରେଇ ରହିବାକୁ କୁହାଯାଇଛି। ଅନ୍ୟପକ୍ଷରେ, ପ୍ରତିବାଦ ସମୟରେ ଜାଲନ୍ଧର-ଫଗୱାରା ନ୍ୟାସନାଲ ହାଇୱେରେ ଛାତ୍ରମାନେ କରିଥିବା ଅବରୋଧ ପରେ ଯାତାୟାତ ପୁଣି ସ୍ୱାଭାବିକ ହୋଇଛି। ସୁରକ୍ଷା ଦୃଷ୍ଟିରୁ LPU ବାହାରେ ପୁଲିସ ମୁତୟନ ରହିଛି।
ଘଟଣାକୁ ନେଇ ପୁଲିସ ତଦନ୍ତ ଆରମ୍ଭ କରିଛି ଏବଂ ଛାତ୍ରୀଙ୍କ ଅଭିଯୋଗ ଆଧାରରେ ଅଜଣା ବ୍ୟକ୍ତିଙ୍କ ବିରୋଧରେ ମାମଲା ରୁଜୁ ହୋଇଥିବା ରିପୋର୍ଟ ଆସିଛି। ପୁଲିସ ପକ୍ଷରୁ ଘଟଣାର ଫରେନସିକ୍, CCTV ଓ ଫୋନ୍ ତଥ୍ୟ ଯାଞ୍ଚ କରାଯିବ ବୋଲି କୁହାଯାଇଛି। ସେହିପରି, LPU ପୂର୍ବରୁ ସୋସିଆଲ ମିଡିଆରେ ପ୍ରଚାରିତ ଦାବିକୁ ମିଥ୍ୟା ଓ ବିଭ୍ରାନ୍ତିକର ବୋଲି କହିଥିଲା। ପରେ କିଛି ଛାତ୍ର ଏକ ଭିଡିଓରେ ସେମାନଙ୍କୁ ବୟାନ ଦେବାକୁ ନିର୍ଦ୍ଦେଶ ଦିଆଯାଇଥିବା ଅଭିଯୋଗ କରିଥିଲେ। ଏହି ସମସ୍ତ ଦାବି ଓ ପ୍ରତିଦାବି ମଧ୍ୟରେ ପୁଲିସ ତଦନ୍ତ ଶେଷ ହୋଇନଥିବାରୁ ଅଧିକ ତଥ୍ୟ ଆସିବା ପରେ ଘଟଣାର ପ୍ରକୃତ ଚିତ୍ର ସ୍ପଷ୍ଟ ହେବ।
