Goldy Brar: FBIର Ten Most Wanted ତାଲିକାରେ ଗୋଲ୍ଡି ବ୍ରାର, ଗିରଫ ସୂଚନା ପାଇଁ ୧ ମିଲିୟନ୍ ଡଲାର୍ ପୁରସ୍କାର
ନୂଆଦିଲ୍ଲୀ: ଗ୍ୟାଙ୍ଗଷ୍ଟର ସତିନ୍ଦରଜିତ୍ ସିଂହ ଓରଫ୍ ଗୋଲ୍ଡି ବ୍ରାରଙ୍କୁ ଆମେରିକାର Federal Bureau of Investigation (FBI)ର Ten Most Wanted Fugitives ତାଲିକାରେ ସାମିଲ କରାଯାଇଛି। FBIର ଅନୁସାରେ, ଗୋଲ୍ଡି ବ୍ରାରଙ୍କ ବିରୋଧରେ ହତ୍ୟା, ଅପହରଣ, ଧମକ ଦେଇ ଟଙ୍କା ଆଦାୟ, ମାଦକଦ୍ରବ୍ୟ ବିତରଣ ଓ ଅନ୍ୟାନ୍ୟ ଅପରାଧ ସମ୍ପର୍କିତ ଅଭିଯୋଗ ରହିଛି। ତାଙ୍କୁ ଗିରଫ କରାଇବାରେ ସହାୟକ ହେବା ଭଳି ସୂଚନା ପାଇଁ FBI ୧ ମିଲିୟନ୍ ଡଲାର୍ ପର୍ଯ୍ୟନ୍ତ ପୁରସ୍କାର ଘୋଷଣା କରିଛି।
FBIର ଫେଡେରାଲ୍ ଅଭିଯୋଗ ଅନୁସାରେ, ବ୍ରାର ଲରେନ୍ସ ବିଷ୍ଣୋଇ ସଂଗଠିତ ଅପରାଧ ଗୋଷ୍ଠୀ ସହ ଜଡ଼ିତ ଏବଂ ଉତ୍ତର ଆମେରିକାରେ ଏହି ନେଟୱର୍କର ଜଣେ ନେତା ଭାବେ ଅଭିଯୁକ୍ତ। କାନାଡାରେ ୨୦୨୩ରେ ହୋଇଥିବା ହରଦୀପ ସିଂହ ନିଜ୍ଜରଙ୍କ ହତ୍ୟା ମାମଲାରେ ତାଙ୍କ ବିରୋଧରେ ହତ୍ୟା ଷଡ଼ଯନ୍ତ୍ରର ଅଭିଯୋଗ ମଧ୍ୟ ରହିଛି। ତେବେ ଏସବୁ ଅଭିଯୋଗ ଆଇନଗତ ପ୍ରକ୍ରିୟା ଅଧୀନରେ ରହିଛି।
FBI କହିଛି ଯେ ଗୋଲ୍ଡି ବ୍ରାରଙ୍କୁ ଧରିବା ପାଇଁ ଆମେରିକା, କାନାଡା ଓ ଅନ୍ୟ ଦେଶର ଆଇନ ପ୍ରବର୍ତ୍ତନକାରୀ ସଂସ୍ଥା ସହଯୋଗ କରୁଛନ୍ତି। FBIର ତାଲିକାରେ ସାମିଲ ହେବା ପରେ ତାଙ୍କ ସନ୍ଧାନ ଅଭିଯାନକୁ ଆହୁରି ବ୍ୟାପକ କରାଯାଇଛି। FBI ତାଙ୍କୁ ଅତ୍ୟନ୍ତ ହିଂସ୍ର ଓ ବିପଜ୍ଜନକ ବ୍ୟକ୍ତି ଭାବେ ବର୍ଣ୍ଣନା କରିଛି ଏବଂ ସାଧାରଣ ଲୋକଙ୍କୁ ତାଙ୍କ ସହ ସିଧାସଳଖ ସମ୍ପର୍କ ନ କରି ଆଇନ ପ୍ରବର୍ତ୍ତନକାରୀଙ୍କୁ ସୂଚନା ଦେବାକୁ କହିଛି।
