Delhi High Court: Red Bull କ୍ୟାନ୍ରେ ‘Energy Drink’ ଲେବଲ୍ ହଟାଇବା ନିର୍ଦ୍ଦେଶ ରଦ୍ଦ କଲେ ହାଇକୋର୍ଟ
ନୂଆଦିଲ୍ଲୀ: Red Bull କ୍ୟାନ୍ରେ ‘Energy Drink’ ଲେବଲ୍ ବ୍ୟବହାର ବନ୍ଦ କରିବାକୁ ଖାଦ୍ୟ ନିୟାମକଙ୍କ ଦେଇଥିବା ନିର୍ଦ୍ଦେଶକୁ ଦିଲ୍ଲୀ ହାଇକୋର୍ଟ ମଙ୍ଗଳବାର ରଦ୍ଦ କରିଛନ୍ତି। ଅଦାଲତ କହିଛନ୍ତି ଯେ, ଏଭଳି ନିଷ୍ପତ୍ତି ନେବା ପୂର୍ବରୁ ନିୟାମକ ପକ୍ଷରୁ Red Bullକୁ ନିଜ ପକ୍ଷ ରଖିବାର ସୁଯୋଗ ଦିଆଯାଇନଥିଲା। ଏହି କାରଣରୁ ନିର୍ଦ୍ଦେଶକୁ ବାତିଲ କରାଯାଇଛି।
ଚଳିତ ବର୍ଷ ଜୁନ୍ରେ ଭାରତରେ ଅଧିକ କ୍ୟାଫେଇନ୍ ଥିବା ପାନୀୟକୁ ‘Energy Drink’ ଭାବେ ବିକ୍ରି କରୁଥିବା କମ୍ପାନୀଗୁଡ଼ିକୁ ଏହି ଲେବଲ୍ ବ୍ୟବହାର ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଥିଲା। ଏହା ପରେ Red Bull ସମେତ Pepsi, Monster Beverage ଓ Reliance ଭଳି କମ୍ପାନୀଗୁଡ଼ିକ ମଧ୍ୟରେ ଚିନ୍ତା ବଢ଼ିଥିଲା। ‘Energy Drink’ ଲେବଲ୍ ହଟିଲେ ବ୍ରାଣ୍ଡର ପରିଚୟ ଏବଂ ନିବେଶ ଉପରେ ପ୍ରଭାବ ପଡ଼ିପାରେ ବୋଲି କମ୍ପାନୀଗୁଡ଼ିକ ଆଶଙ୍କା ପ୍ରକାଶ କରିଥିଲେ।
ଏହି ନିର୍ଦ୍ଦେଶ ବିରୋଧରେ Red Bullର ଭାରତୀୟ ୟୁନିଟ୍ ଦିଲ୍ଲୀ ହାଇକୋର୍ଟର ଦ୍ୱାରସ୍ଥ ହୋଇଥିଲା। କମ୍ପାନୀ ଏହାକୁ ‘ଅଚାନକ ନିଷେଧ’ ବୋଲି ଦର୍ଶାଇବା ସହ ଏହା ଦ୍ୱାରା ନିୟାମକୀୟ ଅନିଶ୍ଚିତତା ସୃଷ୍ଟି ହୋଇଥିବା ଯୁକ୍ତି ରଖିଥିଲା। ଏବେ ହାଇକୋର୍ଟଙ୍କ ନିଷ୍ପତ୍ତି ପରେ Red Bullକୁ ‘Energy Drink’ ଲେବଲ୍ ବ୍ୟବହାର ବନ୍ଦ କରିବା ସମ୍ପର୍କିତ ପୂର୍ବ ନିର୍ଦ୍ଦେଶରୁ ରାହତ ମିଳିଛି।
