Putin Praises PM Modi: ୟୁକ୍ରେନ-ରୁଷ, ଯୁଦ୍ଧ ଶେଷ ପାଇଁ ମୋଦୀଙ୍କ ଉଦ୍ୟମକୁ ପୁଟିନଙ୍କ ପ୍ରଶଂସା, କହିଲେ- ‘ତାଙ୍କ ପାଖରେ ଭଲ ପ୍ରସ୍ତାବ ଅଛି’
ନୂଆଦିଲ୍ଲୀ: ୟୁକ୍ରେନ- ରୁଷ ଯୁଦ୍ଧର ଶାନ୍ତିପୂର୍ଣ୍ଣ ସମାଧାନ ପାଇଁ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପ୍ରୟାସକୁ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ପ୍ରଶଂସା କରିଛନ୍ତି। ମୋଦୀଙ୍କ ନିକଟରେ ଏହି ସଂଘର୍ଷର ଅନ୍ତ ଘଟାଇବା ପାଇଁ “ବହୁତ ଭଲ ପ୍ରସ୍ତାବ” ରହିଛି ବୋଲି ପୁଟିନ କହିଛନ୍ତି। ମସ୍କୋରେ ଭାଲଦାଇ ଫୋରମ୍ରେ ଭାଷଣ ଦେବା ସମୟରେ ସେ ଏହି ମତ ରଖିଛନ୍ତି।
ପୁଟିନ କହିଛନ୍ତି ଯେ, ରୁଷ ଓ ଭାରତର ଭଲ ସମ୍ପର୍କ ଥିବା ସତ୍ତ୍ୱେ ମୋଦୀ ପ୍ରତ୍ୟେକ ଆଲୋଚନାରେ ୟୁକ୍ରେନ ସଂଘର୍ଷ ଶେଷ କରିବା ପ୍ରସଙ୍ଗ ଉଠାଇ ଆସୁଛନ୍ତି। ଦୁଇ ପକ୍ଷ ମଧ୍ୟରେ ଗ୍ରହଣଯୋଗ୍ୟ ସମାଧାନ ଖୋଜିବା ଦିଗରେ ମୋଦୀଙ୍କ ଆଗ୍ରହ ରହିଛି ବୋଲି ସେ କହିଛନ୍ତି। ୟୁକ୍ରେନ ଯୁଦ୍ଧ ଶେଷ ପାଇଁ ମୋଦୀଙ୍କ ଶାନ୍ତିପୂର୍ଣ୍ଣ ପ୍ରୟାସକୁ ରୁଷ ସ୍ୱାଗତ କରୁଥିବା ମଧ୍ୟ ପୁଟିନ କହିଛନ୍ତି।
ଭାରତ ଏହି ସଂଘର୍ଷରେ ଆଲୋଚନା ଓ କୂଟନୀତି ମାଧ୍ୟମରେ ଶାନ୍ତି ଆଣିବା ଉପରେ ଗୁରୁତ୍ୱ ଦେଇଆସୁଛି। ପୁଟିନଙ୍କ ଏହି ମନ୍ତବ୍ୟ ମଧ୍ୟରେ ଭାରତ-ରୁଷ ସମ୍ପର୍କ ସହ ୟୁକ୍ରେନ ସଂଘର୍ଷର ସମାଧାନ ପାଇଁ ଭାରତର କୂଟନୈତିକ ଭୂମିକା ପୁଣି ଚର୍ଚ୍ଚାକୁ ଆସିଛି। ତେବେ ଯୁଦ୍ଧର ଅନ୍ତ ପାଇଁ କୌଣସି ଚୂଡ଼ାନ୍ତ ସମାଧାନ ଏପର୍ଯ୍ୟନ୍ତ ଘୋଷଣା ହୋଇନାହିଁ।
