Assam Meghalaya Landslide: ପେଟ୍ରୋଲ ପମ୍ପ ପଛରେ ଧସିଲା ପାହାଡ଼, ଅଳ୍ପକେ ବର୍ତ୍ତିଲେ ଲୋକେ
ଆସାମ: ଆସାମ-ମେଘାଳୟ ସୀମା ନିକଟ ଜୋରାବାଟର ଟେନ୍ ମାଇଲ୍ ଅଞ୍ଚଳରେ ଶୁକ୍ରବାର ବଡ଼ ଧରଣର ଭୂସ୍ଖଳନ ଘଟିଛି। ଏକ ପେଟ୍ରୋଲ ପମ୍ପ ପଛପଟେ ଥିବା ପାହାଡ଼ର ଏକ ବଡ଼ ଅଂଶ ହଠାତ୍ ଧସିଯିବାରୁ ମାଟି, ପଥର ଓ ଆବର୍ଜନା ତଳକୁ ଖସି ପେଟ୍ରୋଲ ପମ୍ପ ପରିସରରେ ଜମା ହୋଇଥିଲା। ଭୂସ୍ଖଳନରେ ପମ୍ପର ପ୍ରାୟ ଅଧା ଅଂଶ ମାଟି ଓ ଧ୍ୱଂସାବଶେଷରେ ଢାଙ୍କି ଯାଇଥିବା ଜଣାପଡ଼ିଛି।
ଘଟଣା ପରେ ଏହାର ଅନେକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ପମ୍ପ ପରିସରରେ ରହିଥିବା ଦୁଇଟି ଗାଡ଼ି ମଧ୍ୟ ଭୂସ୍ଖଳନରେ ଆସିଯାଇଥିବା ବେଳେ ସେଗୁଡ଼ିକର ସାମାନ୍ୟ କ୍ଷତି ହୋଇଥିବା ଏକ ଭିଡିଓରୁ ଜଣାପଡ଼ିଛି। ବ୍ୟସ୍ତ ପେଟ୍ରୋଲ ପମ୍ପ ନିକଟରେ ଏପରି ଭୂସ୍ଖଳନ ହେବାରୁ ଅଞ୍ଚଳରେ ଆତଙ୍କ ସୃଷ୍ଟି ହୋଇଥିଲା। ତେବେ ବର୍ତ୍ତମାନ ସୁଦ୍ଧା କୌଣସି ମୃତାହତ ଖବର ମିଳିନାହିଁ।
ଘଟଣା ପରେ କ୍ଷୟକ୍ଷତିର ଆକଳନ କରାଯାଉଛି। ଅବଶିଷ୍ଟ ପାହାଡ଼ ଅଂଶର ସ୍ଥିତି ଯାଞ୍ଚ କରାଯାଇ ଆଗକୁ ପୁଣି ମାଟି ଧସିବାର ଆଶଙ୍କା ରହିଛି କି ନାହିଁ, ତାହା ଅଧିକାରୀମାନେ ଯାଞ୍ଚ କରିବେ। ଜୋରାବାଟ ଅଞ୍ଚଳରେ ଏକାଧିକ ସ୍ଥାନରେ ପାହାଡ଼ କାଟି ରାସ୍ତା ନିର୍ମାଣ କରାଯାଇଥିବାରୁ ପ୍ରବଳ ବର୍ଷା ସମୟରେ ଭୂସ୍ଖଳନ ଆଶଙ୍କା ରହିଥାଏ। ଘଟଣାସ୍ଥଳରେ ପରିସ୍ଥିତି ଅନୁଧ୍ୟାନ ଜାରି ରହିଥିବା ବେଳେ ଅଧିକ ତଥ୍ୟକୁ ଅପେକ୍ଷା କରାଯାଇଛି।
