Faridabad Crime: ଖେଳୁଥିବା ବେଳେ ଧକ୍କାକୁ ନେଇ ବିବାଦ; ୧୩ ବର୍ଷୀୟ ଶିଶୁଙ୍କୁ ଛୁରିରେ ହତ୍ୟା ଉଦ୍ୟମ! ଛାତ୍ରଙ୍କୁ ମୃତ୍ୟୁ ଘୋଷଣା କଲେ ଡାକ୍ତର
ହରିୟାଣା: ହରିୟାଣାର ଫରିଦାବାଦ ସେକ୍ଟର-୫୬ରେ ଖେଳୁଥିବା ବେଳେ ଦୁଇ ନାବାଳକଙ୍କ ମଧ୍ୟରେ ହୋଇଥିବା ବିବାଦ ଭୟଙ୍କର ରୂପ ନେଇଛି। ରବିବାର ସନ୍ଧ୍ୟାରେ ଧକ୍କା ଦେବାକୁ ନେଇ ହୋଇଥିବା ଝଗଡ଼ା ପରେ ୧୫ ବର୍ଷୀୟ ନାବାଳକ ଜଣେ ୧୩ ବର୍ଷୀୟ ଶିଶୁଙ୍କ ଛାତିରେ ଛୁରି ମାରିଥିବା ଅଭିଯୋଗ ହୋଇଛି। ଆହତ ଶିଶୁଙ୍କୁ ପରିବାର ଲୋକେ ତୁରନ୍ତ ହସ୍ପିଟାଲ ନେଇଥିଲେ, କିନ୍ତୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଘଟଣା ପରେ ଅଭିଯୁକ୍ତ ନାବାଳକ ଛୁରି ନେଇ ସେଠାରୁ ଚାଲିଯାଇଥିବା ପୁଲିସ କହିଛି।
ପରିବାର ଅନୁସାରେ, ମୃତ ଶିଶୁ ଘର ବାହାରେ ଖେଳୁଥିବା ବେଳେ ପାଖରେ ରହୁଥିବା ୧୫ ବର୍ଷୀୟ ନାବାଳକ ସେଠାକୁ ଆସିଥିଲେ। ଉଭୟ କିଛି ସମୟ ଏକାଠି ଖେଳିବା ପରେ ଧକ୍କା ଦେବାକୁ ନେଇ ଠେଲାପେଲା ହୋଇଥିଲା। ଏହି ସମୟରେ ଅଭିଯୁକ୍ତ ନାବାଳକ ଛୁରିରେ ଆକ୍ରମଣ କରିଥିବା ଅଭିଯୋଗ ହୋଇଛି। ପଡ଼ୋଶୀଙ୍କଠାରୁ ଘଟଣା ସମ୍ପର୍କରେ ଖବର ପାଇ ପରିବାର ଲୋକେ ଆହତ ଶିଶୁଙ୍କୁ ହସ୍ପିଟାଲ ନେଇଥିଲେ।
ଘଟଣାକୁ ନେଇ ପୁଲିସ ତଦନ୍ତ ଆରମ୍ଭ କରିଛି। ମୃତ ଶିଶୁଙ୍କ ପରିବାରର ଅଭିଯୋଗ ଆଧାରରେ ସେକ୍ଟର-୫୮ ଥାନାରେ ମାମଲା ରୁଜୁ ହୋଇଥିବା ଜଣାପଡ଼ିଛି। ମୃତଦେହର ବ୍ୟବଚ୍ଛେଦ ପରେ ଆଗାମୀ ଆଇନଗତ ପଦକ୍ଷେପ ନିଆଯିବ ବୋଲି ପୁଲିସ କହିଛି। ଘଟଣାର ପ୍ରକୃତ କାରଣ ଓ ଅନ୍ୟାନ୍ୟ ପରିସ୍ଥିତି ନେଇ ତଦନ୍ତ ଜାରି ରହିଛି।
