Rajnath Singh Sunabeda Visit: ସୁନାବେଡ଼ାରେ ପହଞ୍ଚିଲେ ରାଜନାଥ ସିଂ, ୨୦୦୦ତମ ଏରୋ-ଇଞ୍ଜିନ୍ ହସ୍ତାନ୍ତର ସମାରୋହରେ ଯୋଗଦେଲେ
କୋରାପୁଟ: ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ସୁନାବେଡ଼ାରେ ପହଞ୍ଚିଛନ୍ତି। ତାଙ୍କ ସହ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମଧ୍ୟ ସୁନାବେଡ଼ାରେ ପହଞ୍ଚିଛନ୍ତି। ରାଜନାଥ ସିଂ ନୂଆଦିଲ୍ଲୀରୁ ବିଶାଖାପାଟଣା ଯିବା ପରେ ସେଠାରୁ ସ୍ୱତନ୍ତ୍ର ହେଲିକପ୍ଟର ଯୋଗେ ସୁନାବେଡ଼ାର ଟିଟିଏସ୍ ହେଲିପ୍ୟାଡ୍ରେ ପହଞ୍ଚିଥିଲେ। ପରେ ସେ ସୁନାବେଡ଼ାସ୍ଥିତ ହିନ୍ଦୁସ୍ତାନ ଏରୋନେଟିକ୍ସ ଲିମିଟେଡ୍ (HAL)ର କୋରାପୁଟ ଡିଭିଜନ୍ରେ ଆୟୋଜିତ ୨୦୦୦ତମ ଏରୋ-ଇଞ୍ଜିନ୍ ହସ୍ତାନ୍ତର ସମାରୋହରେ ଯୋଗ ଦେଇଛନ୍ତି।
HAL କୋରାପୁଟ ଗତ ୬ ଦଶନ୍ଧି ଧରି ଭାରତର ଏରୋସ୍ପେସ୍ ଓ ପ୍ରତିରକ୍ଷା ଉତ୍ପାଦନ କ୍ଷେତ୍ରରେ କାମ କରିଆସୁଛି। ଏହି ପ୍ରତିଷ୍ଠାନ ଭାରତୀୟ ସେନାବାହିନୀର ପରିଚାଳନାଗତ ପ୍ରସ୍ତୁତିରେ ମଧ୍ୟ ଯୋଗଦାନ ଦେଉଛି। ଏହି କାର୍ଯ୍ୟକ୍ରମରେ ୨୧୮ କୋଟି ଟଙ୍କା ନିବେଶରେ ଶକ୍ତି ଇଞ୍ଜିନ୍ର ଦ୍ୱିତୀୟ ନିର୍ମାଣ ଲାଇନ୍ର ଶୁଭାରମ୍ଭ କରାଯିବ। ଏହା ଦ୍ୱାରା ଶକ୍ତି ଇଞ୍ଜିନ୍ ଉତ୍ପାଦନ କ୍ଷମତା ବଢ଼ାଇବା ଉପରେ ଗୁରୁତ୍ୱ ରହିଛି।
ଭାରତକୁ ପ୍ରତିରକ୍ଷା ଉପକରଣ ପାଇଁ ଅନ୍ୟ ଦେଶ ଉପରେ ନିର୍ଭରଶୀଳ ଦେଶରୁ ନିଜେ ପ୍ରତିରକ୍ଷା ପ୍ରଣାଳୀର ଡିଜାଇନ୍, ବିକାଶ ଓ ଉତ୍ପାଦନ କରୁଥିବା ଦେଶ ଭାବେ ଗଢ଼ି ତୋଳିବା ଲକ୍ଷ୍ୟରେ କେନ୍ଦ୍ର ସରକାର କାମ କରୁଛନ୍ତି। ସୁନାବେଡ଼ା HALରେ ୨୦୦୦ତମ ଏରୋ-ଇଞ୍ଜିନ୍ ହସ୍ତାନ୍ତର ଓ ଶକ୍ତି ଇଞ୍ଜିନ୍ର ଦ୍ୱିତୀୟ ନିର୍ମାଣ ଲାଇନ୍ର ଶୁଭାରମ୍ଭକୁ ପ୍ରତିରକ୍ଷା ଉତ୍ପାଦନ କ୍ଷେତ୍ରରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ଦେଖାଯାଉଛି।
