Delhi Audi Accident: ଜନ୍ମଦିନ ପାଳନ ପାଇଁ ୧୬ ହଜାର ଟଙ୍କାରେ ଭଡ଼ା ନେଇଥିଲେ ଅଡି; ଦୁର୍ଘଟଣାରେ ଚାଲିଗଲା ଜଣଙ୍କ ଜୀବନ,ନାବାଳକ ଅଟକ
ନୂଆଦିଲ୍ଲୀ: ଦିଲ୍ଲୀରେ ଜନ୍ମଦିନ ପାଳନ ପାଇଁ ଅଡି କାର୍ ଭଡ଼ା ନେବା ଜଣେ ୧୭ ବର୍ଷୀୟ ନାବାଳକଙ୍କ ପାଇଁ ଦୁଃଖଦ ଘଟଣାର କାରଣ ହୋଇଛି। ଏକ ଆପ୍ ମାଧ୍ୟମରେ ସେ ରାତିକ ପାଇଁ ୧୬ ହଜାର ଟଙ୍କା ଦେଇ କାର୍ଟି ଭଡ଼ା ନେଇଥିବା ଜଣାପଡ଼ିଛି। ତେବେ ଗାଡ଼ି ଚଳାଇବା ସମୟରେ ଏହା ତିନୋଟି ଗାଡ଼ି ସହ ଜଣେ ପଥଚାରୀଙ୍କୁ ଧକ୍କା ଦେଇଥିଲା। ଏଥିରେ ୪୫ ବର୍ଷୀୟ ଉମାଶଙ୍କରଙ୍କ ମୃତ୍ୟୁ ହୋଇଛି।
ଘଟଣା ପରେ ପୋଲିସ ନାବାଳକ ଚାଳକଙ୍କୁ ଅଟକ ରଖିବା ସହ ଅଡି କାର୍ଟିକୁ ଜବତ କରିଛି। ନାବାଳକଙ୍କୁ କିପରି କାର୍ ଭଡ଼ା ଦିଆଗଲା, ସେ ନେଇ ସମ୍ପୃକ୍ତ ରେଣ୍ଟାଲ୍ କମ୍ପାନୀର ଭୂମିକା ମଧ୍ୟ ଯାଞ୍ଚ କରାଯାଉଛି। କାର୍ ଭଡ଼ା ଦେବା ସମୟରେ ନିୟମ ପାଳନ ହୋଇଥିଲା କି ନାହିଁ, ତାହା ତଦନ୍ତର ଅଂଶ ରହିଛି।
ପୋଲିସ ଅଧିକାରୀଙ୍କ ସୂଚନା ଅନୁସାରେ, ନାବାଳକଙ୍କୁ ଭିଡିଓ କନ୍ଫରେନ୍ସିଂ ମାଧ୍ୟମରେ ଜୁଭେନାଇଲ୍ ଜଷ୍ଟିସ୍ ବୋର୍ଡ (JJB) ସମ୍ମୁଖରେ ହାଜର କରାଯାଇଛି। ଦୁର୍ଘଟଣା କିପରି ଘଟିଲା, କାର୍ ଭଡ଼ା ଦେବାରେ କମ୍ପାନୀର କୌଣସି ଅବହେଳା ଥିଲା କି ନାହିଁ ଏବଂ ଅନ୍ୟ କେହି ଏଥିରେ ସମ୍ପୃକ୍ତ ଅଛନ୍ତି କି ନାହିଁ, ପୋଲିସ ତାହାର ତଦନ୍ତ କରୁଛି।
