Home-Cooked Food Cost: ଘରୋଇ ଖାଦ୍ୟ ଥାଳି ମହଙ୍ଗା, ଶାକାହାରୀ ଖର୍ଚ୍ଚ ୧୦% ବୃଦ୍ଧି
ଦେଶରେ ଘରେ ରାନ୍ଧି ଖାଉଥିବା ଲୋକଙ୍କ ଖାଦ୍ୟ ଖର୍ଚ୍ଚ ବଢ଼ିଛି। CRISIL Intelligenceର ଆକଳନ ଅନୁସାରେ, ୨୦୨୬ ସେପ୍ଟେମ୍ବରରେ ଶାକାହାରୀ ଥାଳିର ଖର୍ଚ୍ଚ ବାର୍ଷିକ ଭିତ୍ତିରେ ୧୦% ବଢ଼ିଥିବା ବେଳେ ଆମିଷ ଥାଳିର ଖର୍ଚ୍ଚ ୬% ବୃଦ୍ଧି ପାଇଛି। ଶାକାହାରୀ ଥାଳି ପାଇଁ ଖର୍ଚ୍ଚ ୨୦୨୫ ସେପ୍ଟେମ୍ବରରେ ୨୮.୧ ଟଙ୍କା ଥିବା ବେଳେ ଏବେ ୩୦.୮ ଟଙ୍କା ହୋଇଛି। ସେହିପରି ଆମିଷ ଥାଳିର ଖର୍ଚ୍ଚ ୫୬ ଟଙ୍କାରୁ ବଢ଼ି ୫୯.୫ ଟଙ୍କାରେ ପହଞ୍ଚିଛି।
ପିଆଜ, ଖାଇବା ତେଲ, ଚାଉଳ ଓ LPG ଦର ବୃଦ୍ଧି ଖାଦ୍ୟ ଖର୍ଚ୍ଚ ବଢ଼ିବାର ପ୍ରମୁଖ କାରଣ ବୋଲି CRISIL କହିଛି। ପିଆଜ ଉତ୍ପାଦନରେ ୫–୬% ହ୍ରାସ ଏବଂ ଜୁନ୍ରେ ସ୍ୱାଭାବିକ ହାରାହାରି ତୁଳନାରେ ୪୦% କମ୍ ବର୍ଷା ହେବାରୁ ନୂଆ ଫସଲ ବଜାରକୁ ଆସିବାରେ ବିଳମ୍ବ ହୋଇଛି। ଏହା ସହିତ ଖାଇବା ତେଲର ଦର ୧୨% ଏବଂ LPG ଦର ୧୦% ବଢ଼ିଛି। ଧାନ ଚାଷ ଅଞ୍ଚଳ ଓ ଉତ୍ପାଦନ କମିବା ଆଶଙ୍କା ଥିବାରୁ ଚାଉଳ ଦର ଉପରେ ମଧ୍ୟ ଚାପ ରହିପାରେ।
CRISIL Intelligenceର ନିର୍ଦ୍ଦେଶକ ପୁଷନ ଶର୍ମାଙ୍କ ଅନୁସାରେ, ଅକ୍ଟୋବର ପ୍ରଥମାର୍ଦ୍ଧରେ ପିଆଜ ଦର ଉଚ୍ଚ ରହିପାରେ, କିନ୍ତୁ ମାସର ଶେଷ ଭାଗରେ ନୂଆ ଫସଲ ବଜାରକୁ ଆସିଲେ କିଛି ଆଶ୍ୱସ୍ତି ମିଳିପାରେ। ପର୍ବପର୍ବାଣୀ ସମୟରେ ଚାହିଦା ବୃଦ୍ଧି, ପାଣିପାଗ ଜନିତ ଉତ୍ପାଦନ ଆଶଙ୍କା ଓ ବିଶ୍ୱ ବଜାରରେ ଦର ଉଚ୍ଚ ରହିବା ଯୋଗୁଁ ନିକଟ ଭବିଷ୍ୟତରେ ଘରୋଇ ଖାଦ୍ୟ ଖର୍ଚ୍ଚ ଉପରେ ଚାପ ଜାରି ରହିପାରେ।
