MPSC Protest: ପୁଣେରେ ଦଶମ ଦିନରେ ପହଞ୍ଚିଲା ଚାକିରି ଆଶାୟୀଙ୍କ ଆନ୍ଦୋଳନ, ସଂସ୍କାର କମିଟିର ସଚିବ ହେଲେ ତୁକାରାମ ମୁଣ୍ଡେ
ମହାରାଷ୍ଟ୍ର: ମହାରାଷ୍ଟ୍ରର ପୁଣେରେ ସରକାରୀ ଚାକିରି ଆଶାୟୀଙ୍କ ଆନ୍ଦୋଳନ ଦଶମ ଦିନରେ ପହଞ୍ଚିଥିବା ବେଳେ ମହାରାଷ୍ଟ୍ର ପବ୍ଲିକ୍ ସର୍ଭିସ୍ କମିସନ (MPSC)ରେ ସଂସ୍କାର ଆଣିବା ପାଇଁ ଗଠିତ ସରକାରୀ କମିଟିର ସଚିବ ଭାବେ ତୁକାରାମ ମୁଣ୍ଡେଙ୍କୁ ନିଯୁକ୍ତ କରାଯାଇଛି। ମହାରାଷ୍ଟ୍ର FDA କମିସନର ଭାବେ କାର୍ଯ୍ୟରତ ମୁଣ୍ଡେ ଏହି କମିଟିରେ ଦାୟିତ୍ୱ ତୁଲାଇବେ। ପୂର୍ବତନ ବିଚାରପତି ଦିଲୀପ ଭୋସଲେଙ୍କ ଅଧ୍ୟକ୍ଷତାରେ ଗଠିତ କମିଟି MPSCର ପରୀକ୍ଷା ଓ ନିଯୁକ୍ତି ପ୍ରକ୍ରିୟାରେ ସଂସ୍କାର ଆଣିବା ପାଇଁ ପରାମର୍ଶ ଦେବ। ପରୀକ୍ଷାରେ ଅନିୟମିତତା, ନିଯୁକ୍ତି ପରୀକ୍ଷା ସ୍ଥଗିତ ହେବା ଏବଂ ଉତ୍ତରଖାତା ମୂଲ୍ୟାୟନକୁ ନେଇ ଉଠିଥିବା ପ୍ରଶ୍ନ ମଧ୍ୟରେ ସରକାର ଏହି ପଦକ୍ଷେପ ନେଇଛନ୍ତି।
ଆନ୍ଦୋଳନରତ ଚାକିରି ଆଶାୟୀମାନେ ନିଯୁକ୍ତି ପ୍ରକ୍ରିୟାରେ ଅଧିକ ସ୍ୱଚ୍ଛତା, ପରୀକ୍ଷା ବ୍ୟବସ୍ଥାରେ ପରିବର୍ତ୍ତନ ଏବଂ MPSC ଅଧ୍ୟକ୍ଷ ବିବେକ ଭୀମନୱାରଙ୍କୁ ପଦରୁ ହଟାଇବା ଦାବି କରୁଛନ୍ତି। ଆନ୍ଦୋଳନରେ ସାମିଲ ପ୍ରତିନିଧିଙ୍କ ବିରୋଧରେ ରୁଜୁ ମାମଲା ପ୍ରତ୍ୟାହାର, ଆଗାମୀ ତିନି ବର୍ଷରେ ୭୦ ହଜାର ସରକାରୀ ପଦବୀରେ ନିଯୁକ୍ତି ଏବଂ ଆଗାମୀ ଗ୍ରୁପ୍-C ପରୀକ୍ଷାରେ ଖାଲି ପଦବୀ ସଂଖ୍ୟା ବଢ଼ାଇବା ଭଳି ଦାବି ଉପରେ ବିଚାର କରାଯିବ ବୋଲି ସରକାର କହିଛନ୍ତି। ଏହି ଦାବିଗୁଡ଼ିକୁ ନେଇ ଆଶାୟୀଙ୍କ ଆନ୍ଦୋଳନ ଜାରି ରହିଛି।
ଅନ୍ୟପଟେ, ଆନ୍ଦୋଳନ ମଧ୍ୟରେ MPSC ସଚିବ ମହେନ୍ଦ୍ର ହରପାଲକରଙ୍କୁ ମଧ୍ୟ ଅନ୍ୟତ୍ର ବଦଳି କରାଯାଇଛି। ପରୀକ୍ଷା ପରିଚାଳନା ଓ ନିଯୁକ୍ତି ପ୍ରକ୍ରିୟାରେ ଉତ୍ତରଦାୟିତ୍ୱ ସୁନିଶ୍ଚିତ କରିବା ସହ ସଂସ୍କାର ଆଣିବା ପାଇଁ ଦାବି ଜୋରଦାର ହେଉଥିବା ସମୟରେ ଏହି ପରିବର୍ତ୍ତନ ହୋଇଛି। ନୂଆ କମିଟିର ସୁପାରିସ ଆଧାରରେ କେଉଁ ପଦକ୍ଷେପ ନିଆଯିବ ଏବଂ ଆନ୍ଦୋଳନକାରୀଙ୍କ ଦାବି କେତେଦୂର ପୂରଣ ହେବ, ତାହା ଉପରେ ଏବେ ନଜର ରହିଛି।
