Honda Activa Purchase: ୧୦ ଟଙ୍କିଆ କଏନ୍ ସଞ୍ଚୟ କରି ୧.୨୩ ଲକ୍ଷର ସ୍କୁଟର କିଣିଲେ ପାଦ୍ରୀ
ତେଲେଙ୍ଗାନା: ତେଲେଙ୍ଗାନାର ଲକ୍ସେଟ୍ଟିପେଟ୍ ଅଞ୍ଚଳର ୫୧ ବର୍ଷୀୟ ଚର୍ଚ୍ଚ ପାଦ୍ରୀ ବି. ରବି ଜୋସେଫ୍ ନିଜର ଏକ ସ୍ୱପ୍ନ ପୂରଣ କରିବାକୁ ନିଆରା ଉପାୟ ଆପଣାଇଛନ୍ତି। ସେ ଗତ ତିନି ବର୍ଷ ଧରି ୧୦ ଟଙ୍କିଆ କଏନ୍ ସଞ୍ଚୟ କରି ପ୍ରାୟ ୧.୨୩ ଲକ୍ଷ ଟଙ୍କା ମୂଲ୍ୟର ଏକ ହୋଣ୍ଡା ଆକ୍ଟିଭା ସ୍କୁଟର କିଣିଛନ୍ତି। ତାଙ୍କର ଏହି ନିଆରା ଉପାୟ ଏବେ ଚର୍ଚ୍ଚାର ବିଷୟ ହୋଇଛି।
ସୂଚନା ଅନୁସାରେ, ଦୈନନ୍ଦିନ ଖର୍ଚ୍ଚରୁ କିଛି ଟଙ୍କା ବଞ୍ଚାଇ ଜୋସେଫ୍ ପ୍ରତିଦିନ ୧୦ ଟଙ୍କିଆ କଏନ୍ ଅଲଗା କରି ରଖୁଥିଲେ। ଏହିପରି ତିନି ବର୍ଷ ଧରି ସଞ୍ଚୟ କରିବା ପରେ ସେ ନିଜ ପସନ୍ଦର ଦୁଇଚକିଆ ଗାଡ଼ି କିଣିବାକୁ ସକ୍ଷମ ହୋଇଥିଲେ। ନିଜର ସ୍ୱପ୍ନ ପୂରଣ କରିବା ପାଇଁ ତାଙ୍କର ଏହି ଦୀର୍ଘଦିନର ପ୍ରୟାସକୁ ନେଇ ଆଲୋଚନା ହେଉଛି।
ଜୋସେଫ୍ ସଞ୍ଚୟ କରିଥିବା କଏନ୍ଗୁଡ଼ିକ ଦେଇ ସ୍କୁଟର କିଣିବାକୁ ଯାଇଥିବା ବେଳେ ଶୋ’ରୁମ୍ କର୍ମଚାରୀଙ୍କୁ ସେଗୁଡ଼ିକ ଗଣିବା ପାଇଁ ପ୍ରାୟ ଦୁଇ ଘଣ୍ଟା ସମୟ ଲାଗିଥିଲା। ନଗଦ କଏନ୍ରେ ଏତେ ମୂଲ୍ୟର ଗାଡ଼ି କିଣିବା ଘଟଣା ଅନେକଙ୍କ ଧ୍ୟାନ ଆକର୍ଷଣ କରିଛି।
