Balasore Jail Controversy: କଏଦୀଙ୍କୁ ଡ୍ରଗ୍ସ ମାମଲାରେ ଫସାଇବାକୁ ଚାପ ଅଭିଯୋଗ, ପୂର୍ବତନ ଜେଲ୍ ଡିଜିଙ୍କ ନାଁ ଉଠାଇଲେ ନିଲମ୍ବିତ ଜେଲର
ବାଲେଶ୍ୱର: ପୂର୍ବତନ ଜେଲ୍ ଡିଜି ସୁଶାନ୍ତ ନାଥଙ୍କ ବିରୋଧରେ ଏକ ଗୁରୁତର ଅଭିଯୋଗ ଆସିଛି। ବାଲେଶ୍ୱର ଜେଲ୍ର ନିଲମ୍ବିତ ଜେଲର ପ୍ରଦୀପ୍ତ କୁମାର ମହାଳିକ ଦାବି କରିଛନ୍ତି ଯେ, ଜେଲ୍ରେ ଥିବା ବିଚାରାଧୀନ କଏଦୀ ରାଜୀବ ଲୋଚନ ସାହୁଙ୍କୁ ବ୍ରାଉନସୁଗାର ମାମଲାରେ ଫସାଇବାକୁ ତାଙ୍କୁ ଚାପ ଦିଆଯାଇଥିଲା। ଏହି ନିର୍ଦ୍ଦେଶ ତତ୍କାଳୀନ ଭୁବନେଶ୍ୱର ଜେଲ୍ ଅଧୀକ୍ଷକ ସର୍ବେଶ୍ୱର ସାହୁଙ୍କ ମାଧ୍ୟମରେ ମିଳିଥିବା ପ୍ରଦୀପ୍ତ ଅଭିଯୋଗ କରିଛନ୍ତି। ନିୟମ ବିରୋଧୀ କାମ କରିବାକୁ ସେ ମନା କରିଥିବାରୁ ତାଙ୍କୁ ଚାପ ଓ ପ୍ରଲୋଭନ ଦିଆଯାଇଥିବା ମଧ୍ୟ ତାଙ୍କ ଚିଠିରେ ଉଲ୍ଲେଖ ରହିଛି।
ଏହି ଘଟଣାକୁ ନେଇ ପ୍ରଦୀପ୍ତ ମହାଳିକ ନଭେମ୍ବର ୨ରେ ଗୃହ ବିଭାଗର ଅତିରିକ୍ତ ମୁଖ୍ୟ ସଚିବଙ୍କୁ ଚିଠି ଲେଖିଛନ୍ତି। ତାଙ୍କ କହିବା ଅନୁସାରେ, ବେଆଇନ ନିର୍ଦ୍ଦେଶ ପାଳନ ନକରିବା ପରେ ତାଙ୍କ ବିରୋଧରେ ନିଲମ୍ବନ ଆଦେଶ ଜାରି ହୋଇଥିଲା। ଏହି ଅଭିଯୋଗର ସ୍ୱାଧୀନ ଭାବେ ପୁଷ୍ଟି ମିଳିନଥିବାରୁ ଘଟଣାର ସତ୍ୟତା ତଦନ୍ତ ପରେ ସ୍ପଷ୍ଟ ହେବ।
ପ୍ରଦୀପ୍ତ ମହାଳିକ ଅକ୍ଟୋବର ୧୩ରେ ଜାରି ହୋଇଥିବା ନିଲମ୍ବନ ଆଦେଶ ରଦ୍ଦ କରିବାକୁ ଗୃହ ବିଭାଗକୁ ଅନୁରୋଧ କରିଛନ୍ତି। ତାଙ୍କ ଚିଠିରେ ପୂର୍ବତନ ଜେଲ୍ ଡିଜିଙ୍କ ସମେତ ଅନ୍ୟ ଅଧିକାରୀଙ୍କ ଭୂମିକା ନେଇ ମଧ୍ୟ ପ୍ରଶ୍ନ ଉଠାଯାଇଛି। ଅଭିଯୋଗର ପ୍ରକୃତ ସତ୍ୟତା ଏବଂ ନିଲମ୍ବନ ପଛର କାରଣ ନେଇ ତଦନ୍ତ ପରେ ହିଁ ସ୍ପଷ୍ଟ ଚିତ୍ର ସାମ୍ନାକୁ ଆସିବ।
