ପ୍ରଜ୍ଞା ପଟ୍ଟନାୟକ

15/06/2023 at 5:42 PM

ବେଙ୍ଗାଲୁରୁ: କର୍ଣ୍ଣାଟକରେ କଂଗ୍ରେସ ଦଳ କ୍ଷମତାକୁ ଆସିବାର ଏକ ମାସ ବି ପୂରା ହୋଇନି। ଅନ୍ୟପଟେ କଂଗ୍ରେସ ପୂର୍ବ ବିଜେପି ସରକାର ଦ୍ବାରା ପାରିତ ହୋଇଥିବା ଅନେକ ଆଇନକୁ ରଦ୍ଦ କରିବାକୁ ନିଷ୍ପତ୍ତି ନେଇଛନ୍ତି। କ୍ୟାବିନେଟ ମଧ୍ୟ ଏଥିରେ ମୋହର ଲଗାଇଛି। ଖୁବ୍ ଶୀଘ୍ର ଏହି ବିଲ୍ ବିଧାନସଭାରେ ପ୍ରସ୍ତୁତ କରାଯିବ। ଏହି ବିଲର ମୁଖ୍ୟ ଉର୍ଦ୍ଦେଶ୍ୟ ହେଉଛି ଧର୍ମର ସ୍ୱାଧୀନତାର ଅଧିକାରକୁ ସୁରକ୍ଷିତ ରଖିବା ଏବଂ ଭୁଲ ବୟାନ, ଅଯଥା ପ୍ରଭାବ, ଜବର ଦଖଲ, ପ୍ରଲୋଭନ ମାଧ୍ୟମରେ ଗୋଟିଏ ଧର୍ମରୁ ଅନ୍ୟ ଧର୍ମକୁ ବେଆଇନ ଭାବେ ରୂପାନ୍ତରକୁ ରୋକିବା।

କର୍ଣ୍ଣାଟକ ମନ୍ତ୍ରୀ ଏଚ୍.କେ ପାଟିଲ କହିଛନ୍ତି ଯେ ବିଦ୍ୟାଳୟ ଓ ମହାବିଦ୍ୟାଳୟରେ ପ୍ରାର୍ଥନା ସହିତ ସମ୍ବିଧାନର ପ୍ରସ୍ତାବନାକୁ  ପଢିବା ବାଧ୍ୟତାମୂଳକ କରିବାକୁ ରାଜ୍ୟ କ୍ୟାବିନେଟ୍ ନିଷ୍ପତ୍ତି ନେଇଛି। ଏହା ବ୍ୟତୀତ କୃଷି ଉତ୍ପାଦନ ବଜାର କମିଟି ଅଧିନିୟମରେ ସଂଶୋଧନ କରିବାକୁ ନିଷ୍ପତ୍ତି ନିଆଯାଇଛି। ଯାହା ଦ୍ବାରା ପୁରୁଣା ଆଇନର ପୁନରୁଦ୍ଧାର ହୋଇପାରିବ।

ଗତ ବର୍ଷ ସେପ୍ଟେମ୍ବରରେ କର୍ଣ୍ଣାଟକରେ ବାସଭରାଜ ବୋମ୍ମାଇଙ୍କ ନେତୃତ୍ୱରେ ବିଜେପି ସରକାର ଧାର୍ମିକ ଧର୍ମ ପରିବର୍ତ୍ତନ ବିରୁଦ୍ଧରେ ଏକ ଆଇନ ପ୍ରଣୟନ କରିଥିଲେ। ସେତେବେଳେ କଂଗ୍ରେସ ଦଳ ଏବଂ ରାଜ୍ୟର ଜେଡିଏସ୍ ବିଜେପି ଦ୍ୱାରା ପ୍ରସ୍ତୁତ ଆଇନକୁ ବିରୋଧ କରିଥିଲେ। କର୍ଣ୍ଣାଟକର ବିଧାନ ପରିଷଦରେ ବିଜେପିର ଶକ୍ତି ଅଭାବରୁ ଏହି ବିଲ୍ ପାସ୍ ପାଇଁ ବିଚାରାଧୀନ ଥିଲା। ଏହା ପରେ ବିଜେପି ମେ ମାସରେ ଏକ ଅର୍ଡିନାନ୍ସ ମାଧ୍ୟମରେ ଏହି ବିଲ୍ ପାରିତ କରିଥିଲା। ଏହା ଉପରେ ବିଜେପି କହିଛି ଯେ ଆଜିକାଲି ରାଜ୍ୟରେ ଧର୍ମ ପରିବର୍ତ୍ତନ ଏକ ସାଧାରଣ କଥା ହୋଇଛି। ତତ୍କାଳୀନ ଗୃହମନ୍ତ୍ରୀ କହିଥିଲେ ଯେ ରାଜ୍ୟରେ ବାଧ୍ୟତାମୂଳକ ରୂପାନ୍ତର ଘଟଣା ସାଧାରଣରେ ପରିଣତ ହୋଇଛି।