ସୌମିତ୍ରି ମେହେର

28/06/2023 at 10:09 AM

ବୀରମହାରାଜପୁର : ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ ସୁବଳୟା ଥାନା ଅଧିନସ୍ଥ ଖଣ୍ଡହତା ଗ୍ରାମରେ ରଥଯତ୍ରା ଦିନ ରଥ ରଖିବାକୁ ନେଇ ଦୁଇ ସାହି ମଧ୍ୟରେ ହୋଇଥିବା ଗୋଷ୍ଠି ସଙ୍ଘର୍ଷ ର କୌଣସି ସମାଧାନ ହୋଇପାରି ନାହିଁ। ଫଳରେ ବୁଧୁବାର ଦିନ ହେବାକୁ ଥିବା ବାହୁଡା ଯାତ୍ରା ସମୟରେ ଗଣ୍ଡଗୋଳ ହେବାର ଆଶଙ୍କା କରାଯାଉଛି । ତେଣୁ ଗ୍ରାମବାସୀ ବାହୁଡା ଯାତ୍ରା ସମୟରେ ଗ୍ରାମରେ ପୋଲିସ ମୁତୟନ କରିବାକୁ ଦାବୀ କରିଛନ୍ତି । ସୁଚନାମତେ ଖଣ୍ଡହତା ରେ କାହିଁ କେଉଁ ଆବାହମାନ କାଳରୁ ଗଡଭିତର ଓ ବାହାରିପଡା ରେ ଭିନ୍ନ ଭିନ୍ନ ମନ୍ଦିର ରୁ ରଥଯାତ୍ରା ହୋଇଆସୁଛି । ରଥଯାତ୍ରା ସମୟରେ ଉଭୟ ମନ୍ଦିର ରୁ ଶ୍ରୀଜିଉଙ୍କୁ ପହଣ୍ଡି କରି ରଥାରୁଢ ପରେ ଗ୍ରାମର ଛକ ପର୍ଯ୍ୟନ୍ତ ରଥ ଟାଣି ଥାନ୍ତି। ଚଳିତ ବର୍ଷ ଗ୍ରାମରେ ଜବର ଦଖଲ ଉଚ୍ଛେଦ ଯୋଗୁଁ ଛକ ଅଂଚଳ ଓସାରିଆ ହୋଇଛି । ଚଳିତ ବର୍ଷ ଉଭୟ ସାହି ଯଥା ସମୟରେ ପହଣ୍ଡି କରି ରଥ ମଧ୍ୟ ଟାଣି ଥିଲେ । ମାତ୍ର ରଥ ରଖିବାକୁ କେନ୍ଦ୍ର କରି ଉଭୟ ସାହି ମଧ୍ୟରେ ଯୁକ୍ତିତର୍କ ହୋଇଥିଲା । ବିବାଦ ବଢିଯିବାରୁ ଟେକାପଥର ମାଡ ମଧ୍ୟ ହୋଇଥିଲା । ଏନେଇ ସୁବଳୟା ପୋଲିସ ଖବର ପାଇଁ ଘଟଣା ସ୍ଥଳକୁ ଯାଇ ଗ୍ରାମର ଉଭୟ ସାହିର ଲୋକଙ୍କ ସହିତ ଆଲୋଚନା କରୁଥିଲେ । ମାତ୍ର ବିବାଦ ଏତେ ବଢିଥିଲା ଯେ ପୋଲିସ ଉପସ୍ଥିତିରେ ମଧ୍ୟ ପଥର ମାଡ ହୋଇଥିଲା । ଏଥିରେ ଉଭୟ ସାହିର କେତେକ ଲୋକେ ଆହତ ମଧ୍ୟ ହୋଇଥିବା ଅଭିଯୋଗ ହୋଇଥିଲା । ପରେ ସୁବଳୟା ଥାନାରେ ଉପଜିଲାପାଳ ଅଶୋକ ଭୋଇ , ଅତିରିକ୍ତ ତହସିଲଦାର ସ୍ବାଗତ କୁମାର ପଣ୍ଡା , ଏସଡିପିଓ ଡୋଳାମଣି ଭୋଇ , ସୁବଳୟା ଥାନା ଅଧିକାରୀ ସୁଶାନ୍ତ ପ୍ରଧାନ , ବ୍ଲକ ଉପାଧ୍ୟକ୍ଷ ନାରାୟଣ ଲୁହା ଏବଂ ଗ୍ରାମର ଉଭୟ ସାହିର ଲୋକଙ୍କୁ ନେଇ ଶାନ୍ତି କମିଟି ଗଠନ କରି ଆଲୋଚନା କରି ଥିଲେ। ଉଭୟ ସାହି ର ଲୋକେ ସମସ୍ୟାର ସମାଧାନ ପାଇଁ ରଥ କୁ ପଛକୁ ନେବାକୁ ରାଜି ହୋଇଥିଲେ । ମାତ୍ର ଘଟଣା ସ୍ଥଳକୁ ଆସିବା ପରେ ପୁଣି ଉଭୟ ସାହି ର ଲୋକେ ନିଜ ନିଜ ଜିଦ ରେ ଅଟଳ ରହିଥିଲେ।ଫଳରେ ଏନେଇ କୌଣସି ସମାଧାନ ହୋଇ ପlରି ନ ଥିଲା । ଉଭୟ ସାହିର ରଥ ମୁହାଁ ମୁହିଁ ହୋଇ ରହିଥିଲା । ତେଣୁ ଯାତାୟତରେ ବାଧାପ୍ରାପ୍ତ ମଧ୍ୟ ହେଉଛି । ଗ୍ରାମରେ ଉତ୍ତେଜନା ପରିସ୍ଥିତି ଲାଗି ରହିଛି । ପୋଲିସ ପ୍ରଶାସନ ଏହାର କୌଣସି ସମାଧାନ କରି ନାହିଁ । କେବଳ ହେରା ପଞ୍ଚମି ଦିନ ଉଭୟ ସାହି ର ଲୋକଙ୍କ ଅଲଗା ଅଲଗା ସମୟରେ କାର୍ଯ୍ୟକ୍ରମ କରିବାକୁ ନିର୍ଦ୍ଦେଶ ଦେଇଥିଲା । ବୁଧୁବାର ବାହୁଡାଯାତ୍ରା ସମୟରେ ଲାଗି ରହିଥିବା ଉତ୍ତେଜନା ଯୋଗୁଁ ଗଣ୍ଡଗୋଳ ହେବାର ଆଶଙ୍କା କରୁଛନ୍ତି ସ୍ଥାନୀୟ ଲୋକେ । ବାହୁଡା ଯାତ୍ରକୁ ନେଇ ଉଭୟ ସାହିରେ ସ୍ବତନ୍ତ୍ର ଭାବେ ସଭା କରି ପ୍ରସ୍ତୁତି କରିଛନ୍ତି । ତେବେ ବୁଧୁବାର ବାହୁଡା ଯାତ୍ରା ରେ ଅନୁକୂଲ ପାଗ ଯୋଗୁଁ ଅନେକ ଲୋକଙ୍କ ସମାଗମ ହେବାର ରହିଛି । ଛୋଟ ଛୋଟ ପିଲା ଛୁଆ ଧରି ଲୋକେ ଯାତ୍ରା ଦେଖିବାକୁ ଆସିବେ । ଯେହେତୁ ବିବାଦର କୌଣସି ସମାଧାନ କରାଯାଇ ନାହିଁ ତେଣୁ ଗୋଷ୍ଠି ସଙ୍ଘର୍ଷ ହେବାର ଆଶଙ୍କା ରହିଛି । ତେଣୁ ଯାତ୍ରା ସମୟରେ ପୋଲିସ ମୁତୟନ ପାଇଁ ଦାବୀ ହେଉଛି । ଏନେଇ ସୁବଳୟା ଥାନା ଅଧିକାରୀ ସୁଶାନ୍ତ ପ୍ରଧାନ ଙ୍କୁ ପଚାରିବାରୁ ଖଣ୍ଡହତାରେ ବାହୁଡା ଯାତ୍ରା ସମୟରେ ପୋଲିସ ମୁତୟନ କରାଯିବl ସହ ଉଭୟ ସାହି ଅଲଗା ଅଲଗା ସମୟରେ ରଥ ଟାଣିବେ। କିଭଳି କୌଣସି ଗଣ୍ଡଗୋଳ ନହେବ ସେନେଇ ଆମେ ନଜର ରଖିଛୁ। ତଥାପି ଉଭୟ ସାହିର ଲୋକଙ୍କୁ ଥାନା କୁ ଆଲୋଚନା ପାଇଁ ଡାକିଛୁ ବୋଲି ପ୍ରକାଶ କରିଛନ୍ତି I