ସୁବଳୟା ଅଞ୍ଚଳରେ ନକଲି 5 ଶହ ଟଙ୍କିଆ ନୋଟ ଦେଇ ଦୋକାନ ରୁ ସଉଦା କିଣିଲେ
ବୀରମହାରାଜପୁର : ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ଅନ୍ତର୍ଗତ ସୁବଳୟା ଥାନା ଅଂଚଳରେ ନକଲି ୫ ଶହ ଟଙ୍କିଆ ନୋଟ । ଉକ୍ତ ଥାନା ଅଞ୍ଚଳ ଅନ୍ତର୍ଗତ ପିତାମହୁଲ ପଞ୍ଚାୟତ ର ଟେଭାପଦର ଗ୍ରାମରେ ଦୋକାନୀ କୁ ଜଣେ ଅଜଣା ବ୍ୟକ୍ତି ତିନୋଟି ପାଞ୍ଚ ଶହ ଟଙ୍କିଆ ନୋଟ ଦେଇ ତେଜରାତି ସାମଗ୍ରୀ ନେଇଥିବା ଅଭିଯୋଗ ହୋଇଛି । ସୁଚାନମତେ ଟେଭାପଦର ଗ୍ରାମର କ୍ଷମନିଧି ସାହୁ ଜଣେ ରୋଗଗ୍ରସ୍ତ ବ୍ୟକ୍ତି । ସେ ଅସୁସ୍ଥ ଥିବାରୁ ସେ କରିଥିବା ତେଜରାତି ଦୋକାନରେ ତାଙ୍କର ସ୍ତ୍ରୀ ବିକ୍ରି କରୁଥିଲେ । ତେବେ ରବିବାର ମଧ୍ୟାହ୍ନ ରେ କେହି ଜଣେ ଅଜଣା ବ୍ୟକ୍ତି ୩୦୦ ଟଙ୍କାର ତେଜରାତି ସାମଗ୍ରୀ କିଣି ୫୦୦ ଟଙ୍କା ଦେଇ ଥିଲେ । ପୁଣି କିଛି ସମୟ ପରେ ସେହି ଦୋକାନ କୁ ଆସି ୭ ଶହ ଟଙ୍କାର ଜିନିଷ କିଣି ଦୁଇଟି ୫ଶହ ଟଙ୍କିଆ ନୋଟ ଦେଇ ଥିଲା । ଦୋକାନୀ ବଳକା ଟଙ୍କା ଫେରାଇ ୫ ଶହ ଟଙ୍କିଆ ନୋଟ ରଖି ଥିଲେ । ପରବର୍ତ୍ତୀ ସମୟରେ କେହି ଜଣେ ତାହା ନକଲି ଟଙ୍କା ବୋଲି କହିବାରୁ ସେ ନକଲି ବୋଲି ଜାଣିବାକୁ ପାଇଲେ । ଦୋକାନୀ ଜଣକ ରୋଗଗ୍ରସ୍ତ ଥିବାରୁ ସୋମବାର ତାଙ୍କର ପରିବାର ଲୋକେ ଥାନାରେ ଅଭିଯୋଗ କରିବେ ବୋଲି ଜଣା ପଡିଛି । ସୁବଳୟା ଅଞ୍ଚଳ ରେ ଏପରି ଭାବେ ନକଲି ୫ ଶହ ଟଙ୍କିଆ ନୋଟ ପ୍ରଚଳନ ଯୋଗୁଁ ସାଧାରଣ ରେ ଲୋକେ ଆଶ୍ଚର୍ଯ୍ୟ ପ୍ରକଟ କରିଛନ୍ତି । କିଛିଦିନ ପୂର୍ବରୁ ଉଲୁଣ୍ଡା ଅଂଚଳରୁ ପ୍ରାୟ ୪୧ ଲକ୍ଷ ଟଙ୍କାର ନକଲି ପାଞ୍ଚ ଶହ ଟଙ୍କିଆ ନୋଟ କୁ ଏସଟିଏଫ୍ ଜବତ କରି ଜଣକୁ ଗିରଫ ମଧ୍ୟ କରିଥିଲା । ତେବେ ଅଞ୍ଚଳ ରେ ଆହୁରି ଅନେକ ନକଲି ଟଙ୍କା ଘୁରି ବୁଲୁଥିବା ଆଶଙ୍କା କରାଯାଉଛି । ଏନେଇ ସୁବଳୟା ଥାନା ଅଧିକାରୀ ସୁଶାନ୍ତ କୁମାର ପ୍ରଧାନ ଙ୍କୁ ଯୋଗାଯୋଗ କରିବାରୁ ତାଙ୍କ ପାଖରେ ସେନେଇ କୌଣସି ସୂଚନା ନାହିଁ ବୋଲି ପ୍ରକାଶ କରିଛନ୍ତି। ପୋଲିସ ଏନେଇ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହେଉଛି।
