ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ24/03/2024 at 2:32 PM
ନୂଆଦିଲ୍ଲୀ: ଲୋକସଭା ନିର୍ବାଚନ ପାଇଁ ବିଭିନ୍ନ ଦଳ ପକ୍ଷରୁ ପ୍ରାର୍ଥୀ ଘୋଷଣା ଚାଲିଛି । ନୂଆ ନୂଆ ପ୍ରାର୍ଥୀ ମଧ୍ୟ ମଇଦାନକୁ ଓହ୍ଲାଉଛନ୍ତି । ଏଥର ରାଜନୀତିରେ ନିଜର ଭାଗ୍ୟ ପରୀକ୍ଷା କରିବାକୁ ଯାଉଛନ୍ତି କୁଖ୍ୟାତ ଚନ୍ଦନ କାଠ ମାଫିଆ ତଥା ଜଙ୍ଗଲ ଦସ୍ୟୁ ନାମରେ ପରିଚିତ ଦିବଙ୍ଗତ ବୀରାପ୍ପାନଙ୍କ ଝିଅ ବିଦ୍ୟା ରାଣୀ । ଏଥର ସେ ଲୋକସଭା ନିର୍ବାଚନ ଲଢିବାକୁ ଯାଉଛନ୍ତି । ଏପ୍ରିଲ ୧୯ରେ ତାମିଲନାଡୁରେ ହେବାକୁ ଥିବା ଲୋକସଭା ନିର୍ବାଚନରେ ସେ ନିଜର ଭାଗ୍ୟ ପରୀକ୍ଷା କରିବେ । ତାମିଲ ରାଷ୍ଟ୍ରବାଦୀ ପାଟ ଟିକେଟରେ କୃଷ୍ଣାଗିରି ଲୋକସଭା ସିଟରୁ ନିର୍ବାଚନ ଲଢିବେ । ନିଟଟରେ ତାଙ୍କୁ ବିଜେପି ଯୁବ ଶାଖାର ଉପ ସଭାପତି ପଦ ମିଳିଥିଲା । ମାତ୍ର ଅଭିନେତା ତଥା ନିର୍ଦ୍ଦେଶକ ସୀମାନଙ୍କ ନେତୃତ୍ୱାଧୀନ ଏନଟିକେରେ ମିଶିବା ପାଇଁ ବିଜେପି ଛାଡିଥିଲେ ।
ସୀମାନ ଚେନ୍ନାଇରେ ଏକ ଜନସଭାରେ ତାମିଲନାଡୁ ଓ ପୁଡୁଚେରୀରେ ନିର୍ବାଚନ ଲଢୁଥିବା ସମସ୍ତ ୪୦ ପ୍ରାର୍ଥୀଙ୍କ ପରିଚୟ ଦେଇ କହିଛନ୍ତି, ବିଦ୍ୟା ରାଣୀ କୃଷ୍ଣାଗିରିରୁ ଏନଟିକେ ଟିକେଟରେ ନିର୍ବାଚନ ଲଢିବେ । ପେଶାରେ ଓକିଲାତି କରୁଥିବା ବିଦ୍ୟା ରାଣୀ କୃଷ୍ଣାଗିରିରେ ଏକ ସ୍କୁଲ ଚଳାଉଛନ୍ତି । ବେଙ୍ଗାଲୁରୁ ସହର ସହ ତାଙ୍କର ଗଭୀର ସଂପର୍କ ରହିଛି । କାରଣ ସେଠାରେ ସେ ୫ ବର୍ଷ ଧରି ଲ କୋର୍ସ କରୁଥିଲେ । ସେ କୁହନ୍ତି ଯେ, ଥରୁଟିଏ କେବଳ ପିତା ବୀରାପ୍ପାନଙ୍କୁ ଭେଟିଥିଲେ । ତାଙ୍କ ପିତା ତାଙ୍କ ଜୀବନକୁ ନୂତନ ଦିଗ ଦେଇଛନ୍ତି । ସେ ତୃତୀୟ ଶ୍ରେଣୀରେ ପଢୁଥିବା ବେଳେ ତାମିଲନାଡୁ-କର୍ଣ୍ଣାଟକ ସୀମାରେ ଗୋପୀନାଥନରେ ନିଜର ଦାଦାଙ୍କ ଘରେ ବାପା ବୀରାପ୍ପାନଙ୍କୁ ଶେଷ ଥର ଦେଖିଥିଲେ ।
ବିଦ୍ୟା ରାଣୀ କୁହନ୍ତି ବାପାଙ୍କ ସହ ପ୍ରାୟ ୩୦ ମିନିଟ୍ ଧରି ସେ କଥା ହୋଇଥିଲା । ଏହି ସମୟରେ ବାପା ତାଙ୍କୁ ଡାକ୍ତରୀ ପାଠ ପଢି ଲୋକଙ୍କ ସେବା କରିବାକୁ କହିଥିଲେ । ଖୁବ୍ ପରିଶ୍ରମ କରି ନାଁ କରିବାକୁ ସେ କହିଥିଲେ । ଆଜି ମୁଁ ଜୀବନରେ ଯେଉଁ ସ୍ତରରେ ପହଂଚିଛି ତାହା ବାପା ବୀରାପ୍ପାନଙ୍କ ଉପଦେଶ ହିଁ ଗୁରୁତ୍ୱପୂର୍ଣ୍ଣ ରହିଥିବା ବିଦ୍ୟା କହିଛନ୍ତି ।