ଓଡ଼ିଶା ଡଟ୍ ନ୍ୟୁଜ୍

11/07/2024 at 12:09 PM

କବିସୂର୍ଯ୍ୟନଗର: ଘଟଣା ଅତି ନୃଶଂସ । ଆମାନବୀୟ । ଅକ୍ଷମଣୀୟ । ଯିଏ ଶୁଣୁଛି, ଶିହିରି ଯାଉଛି । ଆଉ ମନକୁ ଗୋଟିଏ ପ୍ରଶ୍ନ ଆସୁଛି, ପଶୁ ବି ଏମିତି ବ୍ୟବହାର ଦେଖାଇବେ ନି । ଆଉ ଏଇ ତ ନିଜକୁ ସର୍ବଶେ୍ରଷ୍ଠ ମଣୁଥିବା ମଣିଷ । କ’ଣ ମଦ ନିଶରେ ମରିଗଲା ମଣିଷ ପଣିଆ ? କାମ ବାସନାରେ ରାକ୍ଷସ ପାଲଟିଗଲା ମଣିଷ ? ଚାରି ଚାରି ଜଣ ଗଣ ଦୁଷ୍କର୍ମ କଲେ । ସେଥିରେ ବି ମନ ଶାନ୍ତି ହେଲା ନି ମହିଳାଙ୍କ ଯୌନାଙ୍ଗରେ ମଦ ବୋତଲ ପୂରାଇ ଦେଲେ । ଏମିତି ଅଭିଯୋଗ ଆସିଛି ଗଞ୍ଜାମ ଜିଲ୍ଲାରୁ ।

କବିସୂର୍ଯ୍ୟନଗର ଥାନା ଅନ୍ତର୍ଗତ ଖଇରପଲ୍ଲୀ ଗ୍ରାମ ହ୍ରଦ ନିକଟରୁ ଜଣେ ମହିଳାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଛି ।  ତାଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଛି । ମହିଳାଙ୍କ କହିବା ଅନୁଯାଇ, ତାଭ୍କୁ ଗଣ ଦୁଷ୍କର୍ମ କରିବା ପରେ ଦୁର୍ବୃତ୍ତମାନେ ତାଙ୍କ ଯୌନାଙ୍ଗରେ ମଦ ବୋତଲ ପୂରାଇ ଦେଇଥିଲେ । ମହିଳାଙ୍କ ଘର ବୁଗୁଡ଼ା ଅଞ୍ଚଳରେ ବୋଲି ଜଣାପଡ଼ିଛି ।

ସୂଚନା ଅନୁସାରେ, ମଙ୍ଗଳବାର ଅପରାହ୍ଣରେ ୪ ଜଣ ବ୍ୟକ୍ତି ନିଶାଶକ୍ତ ଅବସ୍ଥାରେ ମହିଳାଙ୍କୁ ଖଇରପଲ୍ଲୀ ଗ୍ରାମ ନିକଟ ପାହାଡ଼ ନିକଟକୁ ଟେକି ନେଇଥିଲେ । ସେଠାରେ ସେମାନେ ମହିଳାଙ୍କୁ ଗଣ ଦୁଷ୍କର୍ମ କରିବା ସହ ମାଡ଼ ମାରିଥିଲେ । ଏଥିହସହ ମହିଳାଙ୍କ ଯୌନାଙ୍ଗରେ ଅଭିଯୁକ୍ତମାନେ ମଦ ବୋତଲ ପୂରାଇ ଦେଇଥିଲେ । ଗତକାଲି ମହିଳାଙ୍କୁ ଖଇରପଲ୍ଲୀ ଗ୍ରାମ ହ୍ରଦ ନିକଟରୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଥିଲା । ପୋଲିସ ମହିଳାଙ୍କୁ କବିସୂର୍ଯ୍ୟନଗର ମେଡ଼ିକାଲରେ ଭର୍ତ୍ତି କରି ଘଟଣାର ତଦନ୍ତ ଆରମ୍ଭ କରିଛି ।

ଅନ୍ୟପକ୍ଷରେ ମହିଳାଙ୍କ ସହ ପାଶବିକ ଅତ୍ୟାଚାର କରିଥିବା ବ୍ୟକ୍ତିମାନେ ବାବନପୁର ଅଞ୍ଚଳର ହୋଇଥିବା ପ୍ରାଥମିକ ତଦନ୍ତରୁ ଜଣାପଡିଛି । ତେବେ ଏନେଇ ପୋଲିସର ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ । ଗଞ୍ଜାଇ ବ୍ୟବସାୟକୁ କେନ୍ଦ୍ର କରି ମହିଳାଙ୍କ ଉପରେ ପ୍ରତିଶୋଧ ନେବାକୁ ଅଭିଯୁକ୍ତମାନେ ଏହି କାଣ୍ଡ ଭିଆଇ ଥିବା ଅଭିଯୋଗ ହେଉଛି ।