ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ16/07/2024 at 1:27 PM
ଭୁବନେଶ୍ୱର: ରାଜ୍ୟରେ ବିଜେପି ନେତୃତ୍ୱାଧିନ ମୋହନ ମାଝୀ ସରକାରକୁ ମାସେ ପୂରିଲାଣି । ସରକାର ନିର୍ବାଚନୀ ପ୍ରତିଶ୍ରୁତି ପୂରଣ ଦିଗରେ ପଦକ୍ଷେପ ନେଉଛନ୍ତି । କିଛି ପୂରଣ ହୋଇଥିବା ବେଳେ ଅନେକ କିଛି ବାକି ରହିଛି । କିନ୍ତୁ ନିର୍ବାଚନ ବେଳେ ପୂର୍ବର ବିଜେଡି ସରକାରରେ ହୋଇଥିବା ଯେତେ ସବୁ ଦୁର୍ନୀତି ଓ ଭ୍ରଷ୍ଟାଚାରର ଖୋଳତାଡ ଦିଗରେ ପୁରା ଉଦାସୀନତା ରହିଛି ମୋହନ ମାଝୀ ସରକାର । ଓଲଟା ବିଜେଡି ସରକାରରେ ଦଳୀୟ କାମ କରୁଥିବା ଆଇପିଏସ ଓ ଆଇଏଏସ ମାନଙ୍କୁ ବିଜେପି ସରକାର ଥଇଥାନ କରୁଛି । ମୋହନ ମାଝୀ ସରକାରର ଏହି ଆଭିମୁଖ୍ୟ ଆଗାମୀ ଦିନରେ ଦଳ ପାଇଁ ବୁମେରାଂ ମଧ୍ୟ ପାଲଟିପାରେ । କାରଣ ସଂପ୍ରତି ରାଜନୈତିକ ଦୃଶ୍ୟପଟ୍ଟ ଆଗାମୀ ସମୟରେ କେଉଁ ମୋଡ ନେବ ତାହା କହିହେବ ନାହିଁ । ବିଶେଷ କରି ଜାତୀୟ ରାଜନୀତିର ସମୀକରଣ ରାଜ୍ୟ ରାଜନୀତିକୁ ବହୁତ ପ୍ରଭାବିତ କରିବାର ସମ୍ଭାବନା ରହିଛି ।
କେନ୍ଦ୍ରରେ ମଧ୍ୟ ବିଜେପିର ସ୍ଥିତି ସେତେଟା ଭଲ ନୁହେଁ । ଦଳ ୨୦୧୯ ନିର୍ବାଚନ ତୁଳନାରେ ୬୦ଟି ସିଟ୍ ହରାଇ ଏନଡିଏ ଭରସାରେ ବିଶେଷ କରି ଚନ୍ଦ୍ରବାବୁ ନାଇଡୁ ଓ ନୀତିଶ କୁମାରଙ୍କ ଭରସାରେ ଚାଲିଛି । ଜଣା ନାହିଁ ଏହି ଦୁଇ ନେତା କେବେ ପଲଟିଯିବେ । କାରଣ ବିରୋଧୀ ଇଣ୍ଡିଆ ମେଣ୍ଟ ଦୃଢ ସ୍ଥିତିରେ ରହିଛି । ତେବେ ଦେଶ ସହ ରାଜ୍ୟର ରାଜନୈତିକ ଦୃଶ୍ୟପଟ୍ଟ କେଉଁ ଦିଗକୁ ଯିବ ତାହା ଆଗାମୀ କିଛି ରାଜ୍ୟର ବିଧାନସଭା ନିର୍ବାଚନ ଉପରେ ନିର୍ଭର କରେ । ଆଗାମୀ ୬ ମାସରେ ଦେଶରେ ମହାରାଷ୍ଟ୍ର, ଝାଡଖଣ୍ଡ ଓ ହରିୟାଣାରେ ବିଧାନସଭା ନିର୍ବାଚନ ହେବାକୁ ଯାଉଛି । ବିଶେଷ କରି ମହାରାଷ୍ଟ୍ର ନିର୍ବାଚନ ବେଶ ଗୁରୁତ୍ୱ ବହନ କରୁଛି । ଯଦି ଏହି ତିନି ରାଜ୍ୟରେ କଂଗ୍ରେସ ଓ ଇଣ୍ଡିଆ ମେଣ୍ଟ ଭଲ ପ୍ରଦର୍ଶନ କରେ କିମ୍ବା ମହାରାଷ୍ଟ୍ରରେ ସରକାର ଗଢେ ତେବେ ବ୍ୟାକଫୁଟକୁ ଆସିପାରେ ଏନଡିଏ ସରକାର । ଇଣ୍ଡି ମେଣ୍ଟ ଯେତିକି ଦୃଢ ହେବ ସେତିକି ଦଳ ଏହି ମେଣ୍ଟ ଆଡକୁ ଢଳିବାର ସମ୍ଭାବନାକୁ ଏଡାଇ ଦିଆଯାଇ ନ ପାରେ । ବିଶେଷ କରି ନୀତିଶ କୁମାରଙ୍କ ଟ୍ରାକ ରେକର୍ଡ ଏହା କହୁଛି ।
ଏହି ତିନି ରାଜ୍ୟ ମଧ୍ୟରୁ ମହାରାଷ୍ଟ୍ର ଓ ଝାଡଖଣ୍ଡରେ ଇଣ୍ଡିଆ ମେଣ୍ଟ ଜିତିଗଲେ କେନ୍ଦ୍ର ରାଜନୀତିରେ ଏମାନଙ୍କ ପଲ୍ଲା ଭାରି ରହିବ । କୌଣସି ସମୟରେ ବି ଏନଡିଏ ସରକାର ଭାଙ୍ଗି ବି ପାରେ । ସେମିତିରେ ବି ଚନ୍ଦ୍ରବାବୁ ନାଇଡୁ ନିଜ ରାଜ୍ୟର ଉନ୍ନତି ପାଇଁ ସ୍ୱତନ୍ତ୍ର ପ୍ୟାକେଜ ସହ ଅନେକ ଦାବି ରଖିଛନ୍ତି । ତେଣୁ ନାଇଡୁ ଓ ନୀତିଶଙ୍କ ସମର୍ଥନରେ ତିଷ୍ଠି ଥିବା ଏନଡିଏ ସରକାର ଉପରେ ସର୍ବଦା ଖଣ୍ଡା ଝୁଲୁଥିବା କହିଲେ ଅତ୍ୟୁକ୍ତି ହେବନି । ଏମିତି ସ୍ଥିତି ଉପୁଜିଲେ କେନ୍ଦ୍ର ସରକାର ସହ ଓଡିଶାରେ ରାଜ୍ୟର ବିଜେପି ସରକାର ମଧ୍ୟ ବ୍ୟାକଫୁଟକୁ ଆସିବ । କାରଣ କେନ୍ଦ୍ର ସରକାରଙ୍କ ଭରସା ହିଁ ଏଠାରେ ସରକାର ଚାଲିଛି । କେନ୍ଦ୍ରର ଦଦୁଲ୍ୟମାନ ସ୍ଥିତିରେ ରାଜ୍ୟର ସମୀକରଣ ବି ବଦଳିଯିବ ।
ଯଦି ଏମିତି ସ୍ଥିତିରେ ଲୋକସଭାର ଉପ ନିର୍ବାଚନ କରାଯାଏ ରାଜ୍ୟରେ ବିଜେଡି ସ୍ଥିତି ପୂର୍ବାପେକ୍ଷା ମଜବୁତ ହୋଇପାରେ । ଦଳ ଲୋକସଭାରେ ୮ରୁ ୧୦ ସିଟ୍ ଜିତିବାର ସମ୍ଭାବନାକୁ ଏଡାଇ ଦିଆଯାଇ ନ ପାରେ । ଏତେ ସିଟ୍ ଜିତିବା ପଛର କାରଣ ବିଜେପି ହିଁ ରହିଛି । କାରଣ ରାଜ୍ୟ ବିଜେପି ନିର୍ବାଚନ ଜିତିବା ପରେ ବିଜେଡି ନେତାଙ୍କ ବିରୋଧରେ ସେମିତି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରି ପାରିନାହିଁ । ନିର୍ବାଚନ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କଠୁ ନେଇ ରାଜ୍ୟର ନେତାମାନେ ଡିଣ୍ଡିମ ପିଟୁଥିଲେ ଯେ, ଏହି ଭ୍ରଷ୍ଟାଚାର ସରକାରର ସବୁ ଦୁର୍ନୀତିର ତଦନ୍ତ ହେବ ଏବଂ କାହାରିକୁ ଛଡାଯିବ ନାହିଁ । ଜମି, ବାଲି, ପାଣି ଏସବୁ ମାଫିଆମାନଙ୍କୁ ଜେଲ ହାଜତକୁ ପଠାଯିବ । ଏପରିକି ପ୍ରଶାସନିକ ପଦରେ ଥାଇ ଯେଉଁମାନେ ବିଜେଡି ପାଇଁ କାମ କରୁଥିଲେ ସେମାନଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ନିଆଯିବ ବୋଲି ବିଜେପିର ନେତାଗଣ ରାଲିରେ କହୁଥିଲେ ।
କିନ୍ତୁ ନିର୍ବାଚନ ଜିତିବା ପରେ ଓଲଟା ଚିତ୍ର ଦେଖିବାକୁ ମିଳିଛି । ଯେଉଁ ଲକ୍ଷ୍ମୀ ବସ ଜରିଆରେ ବିଜେଡି ୧୧୦୦ରୁ ଅଧିକ କୋଟିର ଦୁର୍ନୀତି ହୋଇଥିବା ବିଜେପି କହୁଥିଲା, ସେହି ମୋହନ ମାଝୀ ସରକାର ନାଁ ଓ ରଙ୍ଗ ବଦଳାଇ ଦୁର୍ନୀତିକୁ ଚାପି ଦେଇଥିବା କୁହାଯାଉଛି । ପ୍ରଥମ ଥର ସରକାର ଗଢିଥିବା ବିଜେପି ସରକାର ବିଜେଡି ଏବଂ ଦୁର୍ନୀତି ବିରୋଧରେ ନିଜର ଛବି ତିଆରି ପାରିଲା ନାହିଁ । ଦୁର୍ନୀତିରେ ଛନ୍ଦି ହୋଇ ପଡିଥିବା ଜଣେ ବି ବିଜେଡି ନେତାଙ୍କ ଦୋଷ ପ୍ରମାଣିତ କରି ପାରି ନାହାନ୍ତି । ଯାହାର ସନ୍ଦେଶ ଜନତାଙ୍କ ନିକଟକୁ ଯିବ ଯେ, ବିଜେପି ଦଳ କେବଳ ନିର୍ବାଚନୀ ଭାଷଣବାଜି କରୁଥିଲା । ବିଜେଡି ନେତାଙ୍କ ବିରୋଧରେ ଯେଉଁ ସବୁ ଦୁର୍ନୀତି ହୋଇଥିବା କୁହାଯାଉଥିଲା, ସେଥିରେ ସତ୍ୟତା ନାହିଁ । ଆଉ ଏହାର ଫାଇଦା ବିଜେଡିକୁ ମିଳିବାର ଯଥେଷ୍ଟ ସମ୍ଭାବନା ରହିଛି । ଆଉ ଏହାର କ୍ଷତିର ଭରଣା କରିବା ବିଜେପି ପକ୍ଷେ ମୁସ୍କିଲ ହୋଇ ପଡିବ । ଓଡିଶାବାସୀ ମଧ୍ୟ ଏଥର ନିର୍ବାଚନରେ ସ୍ପଷ୍ଟ ସଙ୍କେତ ଦେଇଛନ୍ତି ଯେ, ସେମାନେ ଆଉ ନେତାଙ୍କ ଭାଷଣବାଜିକୁ ଭରସା କରିବେ ନାହିଁ ଏବଂ କାମ ଆଧାରରେ ଏବଂ ପ୍ରତିଶ୍ରୁତି ପୂରଣ ଆଧାରରେ ଭୋଟ୍ ଦେବେ।