ସୌମିତ୍ରି ମେହେର6/08/2024 at 10:45 AM
ଉଲୁଣ୍ତା : (ସୌମିତ୍ରି ମେହେର)
ଶ୍ରାବଣ ମାସର ତୃତୀୟ ସୋମବାର ବୀରମହାରାଜପୁର ଉପଖଣ୍ଡ ର ବିଭିନ୍ନ ଶିବାଳୟ ମାନଙ୍କରେ ବୋଲବମ ଭକ୍ତଙ୍କ ଗହଳି ଲାଗି ରହିଥିବା ବେଳେ କେହି କେହି କାଉଡିଆମାନେ ଜିଲ୍ଲା ତଥା ଜିଲ୍ଲା ବାହାରକୁ ଯାଇ ଶିବଙ୍କର ମସ୍ତକରେ ପାଣି ଢାଲୁ ଥିବା ଦେଖିବାକୁ ମିଳିଛି I ସେହିପରି ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ଅଞ୍ଚଳର ଦୁଇ ଜଣ କାଉଡିଆ ସାଥି ହୋଇ ଏକ ବାଇକ ଯୋଗେ ହୁମା ବକ୍ର ମନ୍ଦିର ଅଭିମୁଖେ ବାହାରି ଥିଲେ l ହେଲେ ସୋନପୁର – ସମ୍ବଲପୁର ମୁଖ୍ୟ ରାସ୍ତା ଉପରେ ଥିବା ସାଲେସିଂ ବୁଲାଣୀରେ ବାଇକ କୁ ପିକଅପ୍ ଧକ୍କା ଦେଇଥିଲା I ଦୁର୍ଘଟଣା ର ଶିକାର ହୋଇ ଜଣକର ମୃତ୍ୟୁ ଘଟିଥିବା ବେଳେ ଅନ୍ୟ ଜଣଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ବୁର୍ଲା ସ୍ଥାନାନ୍ତରିତ କରାଯାଇଛି l ଦୁର୍ଘଟଣା ରେ ମୃତ୍ୟୁବରଣ କରିଥିବା ମୃତକ ଜଣକ ହେଲେ ବୀରମହାରାଜପୁର ବ୍ଲକ ଅନ୍ତର୍ଗତ ଲୁଚୁରପଙ୍କ ଗ୍ରାମ ସୁଧାଂଶୁ ଭୁକ୍ତା (20 ବର୍ଷ) l ଗୁରୁତର ଆହତ ଜଣକ ହେଲେ ଉଲୁଣ୍ଡା ବ୍ଲକ ଅନ୍ତର୍ଗତ ଦକ୍ଷିଣିପାଲି ଗ୍ରାମର ପୁଟୁ ଭୁକ୍ତା ବୋଲି ଜଣାପଡିଛି l ମୃତ ସୁଧାଂଶୁ ଜଣେ ରାଜମିସ୍ତ୍ରୀ ଭାବେ ପ୍ରାୟ ଏକ ମାସ ହେବ ଦକ୍ଷିଣିପାଲି ରେ ରହି କାମ କରୁଥିଲେ I ଉଭୟେ ସାଙ୍ଗ ହୋଇ ସୋମବାର ସକାଳୁ ଏକ ବାଇକ (ନଂ ଓ ଡି 31- ଏଲ୍. 5314) ରେ ଧମା ପଟକୁ ଯାଉଥିବା ବେଳେ ଅପରପାର୍ଶ୍ୱ ସମ୍ବଲପୁର ଆଡୁ ଆସୁଥିବା ଏକ ପିକଅପ୍ ( ନ. ଓ ଆର୍ 15 .ୱାଇ. 5635) ସେମାନଙ୍କୁ ମୁହାମୁହିଁ ଧକ୍କା ଦେଇଥିଲା I ଖବର ପାଇ ଉଲୁଣ୍ଡା ଦମକଳ ଘଟଣା ସ୍ଥଳରେ ପହଞ୍ଚି ମୁର୍ମୁଷୁ ଅବସ୍ଥାରେ ଉଭୟଙ୍କୁ ଉଲୁଣ୍ଡା ଡାକ୍ତର ଖାନା ପହଞ୍ଚାଇ ଥିଲା l ଅଧିକ ଗୁରୁତର ଥିବା ଯୋଗୁଁ ତୁରନ୍ତ ସେମାନଙ୍କୁ ବୁର୍ଲା ମେଡିକାଲ କୁ ସ୍ଥାନାନ୍ତରିତ କରାଯାଇଥିଲା I ସୁଧାଂଶୁ କୁ ସେଠାରେ ଡ଼ାକ୍ତର ମୃତ ଘୋଷଣା କରିଥିଲେ I