ଓଡ଼ିଶା ଡଟ୍ ନ୍ୟୁଜ୍

19/08/2024 at 3:55 PM

ବୁଗୁଡ଼ା: ଗଞ୍ଜାମ ଜିଲ୍ଲା ଦକ୍ଷିଣ ଘୁମୁସର ବନଖଣ୍ଡ ବୁଗୁଡ଼ା ବନାଞ୍ଚଳ ହୀରାପଲ୍ଲୀ ଜଙ୍ଗଲରେ ବାଘ ଆତଙ୍କ । ବାଘ ବୁଲୁଥିବା ଖବର ପ୍ରଚାରିତ ହେବା ପରେ ଆଖପାଖ ଅଞ୍ଚଳରେ ଲୋକଙ୍କ ମନରେ କୋକୁଆ ଭୟ । ସ୍ଥିତି ଏମିତି ଯେ, ଲୋକେ ଘରୁ ପଦାକୁ ଗୋଡ଼ କାଢ଼ିବାକୁ ସୁରକ୍ଷିତ ମଣୁ ନାହାନ୍ତି ।
ହୀରାପଲ୍ଲୀ ଗାଁରେ ଗୋଟିଏ ଗାଈକୁ ବାଘ ମାରି ଖାଇଥିବା ଅଭିଯୋଗ ହୋଇଛି । ଗାଁର ଗାଈ ଚରାଳିମାନେ ଜଙ୍ଗଲକୁ ଯାଇଥିବା ବେଳେ, ଗାଈଟିକୁ ବାଘ ଆକ୍ରମଣ କରିଥିଲା । ଫଳରେ ସେଠାରେ ତା’ର ମୃତ୍ୟୁ ଘଟିଥିଲା ।
ଏନେଇ ଗାଈ ଚରାଳିମାନେ ଗାଁ ଲୋକଙ୍କୁ କହିବା ପରେ ଗାଁ ଲୋକେ ଜଙ୍ଗଲ ଯାଇ ବାଘ ପାଦଚିହ୍ନ ଓ ମୃତ ଗାଈକୁ ଠାବ କରିଥିଲେ । ବାଘ ଆତଙ୍କ ପରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି ।
ଖବର ପାଇ ବୁଗୁଡା ଓ ଓଡଗାଁ ବନାଞ୍ଚଳ ଅଧିକାରୀ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି । ବୁଗୁଡା ପ୍ରାଣୀଧନ ଚିକିତ୍ସକ ମୃତ ଗାଈର ଶବ ବ୍ୟବଚ୍ଛେଦ ଲାଗି ପଠାଇଛନ୍ତି । ଏହା ବାଘ ନା ଅନ୍ୟ କେଉଁ ଜନ୍ତୁ ତାହା ସ୍ପଷ୍ଟ କରିନି ବନବିଭାଗ ।