ଓଡ଼ିଶା ଡଟ୍ ନ୍ୟୁଜ୍24/08/2024 at 5:46 PM
ବୌଦ୍ଧ: ରଇଠାଣି ବାଇପାସ ଛକରେ ମର୍ମନ୍ତୁଦ ଦୁର୍ଘଟଣା । ଏକ ବାଇକ ଉପରେ ଚଢ଼ି ଯାଇ ଟ୍ରକ୍ଟି ଓଲଟି ପଡ଼ିଲା । ଫଳରେ ଘଟଣାସ୍ଥଳରେ ବାଇକ୍ରେ ଯାଉଥିବା ଜଣେ ଛାତ୍ରୀଙ୍କ ମୃତ୍ୟୁ ଘଟିଥିବା ବେଳେ ୨ ଜଣ ଗୁରୁତର ହୋଇଛନ୍ତି । ଟ୍ରକ୍ ଡ୍ରାଇଭର ବି ଦୁର୍ଘଟଣାରେ ଗୁରୁତର ହୋଇଛନ୍ତି । ସମସ୍ତ ୩ ଗୁରୁତରଙ୍କୁ ବୁର୍ଲା ମେଡିକାଲରେ ଭର୍ତ୍ତି କରାଯାଇଛି ।
ମୃତ ଛାତ୍ରୀ ଜଣକ ହେଲେ ୧୭ ବର୍ଷୀୟ ପାୟଲ ରାଜହଂସ । ଏହି ଦୁର୍ଘଟଣାରେ ଗୁରୁତର ଦ୍ୱୟ ହେଲେ ଶ୍ରୀତମ ବେହେରା ଏବଂ ଆରତୀ ଝାଙ୍କର । ୩ ଜଣଙ୍କ ବୟସ ୧୭ ବର୍ଷ ପାଖାପାଖି ହେବ ବୋଲି ଜଣାଯାଇଛି । ଏମାନେ ବୌଦ୍ଧରେ ଥିବା ଏକ କମ୍ପ୍ୟୁଟର ଇନଷ୍ଟିଚ୍ୟୁଟରେ ନାମ ଲେଖାଇଥିଲେ । ମାତ୍ର ସେଠାରୁ ତାଙ୍କୁ ଏକ ଆୟୂବେଦିକ କମ୍ପାନୀର ମାର୍କେଟିଂ ପାଇଁ ପଠାଯାଉଥିଲା । ଅଧିକ ଟଙ୍କାର ଲୋଭ ଦେଖାଇ ସେମାନଙ୍କୁ ଗୋଟିଏ ବାଇକ୍ ଯୋଗେ ଦୂରଦୂରାନ୍ତକୁ ପଠାଯାଉଥିଲା ।
ଆଜି ସକାଳେ ବି ୩ ଜଣ ଘରୁ ଖାଇ ପିଇ ବାହାରିଥିଲେ । ସେମାନେ ଏକ ବାଇକରେ ଯାଉଥିବା ବେଳେ ବାଇପାସ ଛକରେ ସାମନାରୁ ଆସୁଥିବା ଟ୍ରକଟି ବାଇକ୍ ଉପରେ ଚଢ଼ି ଯାଇଥିଲା । ଫଳରେ ଘଟଣାସ୍ଥଳରେ ହିଁ ପାୟଲଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଦୁଇ ଜଣଙ୍କୁ ବୁର୍ଲା ସ୍ଥାନାନ୍ତର କରାଯାଇଛି ।
ଏହି ଦୁର୍ଘଟଣା ଘଟାଇ ଟ୍ରକ୍ଟି ରାସ୍ତା କଡ଼ରେ ଓଲଟି ପଡ଼ିଥିଲା । ସ୍ଥାନୀୟ ଲୋକେ ଟ୍ରକ୍ ଭିତରୁ ଡ୍ରାଇଭରଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ବୁର୍ଲା ପଠାଇଛନ୍ତି ।
ରଇଠାଣି ବାଇପାସ ଛକରେ ସବୁବେଳେ ଦୁର୍ଘଟଣା ଘଟି ଜୀବନହାନୀ ହେଉଥିବାରୁ ସେଠାରେ ହମ୍ପସ୍ ସହ ଟ୍ରାଫିକ୍ ପୋଲିସ୍ ମୁତୟନ ଦାବିରେ ସ୍ଥାନୀୟ ଲୋକେ ଧାରଣ ଦେବା ସହ ମୃତା ଛାତ୍ରୀଙ୍କ ପରିବାର କ୍ଷତିପୂରଣ ଦେବାକୁ ଦାବି କରିଛନ୍ତି ।
ପୋଲିସ୍ ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିବା ସହ ଘଟଣାର ତଦନ୍ତ ଆରମ୍ଭ କରିଛି ।