ଓଡ଼ିଶା ଡଟ୍ ନ୍ୟୁଜ୍

15/09/2024 at 12:43 PM

ଭୁବନେଶ୍ବର: ଅସୁରକ୍ଷିତ ରାଜଧାନୀ ଭୁବନେଶ୍ବର । ରାତି ତ ରାତି ଦିନରେ ବି ରାସ୍ତାରେ ଚାଲିବା ମୁସ୍କିଲ । କାରଣ ରାସ୍ତାରେ ଠାଏ ଠାଏ ଘୁରୁ ବୁଲୁଛନ୍ତି ଚେନ୍ ଲୁଟେରା । ସାମନ୍ୟ ସୁଯୋଗ ମିଳିଲେ ମହିଳାଙ୍କୁ ଉପରେ ଝାମ୍ପି ପଡୁଛନ୍ତି ଓ ବେକରୁ ଚେନ୍ ଛିଡ଼ାଇ ଆଖି ପିଛୁଳାକେ ଚମ୍ପଟ ମାରୁଛନ୍ତି । ଏମିତି ଘଟଣା ଦେଖିବାକୁ ମିଳିଛି କଳିଙ୍ଗ ବିହାର ଅଞ୍ଚଳରେ । ଜଣେ ବୟସ୍କ ମହିଳାଙ୍କ ବେକରୁ ଚେନ୍ ଲୁଟି ଫେରାର ହୋଇ ଯାଇଛନ୍ତି ଚେନ୍ ସ୍ନାଚର୍ । ଲୁଟ୍ ସମୟର ପୂରା ଘଟଣା ସିସିଟିଭି କ୍ୟାମେରାରେ ହୋଇଛି କଏଦ ।

ଅଭିଯୋଗ ଅନୁସାରେ, କେ-୪ ଅଞ୍ଚଳର ଜଣେ ମହିଳା ପ୍ରାତଃ ଭ୍ରମଣ ସାରି ଘରକୁ ଫେରୁଥିଲେ । ଏହି ସମୟରେ ଏକ ପଲସର୍ ଗାଡ଼ିରେ ୨ଜଣ ଦୁର୍ବୃତ୍ତ ଗଳି ପାଖରେ ଛକି ରହିଥିଲେ । ବାଇକ୍ ଚଲାଉଥିବା ଯୁବକ ଜଣକ ଗାଡ଼ିକୁ ଷ୍ଟାର୍ଟରେ ରଖିଥିବା ବେଳେ ଅନ୍ୟ ଜଣେ ରାସ୍ତାରେ ଠିଆହୋଇ ରହିଥିଲା । ମହିଳା ଜଣକ ଗଳିରେ ବୁଲିବା ମାତ୍ରେ ରାସ୍ତାରେ ଛିଡ଼ା ହୋଇଥିବା ଯୁବକ ତାଙ୍କ ବେକରୁ ଚେନ୍ ଝାମ୍ପି ନେଇଥିଲା । ପରେ ଉଭୟ ବାଇକରେ ବସି ଫେରାର ହୋଇଯାଇଥିଲେ ।

ସିସିଟିଭି ଫୁଟେଜରେ ଚେନ୍ ଝାମ୍ପୁଥିବା ଦୁର୍ବୃତ୍ତର ମୁହଁ ସ୍ପଷ୍ଟ ଭାବେ ଦେଖାଯାଉଛି । ଏନେଇ ଥାନାରେ କୌଣସି ଅଭିଯୋଗ ହୋଇ ନଥିବା ବେଳେ ତମାଣ୍ଡୋ ଥାନା ପୋଲିସ ନିଜ ଆଡ଼ୁ ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି ।