ଓଡ଼ିଶା ଡଟ୍ ନ୍ୟୁଜ୍

26/09/2024 at 11:27 AM

ବାରିପଦା: ରାତିରେ ଶୋଇଥିବା ବେଳେ ଜଣେ ମହିଳାଙ୍କୁ ଘରୁ ଟାଣି ନେଇ କଚାଡି ମାରି ଦେଲା ଦନ୍ତା ହାତୀ । ମୟୂରଭଞ୍ଜ ଜିଲ୍ଲା ବେତନଟୀ ଥାନା ବାରିପଦା ରେଞ୍ଜ ଅଧୀନ ରାଧିକାଶୋଳ ଗାଁରେ ଘଟିଛି ଏମିତି ଘଟଣା । ଯାହାକୁ ନେଇ ଗାଁରେ ଉତ୍ତେଜନା ପ୍ରକାଶ ପାଇଛି । ମୃତା ମହିଳା ଜଣକ ହେଉଛନ୍ତି ମାନକା ହାଁସଦା ।

ଗାଁରେ ହାତୀ ପଶିବା ଆଶଙ୍କା ଥିବାରୁ ଘରୁ ନ ବାହାରିବାକୁ ଗ୍ରାମବାସୀଙ୍କୁ ସତର୍କ କରାଇଥିଲା ବନ ବିଭାଗ । ଡାକବାଜି ଯନ୍ତ୍ର ଦ୍ୱାରା ମଧ୍ୟ ପ୍ରଚାର କରାଯାଇଥିଲା । ଗତକାଲି ବେତନଟୀ ରେଞ୍ଜ ଅଞ୍ଚଳରେ ଥିବା ଏକ ଦନ୍ତା ୧୮ ନଂ ଜାତୀୟ ରାଜପଥ ଅତିକ୍ରମ କରି ଭୋର ସମୟରେ ରାଧିକାଶୋଳ ଗାଁରେ ପଶିଥିଲା । ଗାଁରେ ଉତ୍ପାତ ମଚାଇବା ସହ ୩ରୁ ୪ ଜଣଙ୍କ ଘର ଭାଙ୍ଗିଥିଲା । ଏହାପରେ ଘରେ ଶୋଇଥିବା ମାନକାଙ୍କୁ ଘୋଷାଡ଼ି ନେଇ ଅଗଣାରେ କଚାଡି ଦେଇଥିଲା ।

ଏହି ସମୟରେ ମାନକାଙ୍କ ସ୍ୱାମୀ ସୀତାନାଥ ଅଳ୍ପକେ ବର୍ତ୍ତି ଯାଇଥିଲେ । ଗାଁରେ ହାତୀ ପଶିବାର ଆଶଙ୍କା ଥିଲେ ବି ବନ ବିଭାଗ ପକ୍ଷରୁ ସତର୍କତା ନେଇ ବିଶେଷ ବ୍ୟବସ୍ଥା କରା ନଯିବା କାରଣରୁ ଜଣଙ୍କ ଜୀବନ ଚାଲିଗଲା ବୋଲି ଅଭିଯୋଗ ହୋଇଛି । ବନ ବିଭାଗ ଅପାରଗତକାୁ ନେଇ ଗ୍ରାମବାସୀଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଛି ।

ଗୁରୁବାର ସକାଳେ କୃଷ୍ଣଚନ୍ଦ୍ରପୁର ଫାଣ୍ଡି ଅଧିକାରୀ ଏଏସଆଇ ସୂତାର କୁମାର ମହାନ୍ତ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହିତ ବ୍ୟବଚ୍ଛେଦ ପାଇଁ ବାରିପଦା ଜିଲ୍ଲା ମୁଖ୍ୟ ଡାକ୍ତରଖାନାକୁ ପଠାଇଛନ୍ତି l