ଓଡ଼ିଶା ଡଟ୍ ନ୍ୟୁଜ୍11/10/2024 at 11:25 AM
ପୁରୀ: ନିଶାଡ଼ି ଡ୍ରାଇଭରର ଉନ୍ମତ୍ତକାଣ୍ଡ । ଦୁର୍ଘଟଣାରେ ୪ ଜଣଙ୍କୁ କଲା ଆହତ । ଯିଏ ସାମନାରେ ପଡ଼ିଲା ତାଙ୍କୁ ଧକ୍କା ଦେଲା । ଆହତମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ପୁରୀରେ ଘଟିଛି ଏହି ସିରିଜ୍ ଦୁର୍ଘଟଣା । ଡ୍ରଇଭର ପ୍ରଶାନ୍ତ ମଲ୍ଲିକ ଓ କାରରେ ବସିଥିବା ଯୁବକଙ୍କୁ ଅଟକ ରଖି ତଦନ୍ତ କରୁଛି କୁମ୍ଭାରପଡ଼ା ଥାନା ପୋଲିସ ।
ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ, ଗତକାଲି ବିଳମ୍ବିତ ରାତିରେ ମାର୍କେଟ ଛକ ପଟୁରୁ ଏକ କାର୍ ଦ୍ରୁତଗତିରେ ଆସି ପ୍ରଥମେ ଜଣେ ବ୍ୟକ୍ତିଙ୍କୁ ଧକ୍କା ଦେଇଥିଲା । ପରେ ମାଉସୀ ମା’ ମନ୍ଦିର ସମ୍ମୁଖରେ ସାଇକେଲରେ ଯାଉଥିବା ଜଣେ ଯୁବତୀଙ୍କୁ ଧକ୍କା ଦେଇଥିଲା । ବଳଗଣ୍ଡି ଛକରେ ଗୋଟିଏ ସ୍କୁଟି ଓ ଡାକ୍ତରଖାନା ଛକରେ ଜଣଙ୍କୁ ଧକ୍କା ଦେଇଥିଲା ।
ଏହାପରେ କୁମ୍ଭାରପଡ଼ା ଥାନା ଆଗରେ ଗାଡ଼ି ରଖି ଦୌଡ଼ି ପଳାଇବା ବେଳେ ଡ୍ରାଇଭର ଓ କାରରେ ବସିଥିବା ଯୁବକଙ୍କୁ କାବୁ କରି ପୋଲିସ ଜିମାରେ ଦେଇଥିଲେ ସ୍ଥାନୀୟ ଲୋକେ । ପୋଲିସ ଦୁର୍ଘଟଣାଗ୍ରସ୍ତ ଗାଡ଼ିକୁ ଜବତ କରି ଘଟଣାର ତଦନ୍ତ କରୁଛି ।