ପ୍ରଦୀପ କୁମାର ନାୟକ21/11/2024 at 12:06 PM
ଚିପିଲିମା,ସମ୍ବଲପୁର ବୁର୍ଲାଥାନା ଗୋଶାଳା ବଜାର ପ୍ରାଙ୍ଗଣରେ ଏକ ପୋଲିସ ବିଟହାଉସ ରହିଥିବାବେଳେ, ଅଞ୍ଚଳରେ ଦିନକୁଦିନ ଚୋରୀ, ଡକାୟତି, ଲୁଟ, ହତ୍ୟା ଭଳି ବିଭିନ୍ନ ଅପରାଧିକ ମାମଲା ବଢ଼ିବଢ଼ି ଚାଲିଛି l ଏନେଇ ବିଭିନ୍ନ ଗଣମାଧ୍ୟମରେ ଖବର ପ୍ରକାଶନ ପରେ ପୋଲିସ ତତ୍ୱରତା ଦେଖାଇଛି lଗୋଶାଳା -ଚାଉଁରପୁର ରାସ୍ତାସ୍ଥିତ ଆଇଆଇଏମ ଛକରେ ଏକ ପୋଲିସ ଏଡ଼ପୋଷ୍ଟ ଖୋଲାଯାଇଥିବାବେଳେ, ଅଞ୍ଚଳବାସୀଙ୍କ ମନରେ ସାମାନ୍ୟ ଆଶ୍ବସ୍ତି ଆସିଛି l ମିଳିଥିବା ସୂଚନା ଅନୁଯାୟୀ ହୀରାକୁଦ ଏସଡିପିଓ ଅମ୍ବିତ ମହାନ୍ତି ଆସି ଏଡପୋଷ୍ଟର ଉଦଘାଟନ କରିଥିଲେ l ଏହି ପୋଲିସ ଏଡପୋଷ୍ଟରେ ଜଣେ ଅଧିକାରୀ ନିଯୁକ୍ତ ହୋଇଥିବାବେଳେ, ପୋଲିସ ଫୋର୍ସ ସହ ପେଟ୍ରୋଲିଙ୍ଗ ଗାଡି ମଧ୍ୟ ଦିଆଯାଇଛି l ଏହି ଏଡପୋଷ୍ଟରେ ୨୪ଘଣ୍ଟିଆ ସେବା ରହିବ ଏବଂ ପୋଲିସ ପେଟ୍ରୋଲିଙ୍ଗ ଜାରି ରହିବା ସହ ପେଟ୍ରୋଲିଙ୍ଗକୁ କଡାକଡି କରାଯିବ ବୋଲି କୁହାଯାଇଛି l ପ୍ରକାଶ ଥାଉକି ଗୋଶାଳା ଅଞ୍ଚଳରେ ଆଇଆଇଏମ, ସୈନିକସ୍କୁଲ, ସିଆରପିଏଫ ଗ୍ରୁପ ସେଣ୍ଟର, ବିଟିଆଇ, ଏସଏଲବି ଫାର୍ମ, ନବୋଦୟ ବିଦ୍ୟାଳୟ, ଆଦର୍ଶ ବିଦ୍ୟାଳୟ, ଓମଫେଡ ଭଳି ଅନୁଷ୍ଠାନମାନ ରହିଥିବାବେଳେ ଗୋଶାଳା ସବୁବେଳେ ଚଲଚଞ୍ଚଳ ରହୁଛି l ଆଇଆଇଏମ ଛକ ନିକଟରେ ଲାଇସନ୍ସ ପ୍ରାପ୍ତ ଦେଶୀ ଓ ବିଦେଶୀ ମଦଭାଟି ରହିଥିବାବେଳେ, ଗୋଶାଳା ଛକରେ ଅନେକ ବେଆଇନ କୁଚିଆ ଭାଟି ରହିଛି l ଏହି ଅଞ୍ଚଳରେ କୋରେକ୍ସ, ଟାବଲେଟ ଭଳି ନିଶାଦ୍ରବ୍ୟ ଅବାଧରେ ବିକ୍ରୀହେଉଥିବାବେଳେ, ଏହି ସବୁ ବେଆଇନ କାର୍ଯ୍ୟକାଳାପକୁ ସମ୍ପୂର୍ଣ୍ଣ ବନ୍ଦ କରିବାକୁ ସଚେତନ ମହଲରେ ଦାବି ହେଉଛି l