ମହେନ୍ଦ୍ର କୁମାର ସାଇ

27/12/2024 at 9:37 PM

ଝାରସୁଗୁଡା ୨୭/୧୨ (ଓଡ଼ିଶା ନ୍ୟୁଜ) ଝାରସୁଗୁଡା ଜିଲ୍ଲା ରେଙ୍ଗାଲି ଥାନା ଅର୍ନ୍ତଗତ ୪୯ ନଂ ଜାତୀୟ ରାଜପଥ ବଏଗାଡେରା ଗାଁ ନିକଟରେ ଗତକାଲି ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଥିଲା । ୪୯ ନଂ ଜାତୀୟ ରାଜପଥରେ ଚାଲି ଚାଲି ଯାଉଥିବା ଜଣେ ଯୁବକଙ୍କ ଉପରେ ଏକ ଅଜଣା ଗାଡ଼ି ଚଢ଼ି ଯିବାରୁ ଘଟଣା ସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା । ମୃତ ଯୁବକ ଜଣକ ହେଉଛନ୍ତି ରେଙ୍ଗାଲି ଥାନା ପଲସଦା ଗ୍ରାମ ପଞ୍ଚାୟତ ଅନ୍ତର୍ଗତ ରେଙ୍କୁଲି ଗ୍ରାମର ପାଣ୍ଡବ ଜୁଏଡ଼ (୩୩) । ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରା ଯାଇଥିବା ରେଙ୍ଗାଲି ଥାନା ଇନଚାର୍ଜ ସମରେନ୍ଦ୍ର ନାୟକ ପ୍ରକାଶ କରିଛନ୍ତି ।
ସୂଚନା ଅନୁସାରେ ବୁଧବାର ସନ୍ଧ୍ୟା ପ୍ରାୟ ୫ ଟା ସମୟରେ ପଡ଼ୋଶୀ ଛତିଶଗଡ଼ ରାୟଗଡ଼ ଜିଲ୍ଲା ସଦର ଚକ୍ରଧର ନଗର ଥାନା ଅନ୍ତର୍ଗତ ବିଞ୍ଚକୋଟ ସ୍ଥିତ ନିଜ ମାମୁଁ ଘରକୁ ଯାଉଛି କହି ପାଣ୍ଡବ ରେଙ୍କୁଲି ସ୍ଥିତ ନିଜ ଘରୁ ବାହାରି ଥିଲେ । ହେଲେ ସେ ରାସ୍ତାରେ ଚାଲି ଚାଲି ଯାଉଥିବା ବେଳେ ଏନଏଚ ୪୯ ବାଦୀମାଲ ପଞ୍ଚାୟତ ଅନ୍ତର୍ଗତ ବଏଗାଡେରା ଗାଁ ନିକଟରେ ତାଙ୍କ ଉପରେ ଏକ ଅଜଣା ଗାଡ଼ି ଚଢି ଯାଇ ଫେରାର ହୋଇ ଯାଇଥିଲା । ଫଳରେ ଘଟଣା ସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା । ଗୁରୁବାର ସକାଳ ପ୍ରାୟ ୫ ଟା ସମୟରେ ତାଙ୍କ ଗ୍ରାମର କେତେକ ପରିବା ବିକାଳୀ ସେହି ରାସ୍ତା ଦେଇ ଯାଉଥିବା ବେଳେ ଏହା ଦେଖି ତାଙ୍କ ପରିବାର ଲୋକଙ୍କୁ ଖବର ଦେବା ପରେ ସେମାନେ ଦୁର୍ଘଟଣା ସ୍ଥଳରେ ପହଞ୍ଚି ପାଣ୍ଡବ ବୋଲି ଚିହ୍ନଟ କରି ପୁଲିସକୁ ସୂଚନା ଦେଇଥିଲେ । ରେଙ୍ଗାଲି ଥାନା ଇନଚାର୍ଜ ସମରେନ୍ଦ୍ର ନାୟକଙ୍କ ନିର୍ଦ୍ଦେଶ କ୍ରମେ କନକତୋରା ବିଟ ହାଉସ ଅଧିକାରୀ ରମେଶ କୁମାର ଭଇଁସାଲ ଘଟଣା ସ୍ଥଳରେ ପହଞ୍ଚି ଶବକୁ ଜବତ କରିବା ସହ ପଞ୍ଚନାମା କରି ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଥିଲେ । ମୃତକ ପାଣ୍ଡବଙ୍କ ବଡ଼ଭାଇ ଫକୀର ଜୁଏଡ଼ଙ୍କ ଲିଖିତ ଅଭିଯୋଗ ଅନୁସାରେ ଏକ ମାମଲା ରୁଜୁ କରି ଦୁର୍ଘଟଣା ସମ୍ପର୍କରେ ତଦନ୍ତ ଜାରି ରହିଥିବା ରେଙ୍ଗାଲି ଥାନା ଇନଚାର୍ଜ ଶ୍ରୀ ନାୟକ ପ୍ରକାଶ କରିଛନ୍ତି । ଏନଏଚ ୪୯ ରାସ୍ତାକଡ଼ରେ ବେନିୟମ ଭାବେ ଘର ତିଆରି ନିମନ୍ତେ ରଖା ଯାଇଥିବା ବାଲି ଗଦା ଯୋଗୁଁ ପାଣ୍ଡବ ଦୁର୍ଘଟଣାର ସମ୍ମୁଖୀନ ହୋଇ ମୃତ୍ୟୁ ବରଣ କରିଥିବା ଗ୍ରାମବାସୀ ପକ୍ଷରୁ ଅଭିଯୋଗ ହେଉଛି ।
ସୂଚନା ଥାଉକି ଏନଏଚ ୪୯ ଜାତୀୟ ରାଜପଥ ସମ୍ପ୍ରସାରଣ ହେବାର ଯୋଜନା ରହିଛି । ତେଣୁ ଲଖନପୁର ତହସିଲ କନକତୋରା ଆରଆଇ ସର୍କଲ ଅନ୍ତର୍ଗତ ବାଦୀମାଲ ପଞ୍ଚାୟତ ବଏଗାଡେରା ଠାରୁ ଆରମ୍ଭ କରି କନକତୋରା ପର୍ଯ୍ୟନ୍ତ ଏନଏଚ ୪୯ ଜାତୀୟ ରାଜପଥ ଉଭୟ ପାର୍ଶ୍ଵରେ ରହିଥିବା ଜମି ଉପରେ ଏବେ ବାହାର ପୁଞ୍ଜିପତିଙ୍କ ଲୋଲୁପ ଦୃଷ୍ଟି ପଡ଼ିଛି । ସେମାନେ ଅଧିକ ଲାଭ ପାଇବା ଆଶାରେ ଉକ୍ତ ଜମିକୁ ନିରୀହ ଲୋକଙ୍କ ଠାରୁ ଶାଗମାଛ ଦରରେ କିଣି ସେହି ଜମିରେ ଅବାଧ ଭାବେ ଯୁଦ୍ଧ କାଳୀନ ଭିତ୍ତିରେ ଘର ତିଆରି କରିବାରେ ଲାଗିଛନ୍ତି । ଘର ତିଆରି ପାଇଁ ଆବଶ୍ୟକ ବାଲି,ଇଟା ଆଦି ବିଭିନ୍ନ ସାମଗ୍ରୀ ଗୁଡିକୁ ରାଜରାସ୍ତା କଡରେ ଗଦା କରି ରଖୁଛନ୍ତି । ଯାହା ଫଳରେ ରାସ୍ତାରେ ଯାତାୟାତ କରୁଥିବା ବେଳେ ସାଧାରଣ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି । ତେଣୁ ରାଜପଥ ଉଭୟ ପାର୍ଶ୍ଵରେ ତିଆରି କରୁଥିବା ଘର କାର୍ଯ୍ୟ ଉପରେ ରୋକ ଲଗାଇବା ସହିତ ସେମାନଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଅଞ୍ଚଳବାସୀ ପକ୍ଷରୁ ଦାବି କରୁଛନ୍ତି ।