ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ30/04/2025 at 8:57 AM
ନୂଆଦିଲ୍ଲୀ: ଜମ୍ମୁ-କାଶ୍ମୀରରେ ଆତଙ୍କବାଦୀ ଆକ୍ରମଣ ପରେ ଉତ୍ତରାଖଣ୍ଡ ସରକାର ମଧ୍ୟ ଚାରିଧାମ ଯାତ୍ରାକୁ ନେଇ ସତର୍କ ରହିଛନ୍ତି। ଉତ୍ତରାଖଣ୍ଡର ବିଶ୍ୱ ପ୍ରସିଦ୍ଧ ଚାରିଧାମ ଯାତ୍ରାରେ ପ୍ରଥମ ଥର ପାଇଁ ଅର୍ଦ୍ଧସାମରିକ ବାହିନୀ ନିୟୋଜିତ ହୋଇପାରେ। ଏଥିପାଇଁ ପୋଲିସ ମୁଖ୍ୟାଳୟ ପକ୍ଷରୁ ସରକାରଙ୍କୁ ଏକ ପ୍ରସ୍ତାବ ପଠାଯାଇଥିଲା।
ସରକାରଙ୍କ ଅନୁମୋଦନ ପରେ ଉକ୍ତ ପ୍ରସ୍ତାବକୁ କେନ୍ଦ୍ର ଗୃହ ମନ୍ତ୍ରଣାଳୟ (MHA)କୁ ପଠାଯାଇଛି। ପହଲଗାମରେ ସମ୍ପ୍ରତି ଘଟିଥିବା ଆତଙ୍କବାଦୀ ଘଟଣା ପରେ ଅତିରିକ୍ତ ସୁରକ୍ଷାକୁ ଦୃଷ୍ଟିରେ ରଖି ଏହା କରାଯାଉଥିବା କୁହାଯାଉଛି। ଗୃହ ମନ୍ତ୍ରଣାଳୟ ସୂତ୍ର ଅନୁଯାୟୀ, କେନ୍ଦ୍ର ଗୃହ ମନ୍ତ୍ରଣାଳୟକୁ ପଠାଯାଇଥିବା ପ୍ରସ୍ତାବରେ ୧୦ କମ୍ପାନୀ ଅର୍ଦ୍ଧସାମରିକ ବାହିନୀ ପାଇଁ ଦାବି କରାଯାଇଛି। ଏଥିମଧ୍ୟରୁ ଗଡ଼ୱାଲ ଅଞ୍ଚଳରେ ଛଅଟି କମ୍ପାନୀ ଏବଂ କୁମାଉନ ଅଞ୍ଚଳର ଧାର୍ମିକ ସ୍ଥଳ ଏବଂ ପର୍ଯ୍ୟଟନ କ୍ଷେତ୍ରରେ ଚାରିଟି କମ୍ପାନୀ ନିୟୋଜିତ ହେବେ।
ଉତ୍ତରାଖଣ୍ଡ ସରକାରଙ୍କ ଏହି ପ୍ରସ୍ତାବ ଉପରେ କେନ୍ଦ୍ର ସରକାର ଖୁବ୍ ଶୀଘ୍ର ନିଷ୍ପତ୍ତି ନେଇପାରନ୍ତି। ଆପଣଙ୍କୁ କହିରଖୁଛୁ ଯେ ଜମ୍ମୁ-କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଘଟଣା ପରେ ସମଗ୍ର ଦେଶକୁ ସତର୍କ କରିଦିଆଯାଇଛି। ତେବେ ଉତ୍ତରାଖଣ୍ଡର ଚାରିଧାମ ଯାତ୍ରାରେ କେବଳ ଦେଶର ଲୋକମାନେ ନୁହେଁ ବରଂ ବିଦେଶରୁ ମଧ୍ୟ ବହୁ ସଂଖ୍ୟକ ଭକ୍ତ ଅଂଶଗ୍ରହଣ କରିଥାନ୍ତି।