ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

5/05/2025 at 8:37 AM

ନୂଆଦିଲ୍ଲୀ: ପହଲଗାମରେ ଆତଙ୍କବାଦୀ ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ଜାରି ରହିଛି। ଏହି ସମୟରେ ଇରାନର ବୈଦେଶିକ ମନ୍ତ୍ରୀ ଆବାସ ଆଘାରଚି ଏକ ଦିନିକିଆ ଗସ୍ତରେ ଇସଲାମାବାଦରେ ପହଞ୍ଚିଛନ୍ତି।

ଏହି ସମୟ ମଧ୍ୟରେ ସେ ପାକିସ୍ତାନ ରାଷ୍ଟ୍ରପତି ଆସିଫ ଅଲ୍ଲୀ ଜର୍ଦ୍ଦାରୀ, ପ୍ରଧାନମନ୍ତ୍ରୀ ଶାହବାଜ ସରିଫ ଏବଂ ଉପପ୍ରଧାନମନ୍ତ୍ରୀ ତଥା ବୈଦେଶିକ ମନ୍ତ୍ରୀ ଇସାକ ଡାରଙ୍କୁ ଭେଟିବେ। ଏହି ବୈଠକରେ ସେମାନେ ଭାରତ-ପାକିସ୍ତାନ ଉତ୍ତେଜନା ପରିପ୍ରେକ୍ଷୀରେ ବର୍ତ୍ତମାନର ଆଞ୍ଚଳିକ ପରିସ୍ଥିତି ଉପରେ ଆଲୋଚନା କରିବେ।

ଇରାନର ବୈଦେଶିକ ମନ୍ତ୍ରଣାଳୟର ମୁଖପାତ୍ର ଇସମାଇଲ ବାଘାଇ ଶନିବାର କହିଛନ୍ତି ଯେ ଆଘାରଚିଙ୍କ ଗସ୍ତ ତେହେରାନ ଏବଂ ଅନ୍ୟାନ୍ୟ ଆଞ୍ଚଳିକ ଦେଶମାନଙ୍କ ମଧ୍ୟରେ ଉତ୍ତେଜନା ହ୍ରାସ ପାଇଁ ଆଲୋଚନାର ଏକ ଅଂଶ ଥିଲା। ଏହି ଗସ୍ତ ଗୁରୁତ୍ୱପୂର୍ଣ୍ଣ କାରଣ ଇରାନ ଉଭୟ ଦେଶ ସହିତ ଆଲୋଚନା କରିବାକୁ ଚେଷ୍ଟା କରୁଛି ଏବଂ ଉଭୟ ଦେଶକୁ ଶାନ୍ତି ପାଇଁ ନିବେଦନ କରିଛି।

ପାକିସ୍ତାନ ଗସ୍ତ ପରେ ଇରାନର ବୈଦେଶିକ ମନ୍ତ୍ରୀ ଆଘାରଚି ମଧ୍ୟ ଏହି ସପ୍ତାହରେ ଭାରତ ଗସ୍ତରେ ଯିବେ। ଆଘାରଚି ପୂର୍ବରୁ ପହଲଗାମ ଆକ୍ରମଣକୁ ନିନ୍ଦା କରିସାରିଛନ୍ତି। ତେବେ ଆକ୍ରମଣ ପରେ ଇରାନ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ହ୍ରାସ କରିବା ପାଇଁ ଆଲୋଚନା କରିବାକୁ ମଧ୍ୟ ପ୍ରସ୍ତାବ ଦେଇଥିଲା।