ଭାରତରେ ୮ ହଜାର ‘X’ ଆକାଉଣ୍ଟ ବ୍ଲକ୍

ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

ନୂଆଦିଲ୍ଲୀ: ଭାରତ ସରକାରଙ୍କ ନିର୍ଦ୍ଦେଶ ପରେ ସୋସିଆଲ ମିଡିଆ ପ୍ଲାଟଫର୍ମ X ଗୁରୁବାର ଦେଶରେ ୮ ହଜାର ଆକାଉଣ୍ଟ ବନ୍ଦ କରିଦେଇଛି। ସରକାର ଏକ କାର୍ଯ୍ୟନିର୍ବାହୀ ନିର୍ଦ୍ଦେଶ ଜାରି କରିବା ପରେ X ଦ୍ୱାରା ଏହି କାର୍ଯ୍ୟାନୁଷ୍ଠାନ ନିଆଯାଇଛି।

ଆକାଉଣ୍ଟ ବନ୍ଦ କରିବା ପରେ X ଏକ ବିବୃତ୍ତିରେ କହିଛି ଯେ ସରକାରଙ୍କଠାରୁ ଏହି ସମ୍ପର୍କରେ ନିର୍ଦ୍ଦେଶ ମିଳିଛି। କମ୍ପାନୀ ଏହା ମଧ୍ୟ କହିଛନ୍ତି ଯେ ସରକାର ୮ ହଜାର ଆକାଉଣ୍ଟକୁ ବ୍ୟାନ୍ କରିବା ପାଇଁ ଏକ କାର୍ଯ୍ୟନିର୍ବାହୀ ନିର୍ଦ୍ଦେଶ ଜାରି କରିଛନ୍ତି। ଏପରି ନ କରିବା କ୍ଷେତ୍ରରେ କମ୍ପାନୀ ଉପରେ ଦଣ୍ଡ ଲାଗୁ ହୋଇପାରେ।

ତେବେ କମ୍ପାନୀ ତା’ର ବିବୃତ୍ତିରେ ଆହୁରି ମଧ୍ୟ କହିଛି ଯେ ଏହି ଆକାଉଣ୍ଟଗୁଡ଼ିକ କେବଳ ଭାରତରେ ବ୍ୟାନ୍ କରାଯିବ। ନିର୍ଦ୍ଦେଶ ଅନୁଯାୟୀ କାର୍ଯ୍ୟାନୁଷ୍ଠାନ ପ୍ରକ୍ରିୟା ଆରମ୍ଭ ହୋଇଛି।