ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

19/05/2025 at 12:31 PM

ନୂଆଦିଲ୍ଲୀ: ପାକିସ୍ତାନ ପାଇଁ ଗୁପ୍ତଚର କରୁଥିବା ଅଭିଯୋଗରେ ହରିୟାଣାର ୟୁଟ୍ୟୁବର ଜ୍ୟୋତି ମାଲହୋତ୍ରାଙ୍କ ଇନଷ୍ଟାଗ୍ରାମ ଆକାଉଣ୍ଟକୁ ବନ୍ଦ କରିଦିଆଯାଇଛି। ଜ୍ୟୋତିଙ୍କ ଆକାଉଣ୍ଟକୁ ଗଲେ ଏହି ପୃଷ୍ଠା ଉପଲବ୍ଧ ନାହିଁ ବୋଲି ଦେଖାଉଛି।

ସୁରକ୍ଷା ଏଜେନ୍ସିଗୁଡ଼ିକ ସନ୍ଦେହ କରୁଛନ୍ତି ଯେ ଜ୍ୟୋତି ତାଙ୍କ ଭିଡିଓ ମାଧ୍ୟମରେ ପାକିସ୍ତାନ ସହିତ ଅନେକ ଗୁରୁତ୍ୱପୂର୍ଣ୍ଣ ସୂଚନା ସେୟାର କରିଛନ୍ତି, ଯାହା ପରେ ଏହି କାର୍ଯ୍ୟାନୁଷ୍ଠାନ ନିଆଯାଇଛି। ଏହି ମାମଲାରେ ଆହୁରି ଅନେକ ସୋସିଆଲ ମିଡିଆ ଇନଫ୍ଲୁଏନସର୍ ସମ୍ପୃକ୍ତ ଥିବା ସନ୍ଦେହ କରାଯାଉଛି। ବର୍ତ୍ତମାନ ପୋଲିସ ତଦନ୍ତରେ ବ୍ୟସ୍ତ ଅଛି।

ଜ୍ୟୋତି ମାଲହୋତ୍ରାଙ୍କ ଗିରଫଦାରୀ ପରେ ତାଙ୍କୁ ଦୀର୍ଘ ସମୟ ଧରି ପଚରାଉଚରା କରାଯାଉଛି। ଜ୍ୟୋତି ମାଲହୋତ୍ରା ବିଦେଶ ଭ୍ରମଣ କରୁଥିଲେ ଏବଂ ବିଳାସପୂର୍ଣ୍ଣ ହୋଟେଲରେ ରହୁଥିଲେ। ତଦନ୍ତକାରୀ ସଂସ୍ଥାଗୁଡ଼ିକ ଦ୍ୱାରା ଯାଞ୍ଚ କରାଯାଇଥିବା ରେକର୍ଡରୁ ଜଣାପଡିଛି ଯେ ତାଙ୍କର ଖର୍ଚ୍ଚ ତାଙ୍କ ଆୟ ଅପେକ୍ଷା ଅଧିକ ଥିଲା। ଜ୍ୟୋତି ମାଲହୋତ୍ରା ତିନିଥର ପାକିସ୍ତାନ ଗସ୍ତ କରିଛନ୍ତି। ସେ ତାଙ୍କ ସୋସିଆଲ ମିଡିଆ ଆକାଉଣ୍ଟରେ ଏ ସମ୍ପର୍କିତ ଅନେକ ଭିଡିଓ ସେୟାର ମଧ୍ୟ କରିଛନ୍ତି। ସେ ପ୍ରାୟ ୧୨ ଦିନ ପାଇଁ ପାକିସ୍ତାନରେ ରହିଥିଲେ।

ତେବେ ପହଲଗାମ ଆକ୍ରମଣ ପରେ ସେ ଲାଇଭ୍ ଆସିଥିଲେ ଏବଂ ତାଙ୍କୁ ହସୁଥିବାର ଦେଖାଯାଇଥିଲା। ହିସାର ପୋଲିସ ଅଧୀକ୍ଷକ (ଏସପି) ଶଶାଙ୍କ କୁମାର ସାୱନ ଗଣମାଧ୍ୟମକୁ କହିଛନ୍ତି ଯେ ଆଧୁନିକ ଯୁଦ୍ଧ ଆଉ କେବଳ ସୀମା ମଧ୍ୟରେ ସୀମିତ ନୁହେଁ। ପାକିସ୍ତାନୀ ଗୁଇନ୍ଦା ଏଜେଣ୍ଟମାନେ ସୋସିଆଲ ମିଡିଆ ଇନଫ୍ଲୁଏନସରଙ୍କୁ ନିଯୁକ୍ତି ଦେଇ ସେମାନଙ୍କର ପ୍ରଚାରକୁ ପ୍ରୋତ୍ସାହିତ କରିବାକୁ ଚେଷ୍ଟା କରୁଛନ୍ତି।