ଦେଶରେ ୪ ହଜାର ଟପିଲା କରୋନା ଆକ୍ଟିଭ କେସ
ନୂଆଦିଲ୍ଲୀ: ଦେଶରେ କରୋନା ମାମଲା କମିବା ପରିବର୍ତ୍ତେ ବୃଦ୍ଧି ପାଉଛି। ଯାହା ଫଳରେ ଲୋକଙ୍କ ଚିନ୍ତା ବଢ଼ିବାରେ ଲାଗିଛି।
ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ ଅନୁଯାୟୀ, ବୁଧବାର ଭାରତରେ କରୋନାର ମୋଟ ସକ୍ରିୟ ମାମଲା ସଂଖ୍ୟା ୪,୩୦୨ ରେ ପହଞ୍ଚିଛି। କେରଳରେ ପୁଣି ଥରେ ସର୍ବାଧିକ ମାମଲା ରେକର୍ଡ କରାଯାଇଛି। ଗତ ୨୪ ଘଣ୍ଟା ମଧ୍ୟରେ ଦେଶରେ ପ୍ରାୟ ୨୭୬ଟି ନୂତନ କୋଭିଡ୍ ମାମଲା ପଞ୍ଜିକୃତ ହୋଇଛି ଏବଂ ୭ ଜଣଙ୍କର ମୃତ୍ୟୁ ହୋଇଛି।
ଜାନୁଆରୀ ୨୦୨୫ ପରଠାରୁ ଦେଶରେ କରୋନାରେ ମୋଟ ୩୯ ଜଣଙ୍କ ମୃତ୍ୟୁ ରିପୋର୍ଟ ହୋଇଛି। ଦେଶରେ ମୃତ୍ୟୁ ସଂଖ୍ୟା ଯେଭଳି ଦ୍ରୁତ ଗତିରେ ବୃଦ୍ଧି ପାଉଛି ତାହା ନିଶ୍ଚିତ ଭାବରେ ଲୋକମାନଙ୍କୁ ଚିନ୍ତାରେ ପକାଇଛି। ସତର୍କତା ସ୍ୱରୂପ ଅନେକ ଲୋକ ମାସ୍କ ପିନ୍ଧିବା ଆରମ୍ଭ କରିଛନ୍ତି। ସେହିପରି ଗତ ୨୪ ଘଣ୍ଟା ମଧ୍ୟରେ ଦିଲ୍ଲୀରେ ୬୩ଟି ନୂତନ କରୋନା ମାମଲା ରିପୋର୍ଟ ହୋଇଛି। ଯାହା ଯୋଗୁଁ ରାଜଧାନୀରେ ଏବେ କରୋନା ସଂଖ୍ୟା ୫୦୦ ଅତିକ୍ରମ କରିଛି।
ଅପରପକ୍ଷରେ ମୃତ୍ୟୁ ସଂଖ୍ୟା ୪କୁ ବୃଦ୍ଧି ପାଇଛି। ମେଟ୍ରୋରେ ଲୋକମାନେ ଏବେ ମାସ୍କ ପିନ୍ଧିଥିବାର ଦେଖାଯାଉଥିବା ବେଳେ ସ୍ୱାସ୍ଥ୍ୟ ମନ୍ତ୍ରଣାଳୟ ମଧ୍ୟ ସତର୍କ ରହିବାକୁ କହିଛି।
