ରାଜା ରଘୁବଂଶୀ ହତ୍ୟା ମାମଲା; ୮ ଦିନିଆ ପୋଲିସ ରିମାଣ୍ଡରେ ଅଭିଯୁକ୍ତ
ଇନ୍ଦୋର: ଇନ୍ଦୋରର ରାଜା ରଘୁବଂଶୀ ହତ୍ୟା ମାମଲାରେ ସୋନମ ଏବଂ ରାଜ ସମେତ ୫ ଜଣ ଅଭିଯୁକ୍ତଙ୍କୁ ଶିଲଂ କୋର୍ଟ ୮ ଦିନିଆ ପୋଲିସ ରିମାଣ୍ଡରେ ପଠାଇ ଦେଇଛନ୍ତି।
ସୂଚନା ଅନୁଯାୟୀ, ପୋଲିସ ୧୦ ଦିନିଆ ରିମାଣ୍ଡ ଦାବି କରିଥିଲା। ଯେତେବେଳେ ୫ ଜଣ ଅଭିଯୁକ୍ତଙ୍କୁ କୋର୍ଟକୁ ନିଆଯାଇଥିଲା, ସେତେବେଳେ ଶହ ଶହ ସ୍ଥାନୀୟ ଲୋକ କୋର୍ଟ ପରିସରରେ ଏକାଠି ହୋଇଥିଲେ। ସୋନମ ଏବଂ ଅନ୍ୟ ଅଭିଯୁକ୍ତମାନଙ୍କୁ କଠୋର ଦଣ୍ଡ ଦେବାକୁ ଦାବି କରିଥିଲେ। ମିଡିଆ ରିପୋର୍ଟ ଅନୁଯାୟୀ ସୋନମ ରଘୁବଂଶୀ ତାଙ୍କ ସ୍ୱାମୀଙ୍କୁ ହତ୍ୟା କରିଥିବା ସ୍ୱୀକାର କରିଛନ୍ତି। ରିପୋର୍ଟ ଅନୁଯାୟୀ, ଯେତେବେଳେ ସୋନମ ରାଜ କୁଶୱାହାଙ୍କ ସହିତ ମୁହାଁମୁହିଁ ହୋଇଥିଲେ, ସେ ସ୍ୱୀକାର କରିଥିଲେ ଯେ ସେ ତାଙ୍କ ସ୍ୱାମୀଙ୍କୁ ହତ୍ୟା କରିବାକୁ ଷଡ଼ଯନ୍ତ୍ର କରିଥିଲେ।
ଅତିରିକ୍ତ ଏସପି, ପୂର୍ବ ଖାସି ହିଲ୍ସ ଆଶିଷ କହିଛନ୍ତି ଯେ ଆମେ ବର୍ତ୍ତମାନ କାଗଜପତ୍ର କାମ କରୁଛୁ। ପଚରାଉଚରା ପାଇଁ ଆମକୁ ଏପର୍ଯ୍ୟନ୍ତ ସମୟ ମିଳିନାହିଁ। କୋର୍ଟରୁ ଯାହା ନିର୍ଦ୍ଦେଶ ମିଳିବ ସେ ଅନୁସାରେ ଆମେ ଆଗକୁ ବଢ଼ିବୁ। ଏଥିରେ ସୋନମଙ୍କ ସମ୍ପୃକ୍ତି ହେବାର ସମ୍ଭାବନା ଅଧିକ। ତଦନ୍ତ ଏବେ ବି ଚାଲିଛି। ଆମେ ଏପର୍ଯ୍ୟନ୍ତ ପ୍ରାରମ୍ଭିକ ପର୍ଯ୍ୟାୟରେ ଅଛୁ।
ସୋନମ ରଘୁବଂଶୀଙ୍କ ଭାଇ ଗୋବିନ୍ଦ ବୁଧବାର ଇନ୍ଦୋରରେ ରାଜା ରଘୁବଂଶୀଙ୍କ ମାଆଙ୍କୁ ଭେଟି କାନ୍ଦି ପକାଇଥିଲେ। ଗୋବିନ୍ଦ କହିଥିଲେ ଯେ ଯଦି ସୋନମ ଦୋଷୀ ତେବେ ତାଙ୍କୁ ଫାଶୀ ଦିଆଯିବା ଉଚିତ ଏବଂ ଆମେ ତାଙ୍କ ସହିତ ସମସ୍ତ ସମ୍ପର୍କ ଭାଙ୍ଗି ଦେଇଛୁ। ରାଜା-ସୋନମ ୧୧ ମଇରେ ବିବାହ କରିଥିଲେ। ୨୧ ମଇରେ ସେମାନେ ହନିମୁନ ପାଇଁ ଶିଲଂରେ ପହଞ୍ଚିଥିଲେ। ୨୩ ମଇ ପରେ ପରିବାର ସହିତ ସେମାନଙ୍କର ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା ଏବଂ ୨ ଜୁନରେ ରାଜାଙ୍କ ମୃତଦେହ ମିଳିଥିଲା। ଏହା ପରେ ସୋନମଙ୍କୁ ଖୋଜାଖୋଜି କରାଯାଇଥିଲା। ୯ ଜୁନରେ ସେ ଗାଜିପୁରରୁ ମିଳିଥିଲେ।
